ໃຊ້ເກືອບ 7 ຕື້ ສ້າງຂົວເຊສະໝູນ ສຳເລັດ 63%

ເມືອງເຊໂປນ ແຂວງສະຫວັນນະເຂດ ໄດ້ຮັບທຶນຊ່ວຍເຫຼືອຈາກລັດຖະບານເຢຍລະມັນໃນການກໍ່ສ້າງຂົວເຊສະໜູນ ແລະໄດ້ມີການດຳເນີນງານມາແຕ່ປາຍປີແລ້ວຮອດປະຈຸບັນການຈັດຕັ້ງປະຕິບັດໂຄງການແມ່ນສຳເລັດ 63%. 

  ແນວໃດກໍ່ດີເພື່ອເປັນການປຶກສາຫາລື ແລະວາງແຜນການກໍ່ສ້າງເພື່ອໃຫ້ບັນລຸຕາມແຜນການທີ່ວາງໄວ້ເມື່ອບໍ່ດົນມານີ້ໄດ້ມີການຈັດກອງປະຊຸມການປຶກສາຫາລືການຈັດຕັ້ງປະຕິບັດໂຄງການພັດທະນາຊົນນະບົດໄລຍະ 1 ຢູ່ສະໜາມກໍ່ສ້າງຂົວເຊສະໝູນໂດຍການເຂົ້າຮ່ວມຂອງ ທ່ານ ວົງສະຫວັນ ວຽງມະນີ ເຈົ້າເມືອງເຊໂປນ, ມີຕາງໜ້າພະແນກ ຍທຂ ແຂວງ, ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ. 

ທ່ານ ເສີມຄຳ ຈັນທະວົງ ຫົວໜ້າໂຄງການພັດທະນາຊົນນະບົດໄລຍະ 1 ໄດ້ລາຍງານໃຫ້ຮູ້ວ່າ: ເມືອງເຊໂປນ ໄດ້ຮັບທຶນຊ່ວຍເຫຼືອຈາກລັດຖະບານປະເທດເຢຍລະມັນໂດຍຜ່ານທະນາຄານເພື່ອການພັດທະນາ kfw ໃນການບູລະນະຮັກສາທາງຊຶ່ງມີລວງຍາວປະມານ 42 ກິໂລແມັດ ແລະໄດ້ຮັບທຶນເພີ່ມເພື່ອສ້າງຂົວເຊສະໝູນມີລວງ ຍາວ 120 ແມັດ ລວງສູງ 6,50 ແມັດ ມູນຄ່າ 6,9 ຕື້ກີບ ໂດຍແມ່ນບໍລິສັດວັນນະວົງກໍ່ສ້າງ ຈຳກັດຜູ້ດຽວ ຮ່ວມກັບບໍລິສັດແອວພີພັດທະນາກໍ່ສ້າງຈຳກັດຜູ້ດຽວ ເປັນຜູ້ຮັບເໝົາການກໍ່ສ້າງ, ມີໄລຍະເວລາການກໍ່ສ້າງທັງໝົດ 18 ເດືອນ (26 ພະຈິກ 2020-25 ພຶດສະພາ 2022), ປະຈຸບັນ, ການກໍ່ສ້າງທາງແມ່ນສໍາເລັດແລ້ວ 100% ແລະການກໍ່ສ້າງຂົວສຳເລັດ 63%. 

แชร์