JDB ມອບກຳລັງໃຈນັກຮົບຊຸດຂາວ 200 ລ້ານກີບ

ຂ່າວ: ພະນອມໄພ

 ທະນາຄານຮ່ວມພັດທະນາ ຫຼື JDB ເປັນທະນາຄານທຸລະກິດທີ່ໄດ້ຮັບຄວາມເຊື່ອໝັ້ນ ແລະໄວ້ວາງໃຈຈາກສັງຄົມ, ຄຽງຄູ່ກັບການບໍລິການທີ່ທັນສະໄໝ, ເພື່ອຕອບສະໜອງຄວາມຕ້ອງການລູກຄ້າຂອງຕົນເພື່ອຮັກສາຖານລູກຄ້າເກົ່າໄວ້ ແລະເປີດກວ້າງຂະຫຍາຍຖານລູກຄ້າໃໝ່ໃຫ້ກວ້າງຂວາງ, ນອກຈາກຄວາມມຸ້ງໝັ້ນໃນການເຄື່ອນໄຫວທຸລະກິດແລ້ວຍັງໃຫ້ຄວາມສໍາຄັນກ່ຽວກັບການປະກອບສ່ວນຊ່ວຍເຫຼືອສັງຄົມ, ໂດຍສະເພາະແມ່ນການຕ້ານ ແລະສະກັດກັ້ນການລະບາດຂອງພະຍາດໂຄວິດ-19, ທີ່ເກີດຂຶ້ນໃນໄລຍະຜ່ານມາຈົນຮອດປະຈຸບັນ, ທາງແພດໝໍນັກຮົບຊຸດຂາວພວມປະເຊີນໜ້າຕໍ່ສູ້ຕ້ານກັບການແຜ່ລະບາດຂອງພະຍາດທີ່ເກີດຂຶ້ນພາຍໃນນະຄອນຫຼວງວຽງຈັນ.

   ໃນວັນທີ 19 ຕຸລາ 2021 ທີ່ໂຮງໝໍເສດຖາທິຣາດ ນະຄອນຫຼວງວຽງຈັນ ທ່ານ ວິໄລ ສີພະພອນ ຜູ້ອຳນວຍການໃຫຍ່ທະນາຄານຮ່ວມພັດທະນາ (JDB) ພ້ອມດ້ວຍທ່ານ ຄໍາຫຼ້າ ໂຫລານຸພາບ ຮອງຫົວໜ້າຫ້ອງການທະນາຄານຮ່ວມພັດທະນາໄດ້ນໍາເອົາເງິນສົດຈໍານວນ 20 ລ້ານກີບ ໄປມອບໃຫ້ໂຮງໝໍເສດຖາທິລາດ, ກ່າວຮັບໂດຍ ທ່ານ ດຣ. ຫວັງນະຄອນ ດິດຕະພົງ ຫົວໜ້າອໍານວຍການໂຮງໝໍເສດຖາທິຣາດ.

   ຈາກນັ້ນ ໃນວັນທີ 20 ຕຸລາ 2021 ທີ່ສໍານັກງານໃຫຍ່ທະນາຄານຮ່ວມພັດທະນາການມອບຮັບເງິນສົດໃຫ້ສູນປິ່ນປົວອີກ 18 ສູນປິ່ນປົວ, ສູນລະ 10 ລ້ານກີບ ເພື່ອສະໜັບສະໜູນອ້າຍນ້ອງແພດໝໍທີ່ປະຈໍາຢູ່ສູນປິ່ນປົວໂຄວິດ-19 ຕ່າງໆ ຄື: ສູນປິ່ນປົວໂຮງໝໍມິດຕະພາບ 150 ຕຽງ, ສູນປິ່ນປົວໂຮງໝໍ 103, ໂຮງໝໍສະໜາມກີລາຫ້ວຍຫົງ, ໂຮງໝໍສະໜາມຫຼັກ 27, ໂຮງໝໍສະໜາມລ້ານຊ້າງ, ໂຮງໝໍສະໜາມ ມຊ, ໂຮງໝໍເມືອງປາກ ງື່ມ, ໂຮງໝໍສະໜາມ ມຕ ສີເກີດ, ໂຮງໝໍ ສະໜາມໂຮງງານ Trio, ໂຮງໝໍສະໜາມປະຖົມຜາງແຫ້ງ, ໂຮງໝໍສະໜາມດາວເຮືອງ, ສູນໂຮງຮຽນຄົນພິການສີເກີດ, ໂຮງໝໍສະໜາມໂຮງງານເວັນເຈີ, ໂຮງໝໍສະໜາມຄ້າຍຄຸມຂັງເມືອງນາຊາຍທອງ,ໂຮງໝໍສະໜາມຄ້າຍຄຸມຂັງນາໄຫ-ນາໂນ, ໂຮງໝໍສະໜາມບ້ານພັກວັງຊັບ ເມືອງສີໂຄດຕະບອງ, ໂຮງໝໍສະໜາມເຮືອນພັກແສງເພັດ ເມືອງສີໂຄດຕະບອງ, ໂຮງໝໍສະໜາມ ໂຮງແຮມຈະເລີນຮຸ່ງ ເມືອງຈັນທະບູລີ ລວມມູນຄ່າຊ່ວຍເຫຼືອຄັ້ງນີ້ 200 ລ້ານກີບ, ຊຶ່ງມີຜູ້ຕາງໜ້າຈາກແຕ່ລະສູນປິ່ນປົວມາຮັບດ້ວຍຕົວເອງ, ເພື່ອເປັນການປະກອບສ່ວນຊຸກຍູ້ແພດໝໍທີ່ປະຈໍາຢູ່ແຕ່ລະສູນປິ່ນປົວໃຫ້ມີກໍາລັງໃຈໃນການປະຕິບັດໜ້າທີ່ຂອງຕົນໂດຍສະເພາະແມ່ນຊຸກຍູ້ ວຽກງານການປິ່ນປົວ ແລະສະກັດກັ້ນການແຜ່ລະບາດຂອງພະຍາດໂກວິດ-19 ທີ່ພວມລະບາດເປັນວົງກ້ວາງໃນຫຼາຍຕົວເມືອງຢູ່ນະຄອນຫຼວງວຽງຈັນ.

   ຕາງໜ້າສູນປິ່ນປົວແຕ່ລະສູນກໍ່ໄດ້ສະແດງຄວາມຂອບໃຈ ແລະຮູ້ບຸນຄຸນມາຍັງທ່ານ ວິໄລ ສີພະພອນ ຜູ້ອໍານວຍການໃຫຍ່ທະນາຄານຮ່ວມພັດທະນາ ແລະທ່ານ ເອກະພັນ ພະພິທັກ ປະທານສະພາບໍລິຫານທະນາຄານຮ່ວມພັດທະນາ, ອວຍພອນໃຫ້ທຸລະກິດຂອງທະນາຄານຮ່ວມພັດທະນາໃຫ້ມີຄວາມຈະເລີນຮຸງເຮືອງຂຶ້ນໄປເລື້ອຍມີສ່ວນຮ່ວມໃນການຊ່ວຍເຫຼືອສັງຄົມຕະຫຼອດໄປ.

แชร์