ຈຳປາ ຮັກສາຄວາມປອດໄພເນັ້ນຄຸນນະພາບບໍລິການລູກຄ້າ

ຂ່າວ:  ໂພທິລາດ

   ບໍລິສັດ ຈໍາປາ ຮັກສາຄວາມປອດໄພ ຈໍາກັດ ໄດ້ເນັ້ນໜັກແກ່ພະນັກງານທີ່ເຮັດໜ້າທີ່ບໍລິການເວນຍາມໃຫ້ກັບລູກຄ້າໃນທົ່ວແຂວງຈໍາປາສັກໃຫ້ມີສະຕິສູງໃນການປົກຮັກສາສັບສິນຂອງລູກຄ້າຢ່າງເຂັ້ມງວດ ແລະເອົາຈີງເອົາຈັງໃນໄລຍະທີ່ບ້ານເມືອງກໍາລັງປະເຊີນກັບບັນຫາການແຜ່ລະບາດຂອງເຊື້ອພະຍາດໂຄວິດ-19 ຊຶ່ງອາດມີອາສະຍາກອນສວຍໂອກາດເພີ່ມຂຶ້ນ.

  ທ່ານ ພັທ ພີລະວັນ ພີມມະສີນ ຜູ້ອໍານວຍການບໍລິສັດ ຈໍາປາ ຮັກສາຄວາມປອດໄພ ຈໍາກັດ, ໄດ້ໃຫ້ສໍາພາດຕໍ່ນັກຂ່າວໜັງສືພິມເສດຖະກິດ-ສັງຄົມ ເມື່ອບໍ່ດົນມານີ້ໃຫ້ຮູ້ວ່າ: ຈໍາປາຮັກສາຄວາມປອດໄພແມ່ນບໍລິສັດທໍາອິດຂອງແຂວງຈໍາປາສັກ ທີ່ໄດ້ມີການຮ່ວມມືກັນລະຫວ່າງ ປກສ ແຂວງຈໍາປາສັກ ແລະພາກເອກະຊົນພາຍໃນແຂວງເພື່ອເປີດໃຫ້ບໍລິການຮັກສາຄວາມປອດໄພ, ຊຶ່ງແມ່ນຂອດບໍລິການຮັບໃຊ້ສັງຄົມຕາມຫົວໜ້າທຸລະກິດໄປຄຽງຄູ່ກັບການບໍລິຫານສັງຄົມ ແລະ ຍັງເປັນການຊ່ວຍເຫຼືອໃຫ້ແກ່ພາກລັດໃນການປ້ອງກັນຄວາມສະຫງົບ, ຮັກສາຄວາມເປັນລະບຽບຮຽບຮ້ອຍຕາມສະຖານທີ່ຕ່າງໆທີ່ໄດ້ເຄື່ອນໄຫວເຮັດໜ້າທີ່ເວນຍາມທັງພາຍໃນແຂວງ ແລະຕ່າງແຂວງ, ທັງເປັນກໍາລັງສໍາຮອງໃຫ້ແກ່ກໍາລັງປະກອບອາວຸດ, ຜ່ານການຈັດຕັ້ງປະຕິບັດຜ່ານມາເຫັນວ່າສັງຄົມມີຄວາມຕ້ອງການຫຼາຍດ້ານການຮັກສາ ຄວາມປອດໄພເນື່ອງຈາກວຽກງານດັ່ງກ່າວມັນຕິດພັນກັບການພັດທະນາເສດຖະກິດ-ສັງຄົມ.

   ຢ່າງໃດກໍ່ຕາມໃນຊ້ວງໄລຍະ 2-3 ປີຜ່ານມານີ້ເຫັນວ່າມີຄວາມຫຍຸ້ງຍາກຫຼາຍເນື່ອງຈາກມີການແຜ່ລະບາດຂອງເຊື້ອພະຍາດໂຄວິດ-19, ຊຶ່ງໄດ້ສ້າງຜົນກະທົບຕໍ່ຂົງເຂດບໍລິການເຮັດໃຫ້ບັນດາຫົວໜ້າທຸລະກິດ ແລະ ບັນດາຫ້າງຮ້ານຕ່າງໆ ບໍ່ມີລາຍຮັບໄດ້ຢຸດໂຈະການໃຊ້ບໍລິການເວນຍາມນໍາບໍລິສັດ, ໂດຍສະເພາະແມ່ນຂົງເຂດວຽກງານບໍລິການ, ນອກຈາກນີ້ຍັງສ້າງຄວາມຫຍຸ້ງຍາກໃນການເຄື່ອນໄຫວໜ້າທີ່ຂອງກໍາລັງອ້າຍນ້ອງເວນຍາມ, ດັ່ງນັ້ນຈຶ່ງເຮັດໃຫ້ລູກຄ້າມີລັກສະນະຫຼຸດລົງ, ສໍາລັບໃນ 8-9 ເດືອນປີ 2021 ຜ່ານມານີ້ແມ່ນເຫັນວ່າຍິ່ງໄດ້ຮັບຜົນກະທົບຫຼາຍເຮັດໃຫ້ຈໍານວນລູກຄ້າໂຈະສັນຍາຫຼາຍຂຶ້ນ ແລະ ສ້າງຜົນກະທົບຕໍ່ທຸລະກິດຫຼຸດລົງ 20-30%.

   ທ່ານຜູ້ອໍານວຍການກ່າວຕື່ມວ່າ: ຕໍ່ກັບບັນຫາດັ່ງກ່າວເພື່ອເຮັດໃຫ້ລູກຄ້າມີຄວາມໝັ້ນໃຈໃນການໃຊ້ບໍລິການທາງບໍລິສັດແມ່ນໄດ້ເນັ້ນໜັກຕໍ່ພະນັກງານເວນຍາມໃຫ້ເອົາໃຈໃສ່ຕໍ່ການປົກປັກຮັກສາຊັບສິນຂອງລູກຄ້າຫຼາຍຂຶ້ນກວ່າເກົ່າ, ໂດຍເນັ້ນບໍ່ໃຫ້ຖືກເບົາຕໍ່ການປະຕິບັດໜ້າທີ່ພ້ອມໄດ້ມີການປ່ຽນກະເວນຍາມຢ່າງເປັນປົກກະຕິເພື່ອຫຼີກລ່ຽງການກໍ່ອາດສະຍາກອນທີ່ເຫັນວ່າມີນັບມືຫຼາຍຂຶ້ນ,ສໍາລັບລູກຄ້າທ່ານໃດທີ່ສົນໃຈໃຊ້ບໍລິການນໍາບໍລິສັດຈໍາປາຮັກສາຄວາມປອດໄພ ຈໍາກັດ ກໍ່ສາມາດຕິດຕໍ່ພົວພັນໄດ້ທີ່ສໍານັກງານໃຫຍ່ຕັ້ງຢູ່ບ້ານພັດທະນາຫຼັກ 7 ນະຄອນປາກເຊ ແຂວງຈໍາປາສັກ.

แชร์