ປີແລ້ວບໍ່ແກ້ວມ້າງຄະດີຢາເສບຕິດໄດ້ 300 ກວ່າເລື່ອງ

ຂ່າວ: ຄຳພັນ ແກ້ວມະນີ

   ວັນທີ 15 ຕຸລາ 2021 ທີ່ ເມືອງຫ້ວຍຊາຍ ແຂວງບໍ່ແກ້ວ ໄດ້ມີພິທີສະເຫຼີມສະຫຼອງວັນແຫ່ງຊາດຕ້ານ (ຢສຕ) ຄົບຮອບ 20 ປີ ແລະທໍາລາຍ ຢສຕ ທີ່ສານໄດ້ ຕັດສິນໃຊ້ໄດ້ຢ່າງເດັດຂາດໂດຍການເຂົ້າຮ່ວມຂອງທ່ານ ຄຳຜະຫຍາ ພົມປັນຍາ ຮອງເຈົ້າແຂວງໆ ບໍ່ແກ້ວປະທານຄະນະກຳມະການກວດກາ ແລະຄວບຄຸມ ຢສຕ ຂັ້ນ ແຂວງ,ມີການນຳຂັ້ນແຂວງ, ການນຳຂັ້ນເມືອງ,ແຂກຖືກເຊີນ, ພະນັກງານ,ທະຫານ, ຕຳຫຼວດ, ນັກທຸລະກິດ, ພໍ່ຄ້າຊາວຂາຍ, ອຳນາດການປົກຄອງບ້ານເຂົ້າຮ່ວມ.

ທ່ານ ພັນໂທ ຈັນພອນເພັດ ຄໍາສີ ຮອງຫົວໜ້າກອງບັນຊາການ ປກສ ແຂວງບໍ່ແກ້ວ ກ່າວວ່າ: ການສະເຫຼີມສະຫຼອງວັນແຫ່ງຊາດຕ້ານ ຢສຕ ຄົບຮອບ 20 ປີ ແລະທໍາລາຍ ຢສຕ ທີ່ສານໄດ້ຕັດສິນໃຊ້ໄດ້ຢ່າງເດັດຂາດ, ຢາເສບຕິດປະເພດຕ່າງໆໄດ້ກາຍເປັນໄພພິບັດລວມຊຶ່ງສົ່ງຜົນສະທ້ອນໂດຍກົງຕໍ່ເສດຖະກິດ-ສັງຄົມ, ຄວາມໝັ້ນຄົງຂອງລະບອບການເມືອງທັງເປັນການທຳລາຍຊາວໜຸ່ມ, ເຍົາວະຊົນ, ອານຸຊົນທີ່ເປັນໜໍ່ແໜງຂອງຊາດເມື່ອເຫັນໄດ້ຜົນຮ້າຍໄພອັນຕະລາຍດັ່ງນັ້ນລັດຖະບານເຮົາຈຶ່ງຖືເອົາວັນທີ 12 ຕຸລາ ຂອງທຸກໆປີເປັນວັນແຫ່ງຊາດຕ້ານຢາເສບຕິດ, ຊຶ່ງເລີ່ມຈັດຕັ້ງປະຕິບັດນັບແຕ່ວັນທີ 12 ຕຸລາ ປີ2001 ເປັນຕົ້ນມາປະຈຸບັນຄົບຮອບ 20 ປີພໍດີ,ຕະຫຼອດໄລຍະຜ່ານມາພວກເຮົາໄດ້ເອົາໃຈໃສ່ເຮັດວຽກງານປ້ອງກັນເປັນສິ່ງສຳຄັນໂດຍຖືເອົາການສຶກສາອົບຮົມ ແລະ ໂຄສະນາເຜີຍແຜ່ດ້ວຍຫຼາຍຮູບການຕ່າງໆ ເພື່ອປູກຈິດສຳນຶກໃຫ້ຄົນໃນສັງຄົມຮັບຮູ້,ເຂົ້າໃຈລະບຽບກົດໝາຍ ແລະເຫັນໄດ້ເຖິງພິດໄພ, ຜົນຮ້າຍຂອງຢາເສບຕິດພ້ອມນັ້ນໄດ້ເອົາໃຈໃສ່ປຸກລະດົມທັງພາກລັດ ແລະເອກະຊົນທັງພາຍໃນ ແລະຕ່າງປະເທດ, ບັນດາປະເທດເພື່ອນມິດ ເພື່ອສຸມໃສ່ປະຕິບັດໂຄງການພັດທະນາຊົນນະບົດປູກພືດທົດແທນເພື່ອຊ່ວຍປະຊາຊົນທີ່ເຄີຍປູກຝິ່ນໄດ້ມີເງື່ອນໄຂຫັນໄປປະກອບອາຊີບໃໝ່ທີ່ມີລາຍໄດ້ສໍາລັບການດຳລົງຊີວິດທີ່ໝັ້ນຄົງ ແລະເອົາໃຈໃສ່ຟື້ນຟູສະພາບ, ຈິດໃຈ ແລະຮ່າງກາຍຜູ້ຕິດຢາເສບຕິດຢູ່ສູນບຳບັດ, ຢູ່ເມືອງ, ຢູ່ບ້ານເຂດຊຸມຊົນຫ່າງໄກສອກຫຼີກທັງນຳໃຊ້ມາດຕະການທາງດ້ານວິຊາສະເພາະເຮັດໃຫ້ 1 ປີຜ່ານມາສາມາດມ້າງຄະດີຢາເສບຕິດໄດ້ທັງໝົດ 338 ເລື່ອງ, ກັກຜູ້ຖືກຫາໄດ້ທັງໝົດ 393 ຄົນ, ຍິງ 35 ຄົນ, ຕ່າງປະເທດ 67 ຄົນ (ຄົນຈີນ 29 ຄົນ, ມຽນມາ 36 ຄົນ, ໄທ 1 ຄົນ ແລະຄົນຫວຽດນາມ 1 ຄົນ) ຢຶດຂອງກາງຢາເສບຕິດປະເພດຕ່າງໆຄື:ຢາບ້າ: ຈຳນວນ 23,15 ລ້ານກວ່າເມັດ, ໜັກ 2.315 ກິໂລກຣາມ ຢາໄອ້: 866 ກິໂລກຣາມ ເຮໂລອິນ: 156 ແທ່ງ, ໜັກ 60 ກິໂລກຣາມ ແປ້ງຝຸ່ນ: 16.250 ກິໂລກຣາມຝືນ: 700 ກຣາມ ປືນສັ້ນຈຳນວນ 3 ກະບອກພ້ອມລູກ 22 ລູກລົດໃຫຍ່ 11 ຄົນ ລົດຈັກ 25 ຄົນ ແລະ ວັດຖຸເຄື່ອງຂອງອີກຈຳນວນຫຼາຍລາຍການ, ລົງທຳລາຍສວນຝິ່ນໄດ້ຈຳນວນ 24 ເຮັກຕາ ພ້ອມທັງລົງໂຄສະນາຜົນຮ້າຍ, ໄພອັນຕະລາຍຂອງຢາເສບຕິດຢູ່ໂຮງຮຽນຢູ່ຕາມບ້ານມີຜູ້ເຂົ້າຮ່ວມທັງໝົດ 1.559 ຄົນ, ຍິງ 494 ຄົນ ບຳບັດ ປິ່ນປົວ ແລະຟື້ນຟູສຸຂະພາບຜູ້ຕິດຢາເສບຕິດຢູ່ສູນບຳບັດນໍ້າຈ້ວມໄດ້ຈໍານວນ 155 ຄົນ, ຍິງ 6 ຄົນ.

   ສຳລັບການຈູດທຳລາຍຢາເສບຕິດປະເພດຕ່າງໆເຈົ້າໜ້າທີ່ຢຶດໄດ້ຈາກການລັກລອບຄ້າ-ຂາຍ ແລະລຳລຽງຂົນສົ່ງຂອງພວກກຸ່ມຄົນບໍ່ດີທີ່ສານໄດ້ຕັດສິນເດັດຂາດແລ້ວ ແລະມີຂໍ້ຕົກລົງໃຫ້ທຳລາຍຖິ້ມ: ມີຢາບ້າ: ຈຳນວນ 13,62 ລ້ານເມັດ, ໜັກ1.362 ກິໂລກຣາມ, ຢາໄອ້ຈຳນວນ 534 ຫໍ່, ໜັກ 534 ກິໂລກຣາມ, ເຮໂລອິນ ຈຳນວນ 156 ແຫ່ງ, ໜັກ 60 ກິໂລກຣາມ, ແປ້ງຝຸ່ນຈຳນວນ 158 ເປົ໋າ, ໜັກ 3.950 ກິໂລກຣາມ, ໂຄເຄນ ຈຳນວນ 2 ຖົງນ້ອຍ, ໜັກ 0,44 ກຣາມ ກັນ ຊາແຫ້ງ ຈຳນວນ 1 ຖົງນ້ອຍ, ໜັກ 8,6 ກຣາມ, ເຟຕິມີນ ຈຳນວນ 44 ເມັດ, ໜັກ 13,2 ກຣາມ,  ຢາອີ ຈຳນວນ 2 ຖົງນ້ອຍ, 2,619 ກຣາມ.

  ສະນັ້ນຂໍຮຽກຮ້ອງ ແລະເຊີນຊວນບັນດາທ່ານພະນັກງານ, ທະຫານ, ຕຳຫຼວດ, ພໍ່ແມ່ປະຊາຊົນບັນດາເຜົ່າຈົ່ງໄດ້ເພີ່ມທະວີສະຕິລະວັງຕົວພ້ອມທັງເປັນເຈົ້າການໃນການສຶກສາອົບຮົມລູກຫຼານຂອງຕົນເພື່ອບໍ່ໃຫ້ຕົກເປັນທາດຢາເສບຕິດ, ຈົ່ງພ້ອມກັນປະຕິບັດ ຄຳຂັວນທີ່ວ່າຢາເສບຕິດໃຫ້ຄວາມຕາຍ, ຜູ້ເສບຕາຍ, ຜູ້ຂາຍຕິດຄຸກຜູ້ ທຸກໃຈແມ່ນພໍ່, ແມ່ ແລະຜູ້ປົກຄອງ.

แชร์