ຊາອຸດິດ ອາຣັບບີ ຈະປ່ອຍກາກບອນເປັນ 0 ພາຍໃນປີ 2060

  ຊາອຸດິດອາຣັບບີ ປະກາດຈະປ່ອຍອາຍພິດເຮືອນແກ້ວເປັນ 0 ພາຍໃນປີ 2060 ເພື່ອຮ່ວມກັບອີກ 100 ກວ່າປະເທດທີ່ຫາທາງຮັບມື ແລະຈຳກັດການປ່ຽນແປງສະພາບອາກາດທີ່ເກີດຈາກກິດຈະກຳຂອງຄົນ.
ຕາມຂ່າວຕ່າງປະເທດລາຍງານວ່າ ເຈົ້າຊາຍ ໂມຮໍາໝັດ ບິນ ຊັລມານ ຂອງຊາອຸດິດອາຣັບບີ ເປີດກອງປະຊຸມຄວາມລິເລີ່ມສີຂຽວທີ່ຈັດຂຶ້ນໃນຊາອຸດິດອາຣັບບີເປັນຄັ້ງທຳອິດໃນວັນທີ 24 ຕຸລາທີ່ຜ່ານມາ ຊາອຸດິດອາຣັບບີຕັ້ງເປົ້າຈະປ່ອຍອາຍພິດເຮືອນແກ້ວເປັນ 0 ໃຫ້ໄດ້ພາຍໃນ 39 ປີ ເປັນການປະກາດກ່ອນກອງປະຊຸມພາຄີອະນຸສັນຍາສະຫະປະຊາຊາດວ່າດ້ວຍການປ່ຽນແປງສະພາບອາກາດ(COP)ຄັ້ງທີ 26 ຈະໄຂຂຶ້ນໃນເມືອງກລາສະໂກຂອງສະກອດແລນໃນວັນທີ 31 ຕຸລາ ແລະດຳເນີນໄປຈົນເຖິງວັນທີ 12 ພະຈິກ ເລື່ອນຈາກເດືອນພະຈິກປີກ່ອນໜ້ານີ້ ເພາະສະຖານະການໂຄວິດ 19 ຈະມີຜູ້ນໍາທົ່ວໂລກເຂົ້າຮ່ວມຫາວິທີການຮັບມື ແລະບັນເທົາຜົນກະທົບຈາກພາວະໂລກຮ້ອນ.
  ການສົ່ງອອກນໍ້າມັນ ແລະແກ໊ສຍັງເປັນລາຍໄດ້ຕົ້ນຕໍຂອງຊາອຸດິດອາຣັບບີເຖິງແມ່ນວ່າ ຈະພະຍາຍາມສ້າງຄວາມຫຼາກຫຼາຍເພື່ອຫຼຸດການເພີ່ງພາເຊື້ອໄຟຟອສຊິນພຽງຢ່າງດຽວ ໂດຍໄດ້ຄັດຄ້ານຄວາມພະຍາຍາມຈຳກັດການລົງທຶນດ້ານນໍ້າມັນ ແລະຍັງສົ່ງອອກເຊື້ອໄຟຟອສຊິນໄປຍັງອາຊີ ແລະຫຼາຍພາກພື້ນ.

----

ໜັງສືພິມ ເສດຖະກິດ-ສັງຄົມ

แชร์