ອາເມລິກາ ສະໜັບສະໜູນສຶກສາລາວ

ຂ່າວ: ເສດຖະກິດ

ເພື່ອເປັນການສະໜັບສະໜູນ ສປປ ລາວ ໃນການສ້າງຄວາມເຂັ້ມແຂງໃຫ້ກັບສະຖາບັນການສຶກສາ, ອົງການພັດທະນາສາກົນຂອງສະຫະລັດອາເມລິກາ (USAID) ແລະກະຊວງສຶກສາທິການ ແລະກີລາໄດ້ເປີດໂຄງການໃໝ່ທີ່ມີຊື່ວ່າ: ໂຄງການສຶກສາ ແລະການສ້າງຕົວແບບໃນວຽກງານການສ້າງຄວາມເຂັ້ມແຂງດ້ານການບໍລິຫານ, ຂຶ້ນທີ່ນະຄອນຫຼວງວຽງຈັນ ໃນຄັ້ງວັນທີ 21 ຕຸລາ 2021.

ລົງນາມຮ່ວມມືໂດຍທ່ານ ຮສ. ປອ. ອຸດົມ ພອນຄຳເພັງ, ອະທິການບໍດີມະຫາວິທະຍາໄລແຫ່ງຊາດ ແລະທ່ານ ແສງທອງ ໂພທິສານ, ຜູ້ຈັດການໂຄງການ, ສະຖາບັນ ອາທີໄອອິນເຕີເນຊັນນັນໃນນາມເປັນຜູ້ຈັດຕັ້ງປະຕິບັດ, ເຂົ້າຮ່ວມເປັນສັກຂີພິຍານໃນການເຊັນບົດບັນທຶກຄວາມເຂົ້າໃຈໂດຍ ທ່ານ ປອ. ສຸລິອູດົງ ສຸນດາລາ, ຮອງລັດຖະມົນຕີກະຊວງສຶກສາທິການ ແລະກີລາ ແລະ ທ່ານ ປອ. ປີເຕິ ເຮມ໋ອນເອກອັກຄະລັດຖະທູດສະຫະລັດອາເມລິກາປະຈຳ ສປປ ລາວ.

 ໂຄງການດັ່ງກ່າວໄດ້ຮັບການສະໜັບສະໜູນທຶນໂດຍອົງການພັດທະນາສາກົນຂອງສະຫະລັດອາເມລິກາ (USAID) ແລະຈັດຕັ້ງປະຕິບັດໂດຍສະຖາບັນອາທີໄອອິນເຕີເນຊັນນັນ (RTI Internat ional) ຮ່ວມກັບມະຫາວິທະຍາໄລແຫ່ງຊາດ.

   ຄຽງຄູ່ກັນນັ້ນ, ໂຄງການຈະຮ່ວມມືກັບບັນດາສະຖາບັນການສຶກສາ, ຄູ-ອາຈານ ແລະນັກສຶກສາ, ແລະກຸ່ມນັກຄົ້ນຄວ້າວິໄຈເພື່ອສ້າງຄວາມເຂັ້ມແຂງທາງດ້ານການຄຸ້ມຄອງ, ການບໍລິຫານ ແລະທັກສະທາງດ້ານວິຊາການເພື່ອເຮັດໃຫ້ເຂົາເຈົ້າສາມາດປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງ ສປປ ລາວ ໄດ້ຢ່າງມີປະສິດທິພາບ.

   ທ່ານ ປອ. ປີເຕິ ເຮມ໋ອນ ກ່າວໃນງານວ່າ: ໂຄງການນີ້ສະແດງໃຫ້ເຫັນເຖິງຄວາມມຸ້ງໝັ້ນໃນການສະໜັບສະໜູນ ແລະ ການຂະຫຍາຍສາຍພົວພັນພາຍໃຕ້ການຮ່ວມມືແບບກວມລວມລະຫວ່າງສະຫະລັດອາເມລິກາ ແລະ ສປປ ລາວ.

   ປີນີ້ເປັນປີທີ່ຄົບຮອບ 5 ປີ ຂອງກອບການຮ່ວມມືດັ່ງກ່າວ ແລະສະຫະລັດອາເມລິກາມີຄວາມພູມໃຈທີ່ໄດ້ຮ່ວມມືກັບ ສປປ ລາວ ເພື່ອສະໜັບສະໜູນສະຖາບັນການສຶກສາ ແລະປະກອບສ່ວນໃຫ້ກັບເປົ້າໝາຍການພັດທະນາເສດຖະກິດ-ສັງຄົມຂອງ ສປປ ລາວ ໃຫ້ມີປະສິດທິພາບ ແລະຍືນຍົງ.

    ນັບຕັ້ງແຕ່ສ້າງຕັ້ງສາຍພົວພັນຮ່ວມມືແບບກວມລວມລະຫວ່າງສະຫະລັດອາເມລິກາ ແລະ ສປປ ລາວ ແຕ່ປີ 2016, ອົງການພັດທະນາສາກົນຂອງສະຫະລັດອາເມລິກາ (USAID) ໄດ້ເພີ່ມທະວີການສະໜັບສະໜູນລັດຖະບານລາວໃນຫຼາຍຂະແໜງການເປັນຕົ້ນແມ່ນປັບປຸງສະພາບແວດລ້ອມໃນການລົງທຶນ ແລະການຄ້າ, ສ້າງຄວາມເຂັ້ມແຂງໃຫ້ກັບບັນດາວິສາຫະກິດຂະໜາດນ້ອຍ ແລະ ກາງ (SMEs), ສົ່ງເສີມວຽກງານການປົກຄອງ ແລະ ລັດຄຸ້ມຄອງລັດຄຸ້ມຄອງສັງຄົມດ້ວຍກົດໝາຍ, ສົ່ງເສີມການສຶກສາ ແລະ ວຽກງານສາທາລະນະສຸກ, ພັດທະນາເສດຖະກິດຕາມຄວາມຕ້ອງການຂອງຕະຫຼາດ ແລະ ເຊື່ອມໂຍງກັບອາຊຽນພ້ອມທັງສະໜັບສະໜູນໃຫ້ ສປປ ລາວ ສາມາດບັນລຸໄດ້ເປົ້າໝາຍພັດທະນາແຫ່ງຊາດ.

แชร์