ສະຫວັນມອບລົດສົ່ງຄົນເຈັບ 3 ເມືອງ

ຂ່າວ: ສະຫວັນ

    ພະແນກສາທາລະນະສຸກ ແຂວງສະຫວັນນະເຂດ ໄດ້ມອບລົດໃຫ້ແກ່ເມືອງໄຊບູລີ, ພະລານໄຊ ແລະເມືອງນອງ ເພື່ອນໍາໄປຮັບໃຊ້ໃນການນໍາສົ່ງຄົນເຈັບ.    

  ພິທີມອບ-ຮັບຈັດຂຶ້ນວັນທີ 15 ຕຸລາ 2021 ທີ່ພະແນກດັ່ງກ່າວ, ເປັນປະທານໂດຍທ່ານ ດຣ ແສງດາວ ສີດາໄລ ຫົວໜ້າພະແນກສາທາລະນະສຸກແຂວງ, ມີຄະນະພະແນກ, ພ້ອມດ້ວຍພະນັກງານພາຍໃນພະແນກ ແລະຫົວໜ້າຫ້ອງການສາທາລະນະສຸກ ເມືອງໄຊບູລີ, ພະລານໄຊ ແລະເມືອງນອງເຂົ້າຮ່ວມ.

  ທ່ານ ດຣ ແສງດາວ ສີດາໄລ ກໍ່ໄດ້ກ່າວຍ້ອງຍໍຊົມເຊີຍໂຄງການຮັກສາຄວາມປອດໄພດ້ານສຸຂະພາບກົມແຜນການ ແລະການຮ່ວມມືທີ່ໄດ້ປະກອບສ່ວນມອບລົດຮັບ-ສົ່ງຄົນເຈັບ 3 ຄັນ ໃຫ້ແກ່ເມືອງໄຊບູລີ, ພະລານໄຊ ແລະເມືອງນອງເພື່ອນໍາໃຊ້ເຂົ້າໃນວຽກງານຮັບສົ່ງຄົນເຈັບກໍ່ຄືການບໍລິຫານດ້ານສາທາລະນະສຸກໃຫ້ໄດ້ຮັບຜົນດີ ແລະໃນໄລຍະນີ້, ເກີດ ການແຜ່ລະບາດຢ່າງໜັກຂອງພະຍາດໂຄວິດ-19 ກໍ່ຖືໂອກາດນໍາໃຊ້ລົດຄັນນີ້ກຽມພ້ອມລໍຖ້າຮັບສົ່ງຜູ້ຕິດເຊື້ອໄປຍັງສູນປິ່ນປົວທີ່ໄດ້ກໍານົດໄວ້.

ພ້ອມທັງ, ຮຽກຮ້ອງໃຫ້ຫ້ອງການສາທາລະນະສຸກເມືອງທັງ 3 ເມືອງ ເມື່ອຮັບລົດໄປແລ້ວກໍ່ຈົ່ງຖະນຸຖະໜອມຮັກສາລົດຄັນໃຫ້ດີເພື່ອຍືດອາຍຸການໃຊ້ງານຂອງລົດໃຫ້ນານຂຶ້ນ.

• 22/10/2021