ຮ່ວມໃຈສາຍໄຍໂລມາຄຳ ຊຸກຍູ້ໜ່ວຍກູ້ໄພສະຫວັນນະເຂດ

   ໂຄງການຮ່ວມໃຈສາຍໄຍໂລມາຄຳ ເປັນອີກໜຶ່ງໂຄງການດີໆ ທີ່ໄດ້ສືບຕໍ່ຊ່ວຍເຫຼືອສັງຄົມຢ່າງຕໍ່ເນື່ອງຊຶ່ງມາໃນວັນທີ 15 ຕຸລາຜ່ານມານີ້, ທາງໂຄງການກໍ່ໄດ້ນຳເອົາເຄື່ອງຊ່ວຍເຫຼືອພ້ອມດ້ວຍເງິນສົດຈຳນວນໜຶ່ງໄປມອບອຸປະຖຳໃຫ້ແກ່ມູນນິທິອາສາຊ່ວຍເຫຼືອຜູ້ປະສົບໄພສະຫວັນນະເຂດ (ໜ່ວຍກູ້ໄພສະຫວັນນະເຂດ1629) ຢູ່ທີ່ສູນກູ້ໄພດັ່ງກ່າວ.
  ເຄື່ອງທີ່ນຳໄປຊ່ວຍເຫຼືອໃນຄັ້ງນີ້ປະກອບມີ: ເງິນສົດຈຳນວນ 15 ລ້ານກີບ, ເຫຼົ້າຂ້າເຊື້ອ+ຜ້າປິດປາກ-ດັງ, ເຂົ້າໜົມ, ນໍ້າດື່ມ 100 ແພັກ, ລວມມູນຄ່າທັງໝົດ 20 ລ້ານກີບ ທັງນີ້ກໍ່ເພື່ອປະກອບສ່ວນຊ່ວຍເຫຼືອໃນການເຄື່ອນໄຫວວຽກງານຂອງໜ່ວຍກູ້ໄພສະຫວັນນະເຂດໂດຍສະເພາະໃນຊ່ວງທີ່ມີການແຜ່ລະບາດຂອງພະຍາດໂຄວິດ-19.
 ຊຶ່ງຕາງໜ້າຮັບໂດຍທ່ານ ບຸດດີ ບຸບຜາລາສີ ຮອງປະທານມູນນິທິອາສາຊ່ວຍເຫຼືອຜູ້ປະສົບໄພສະຫວັນນະເຂດ ແລະ ມອບໂດຍຕາງໜ້າໂຄງການຮ່ວມໃຈສາຍໄຍໂລມາຄຳ.
   ໂອກາດນີ້, ທາງມູນນິທິກໍ່ໄດ້ມອບໃບກຽດຕິຄຸນໃຫ້ທ່ານ ເກຍ ອູ໊ສິດທິເດດ ແລະທ່ານ ສາຍສະໝອນ ກວານເມືອງຈັນ ເຈົ້າຂອງໂຄງການຮ່ວມໃຈສາຍໄຍໂລມາຄຳທີ່ໄດ້ໃຫ້ການສະໜັບສະໜູນ ແລະເຫັນໄດ້ຄວາມສຳຄັນໃນວຽກງານຊ່ວຍເຫຼືອສັງຄົມຂອງໜ່ວຍກູ້ໄພສະຫວັນນະເຂດ.

แชร์