ສະພາປະຊາຄົມເສດຖະກິດອາຊຽນຮັບຮອງ 29 ເອກະສານ

   ທ່ານ ຄໍາແພງ ໄຊສົມແພງ ລັດຖະມົນຕີກະຊວງອຸດສາຫະກໍາ ແລະການຄ້າ (ອຄ) ທັງເປັນລັດຖະມົນຕີສະພາປະຊາຄົມເສດຖະກິດອາຊຽນຂອງ ສປປ ລາວ ໄດ້ນຳພາຄະນະຜູ້ແທນ ສປປ ລາວ ເຂົ້າຮ່ວມກອງປະຊຸມທາງໄກສະພາປະຊາຄົມເສດຖະກິດອາຊຽນ ຄັ້ງທີ 20 ໃນວັນທີ 18 ຕຸລານີ້ ພາຍໃຕ້ການເປັນປະທານຂອງທ່ານ Dato Dr Amin Abdullah ລັດຖະມົນຕີປະຈໍາສໍານັກງານນາຍົກລັດຖະມົນຕີທັງເປັນລັດຖະມົນຕີກະ​ຊວງການເງິນ ແລະ ເສດຖະກິດຂອງບຣູໄນໃນຖານະປະທານໝູນວຽນອາ ຊຽນໃນປີ 2021 ໂດຍມີບັນດາລັດຖະມົນຕີສະພາປະຊາຄົມເສດຖະກິດອາຊຽນ, ບັນດາລັດຖະມົນຕີດີຈີຕອລອາຊຽນ ແລະເລຂາທິການໃຫຍ່ອາຊຽນເຂົ້າຮ່ວມ.
 ກອງປະຊຸມໄດ້ປຶກສາຫາລືກ່ຽວກັບການຮ່ວມມືໃນວຽກງານການຫັນເປັນດີຈີຕອລຂອງອາຊຽນ, ແຜນວຽກບູລິມະສິດຂອງເສົາຄໍ້າເສດຖະກິດພາຍໃຕ້ການເປັນປະທານອາຊຽນຂອງບຣູໄນ ປີ 2021, ບົດລາຍງານທົບທວນກາງສະໄໝການຈັດຕັ້ງປະຕິບັດແຜນແມ່ບົດປະຊາຄົມເສດຖະກິດອາຊຽນ 2025, ການສ້າງແຜນວິໄສທັດປະຊາຄົມອາຊຽນພາຍຫຼັງ ປີ 2025 ແລະກະກຽມບັນດາເອກະສານທີ່ກ່ຽວຂ້ອງພາຍໃຕ້ເສົາຄໍ້າເສດຖະກິດອາຊຽນເພື່ອນໍາສະເໜີຕໍ່ກອງປະຊຸມສຸດຍອດອາຊຽນຄັ້ງທີ 38 ແລະ 39 ພິຈາລະນາຊຶ່ງຈະຈັດຂຶ້ນໃນລະຫວ່າງວັນທີ 26-28 ຕຸລາ 2021.
   ໃນການເຂົ້າຮ່ວມກອງປະຊຸມຄັ້ງນີ້, ທ່ານ ຄໍາແພງ ໄຊສົມແພງ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນສໍາເລັດທີ່ຍາດມາໄດ້ໃນການຈັດຕັ້ງປະຕິບັດໃນຫຼາຍແຜນວຽກບູລິມະສິດພາຍໃຕ້ເສົາຄໍ້າເສດຖະກິດ ແລະ ເນັ້ນເຖິງຄວາມສໍາຄັນຂອງການສ້າງປະຊາຄົມເສດຖະກິດອາຊຽນປີ 2025 ໂດຍສະເພາະສ້າງໃຫ້ອາຊຽນກາຍເປັນພາກພື້ນທີ່ມີຄວາມເຂັ້ມແຂງ ແລະສາມາດໝູນໃຊ້ເຕັກໂນໂລຊີນະວັດຕະກໍາທີ່ທັນສະໄໝ ເພື່ອກ້າວໄປສູ່ການຫັນເປັນເສດຖະກິດດີຈີຕອລເທື່ອລະກ້າວ. ພ້ອມກັນນັ້ນ, ກໍໄດ້ເນັ້ນເຖິງຄວາມສໍາຄັນຂອງການທົບທວນກາງສະໄໝແຜນແມ່ບົດປະຊາຄົມເສດຖະກິດອາຊຽນທີ່ໄດ້ຮັບການຈັດຕັ້ງປະຕິບັດສໍາເລັດຕາມເປົ້າໝາຍໂດຍສະເພາະຕິດພັນກັບວຽກງານການສົ່ງເສີມ ແລະອໍານວຍຄວາມສະດວກດ້ານການລົງທຶນໃນອາຊຽນ, ການປັບປຸງກົນໄກການຕິດຕາມການຈັດຕັ້ງປະຕິບັດສັນຍາເສດຖະກິດອາຊຽນ, ການສ້າງຂອບວຽກເພື່ອຈັດຕັ້ງປະຕິບັດສັນຍາການຄ້າດ້ານເອເລັກໂຕຣນິກອາຊຽນ, ການສົ່ງເສີມຕ່ອງໂສ້ມູນຄ່າເພີ່ມໃນພາກພື້ນ ແລະການກ້າວໄປສູ່ການພັດທະນາ ແບບເທົ່າທຽມ, ຮອບດ້ານ ແລະຍືນຍົງໃນອາຊຽນ.
  ໃນກອງປະຊຸມຄັ້ງນີ້ລັດຖະມົນຕີສະພາປະຊາຄົມເສດຖະກິດອາຊຽນໄດ້ຮັບຊາບ ແລະຮັບຮອງເອົາ 29 ເອກະສານ ເປັນຕົ້ນບົດລາຍງານຂອງສະພາປະຊາຄົມເສດຖະ ກິດອາຊຽນຕໍ່ກອງປະຊຸມສຸດຍອດອາຊຽນ ຄັ້ງທີ 38 ແລະ 39, ເອກະສານຂອບວຽກວ່າດ້ວຍເສດຖະກິດໝູນວຽນສໍາລັບປະຊາຄົມເສດຖະກິດອາຊຽນ, ແຜນ Bandar Seri Begawan ວ່າດ້ວຍວາລະການຫັນເປັນດີຈີຕອນອາຊຽນເພື່ອເລັ່ງການຟື້ນຟູເສດຖະກິດທີ່ໄດ້ຮັບຜົນກະທົບຈາກການລະບາດຂອງພະຍາດໂຄວິດ-19 ແລະການເຊື່ອມໂຍງເສດຖະກິດດີຈີຕອນອາຊຽນ, ເອກະສານຂອບວຽກການຮ່ວມມືອາຊຽນເພື່ອສ້າງຄວາມເຂັ້ມແຂງດ້ານນະໂຍບາຍຂອງຈຸນລະວິສາຫະກິດ, ວິສາຫະກິດຂະໜາດນ້ອຍ ແລະກາງ.
(ຂ່າວ-ພາບ: ສຳນານ)

แชร์