ເປີດສູນຄຸມເດີນລົດໄຟລາວ-ຈີນ

ຂ່າວ: ສີສຸວັນ

  ແຫຼ່ງຂ່າວຈາກບໍລິສັດທາງລົດໄຟລາວ-ຈີນ ຈໍາກັດ ແລະບໍລິສັດການ ໄຟຟ້າທາງລົດໄຟ ສປ ຈີນ ໄດ້ລາຍງານໃຫ້ຮູ້ວ່າ: ໃນກາງເດືອນຕຸລາ 2021 ຜ່ານມານີ້ໄດ້ມີພິທີເປີດນຳໃຊ້ສູນຄວບຄຸມການເດີນລົດຂອງໂຄງການທາງລົດໄຟລາວ-ຈີນ ຂຶ້ນຢ່າງເປັນທາງການ, ເພື່ອເປັນການປູວາງຮາກຖານທີ່ໝັ້ນຄົງສຳລັບການເປີດນຳໃຊ້ທາງລົດໄຟລາວ-ຈີນ ໃຫ້ມີຄຸນນະພາບສູງ.

   ພາຍຫຼັງທີ່ເປີດນຳໃຊ້ສູນຄວບຄຸມການເດີນລົດແລ້ວພະນັກງານຄວບຄຸມການຈັດສົ່ງສາມາດດຳເນີນການອອກຄຳສັ່ງຕ່າງໆເທິງໜ້າຈໍຄອມພິວເຕີໄດ້ສາມາດສັ່ງໃຫ້ຂະບວນລົດໄຟແລ່ນໄປຂ້າງໜ້າ ແລະມາຮອດສະຖານີ, ໝາຍເລກລົດໄຟ, ໄລຍະການແລ່ນ, ການແລ່ນໃນແຕ່ລະຊ່ວງລວມເຖິງການກຳນົດຄວາມໄວຂອງລົດໄຟ, ສ້າງຄໍາສັ່ງການແລ່ນລົດໄຟໃຫ້ໂປ່ງໃສສອດຄ່ອງກັບເວລາຕົວຈິງ ແລະຄວບຄຸມການດໍາເນີນງານຂອງລົດໄຟແບບລວມສູນ, ເພື່ອຮັບປະກັນອຳນາດການສັ່ງການຂອງລະບົບຂົນສົ່ງແຕ່ລະດັບຂອງລົດໄຟໃຫ້ມີຄວາມເປັນເອກະພາບ, ມີບົດບາດສໍາຄັນ, ຮັບປະກັນການຂົນສົ່ງທາງລົດໄຟ, ຄວາມປອດໄພ ແລະການດໍາເນີນງານທາງລົດໄຟທີ່ມີປະສິດທິພາບ.

   ອາຄານສູນຄວບຄຸມການເດີນລົດແຫ່ງນີ້ລວມມີ 3 ຊັ້ນ, ມີຄວາມສູງ 15 ແມັດ, ພື້ນທີ່ທັງໝົດຂອງອາຄານ 5379.38 ແມັດກາເລ, ພາກສ່ວນວຽກງານການກໍ່ສ້າງ ແລະຕິດຕັ້ງວິສາວະກຳໄຟຟ້າແຮງຕໍ່າແມ່ນບໍລິສັດການໄຟຟ້າທາງລົດໄຟ ສປ ຈີນ ເປັນຜູ້ຮັບຜິດຊອບດຳເນີນການກໍ່ສ້າງ,ສ່ວນຕົວອາຄານແມ່ນກຸ່ມບໍລິສັດກໍ່ສ້າງທາງລົດໄຟ ສປ ຈີນ ຈຳກັດ ເປັນຜູ້ຮັບຜິດຊອບດຳເນີນການກໍ່ສ້າງ.

   ສູນບັນຊາການນີ້ໄດ້ມີການຈັດສັນພື້ນທີ່ໄວ້ສຳລັບການເຮັດວຽກໄດ້ຫຼາຍໜ່ວຍງານເປັນຕົ້ນແມ່ນຫ້ອງຄຸມເຊີຟ໌ເວີດ້ານສັນຍານ, ດ້ານການສື່ສານ, ດ້ານຂໍ້ມູນຂ່າວສານ, ຫ້ອງຄວບຄຸມໃຫຍ່, ຫ້ອງບໍລິຫານການດຳເນີນງານບຳລຸງຮັກສາ ແລະຍັງເປັນ “ເປັນສູນລວມຄັງສະໝອງ” ຢ່າງແທ້ຈິງຂອງທາງລົດໄຟ ລາວ-ຈີນ, ນອກຈາກນີ້ຍັງເປັນອາຄານອັດສະລິຍະແບບກວມລວມທີ່ຈະໄດ້ເປີດນຳໃຊ້ເປັນຄັ້ງທຳອິດໃນທາງລົດໄຟ ລາວ-ຈີນ.

แชร์