ໄຊສົມບູນເຊັນສັນຍາສ້າງສະຖານີວິທະຍຸ-ໂທລະພາບແຂວງ

ຂ່າວ: ພາພອນ ນະວົງໄຊ

   ພິທີເຊັນສັນຍາໂຄງການກໍ່ສ້າງສະຖານີວິທະຍຸ-ໂທລະພາບ ແຂວງໄຊສົມບູນ ຮ່ວງທຶນສົມທົບຂອງລັດຖະບານລາວລະຫວ່າງພະແນກຖະແຫຼງຂ່າວ, ວັດທະນະທໍາ ແລະທ່ອງທ່ຽວ(ຖວທ) ແຂວງກັບບໍລິສັດກໍ່ສ້າງໂກເອກໂກ (COECCO) ລາວຈຳກັດຜູ້ດຽວໄດ້ຈັດຂຶ້ນໃນວັນທີ 18 ຕຸລານີ້ ທີ່ຫ້ອງປະຊຸມພະແນກ ຖວທ ແຂວງ ໂດຍການເຂົ້າຮ່ວມຂອງ ທ່ານ ທົງສະຫວັນ ໂພສະລາດ ຮັກສາການຫົວໜ້າພະແນກ ຖວທ ແຂວງ, ມີທ່ານ ຫງວຽນດິ່ງລິວ ຜູ້ອໍານວຍການໂຮງງານ 10 ທີ່ຂຶ້ນກັບບໍລິສັດກໍ່ສ້າງໂກເອກໂກ (COECCO) ລາວ ຈຳກັດຜູ່ດຽວ ພ້ອມດ້ວຍຄະນະຮັບຜິດຊອບໂຄງການກໍ່ສ້າງສະຖານີວິທະຍຸ-ໂທລະພາບແຂວງໄຊສົມບູນ ແລະພາກສ່ວນກ່ຽວຂ້ອງເຂົ້າຮ່ວມເປັນສັກຂີພິຍານ.

   ທ່ານ ສົມດາວີ ຄໍາເມືອງຄູນ ຮອງຫົວໜ້າພະແນກ ຖວທ ແຂວງໄດ້ຂຶ້ນຜ່ານເນື້ອໃນສັນຍາຮັບເໝົາໂຄງການກໍ່ສ້າງສະຖານີວິທະຍຸ-ໂທລະພາບ ແຂວງໄຊສົມບູນ ຮ່ວງທຶນສົມທົບຂອງລັດຖະບານລາວ ໃນຈໍານວນ 1,7 ຕື້ກີບ; ຊຶ່ງໃນນີ້ໄດ້ກໍານົດສິດ, ໜ້າທີ່ ແລະພັນທະຕ່າງໆຂອງຄູ່ຮ່ວມສັນຍາ, ໂດຍບໍລິສັດຕ້ອງປະຕິບັດບັນດາໜ້າວຽກຄື: ສ້າງສວນດອກໄມ້ໃນມູນຄ່າ 864,49 ລ້ານກີບ; ຈັດຊື້ອຸປະກອນ ແລະພາຫະນະຮັບໃຊ້ ຈໍານວນ 512,47 ລ້ານກີບ; ຝຶກອົບຮົມພະນັກງານຄຸ້ມຄອງໂຄງການ ຈໍານວນ 128,37 ລ້ານກີບ; ຝຶກອົບຮົມພະນັກງານເຕັກນິກເຄື່ອງສົ່ງ ແລະໂຄສົກ ຈໍານວນ 48 ລ້ານກີບ; ຖອດຖອນບົດຮຽນ ຈໍານວນ 16,76 ລ້ານກີບ; ມູນຄ່າຄຸ້ມຄອງໂຄງການ ຈໍານວນ 25,3 ລ້ານກີບ ແລະໃຊ້ຈ່າຍອື່ນໆ ຈໍານວນ 183,6 ລ້ານກີບ ພາຍຫຼັງສໍາເລັດການເຊັນສັນຍາຮ່ວມກັນແລ້ວບໍລິສັດຕ້ອງດໍາເນີນ ການກໍ່ສ້າງໜ້າວຽກຕ່າງໆໃຫ້ສໍາເລັດພາຍໃນເດືອນທັນວາ 2021 ນີ້.

   ໂອກາດນີ້ ທ່ານ ທົງສະຫວັນ ໂພສະລາດ ໄດ້ມີຄໍາເຫັນຕໍ່ພິທີຊຶ່ງທ່ານໄດ້ຍົກໃຫ້ເຫັນເຖິງຄວາມໝາຍສໍາຄັນຂອງໂຄງການດັ່ງກ່າວຊຶ່ງເປັນໂຄງການຮ່ວມມືລະຫວ່າງສອງປະເທດກໍ່ຄືສາຍພົວພັນຮ່ວມມືແບບພິເສດຂອງສອງຊາດລາວ-ຫວຽດນາມ ທີ່ມີຕໍ່ກັນຕະຫຼອດມາ, ນອກນັ້ນຍັງມີຄວາມສໍາຄັນຕໍ່ບົດບາດການໂຄສະນາແນວທາງນະໂຍບາຍຂອງພັກ-ລັດລົງສູ່ມວນຊົນໃຫ້ທົ່ວເຖິງສະນັ້ນ, ຮຽກຮ້ອງໃຫ້ທຸກພາກສ່ວນຈົ່ງເອົາໃຈໃສ່ໃນການຕິດຕາມກວດກາການກໍ່ສ້າງບັນດາໜ້າວຽກຕ່າງໆ ໃຫ້ຖືກຕ້ອງຕາມຫຼັກການ, ເຕັກນິກ ແລະໃຫ້ສໍາເລັດຕາມແຜນການທີ່ວາງໄວ້.

   ຈາກນັ້ນ, ທັງສອງຝ່າຍກໍ່ໄດ້ເຊັນສັນຍາຮ່ວມກັນລະຫວ່າງທ່ານ ທົງສະຫວັນ ໂພສະລາດ ຮັກສາການຫົວໜ້າພະແນກ ຖວທ ແຂວງ (ເຈົ້າຂອງໂຄງການ) ແລະທ່ານ ຫງວຽນດິ່ງລິວ ອໍານວຍການໂຮງງານ 10 (ບໍລິສັດຮັບເໝົາກໍ່ສ້າງ) ໂດຍຊ້ອງໜ້າຄະນະຮັບຜິດຊອບໂຄງການກໍ່ສ້າງສະຖານີວິທະຍຸ-ໂທລະພາບ ແຂວງໄຊສົມບູນ ແລະບໍລິສັດເຂົ້າຮ່ວມເປັນສັກຂີພິຍານ.

แชร์