9 ເດືອນ ລາຍຮັບໄຊຍະລາຍໄດ້ເກືອບ 65% ແຜນປີ

ຂ່າວ: ອຸ່ນເຮືອນ ໂພທິລັກ 

   ນັບແຕ່ຕົ້ນປີ 2021 ມານີ້ເປັນໄລຍະທີ່ບັນດາປະເທດໃນໂລກກໍ່ຄື ສປປ ລາວ ຕົກຢູ່ໃນສະພາບເກີດມີການລະບາດຂອງພະຍາດໂຄວິດ-19 ຮອບໃໝ່ຊຶ່ງໄດ້ສົ່ງຜົນກະທົບໂດຍກົງ ແລະທາງອ້ອມຕໍ່ການພັດທະນາເສດຖະກິດ-ສັງຄົມໃນທົ່ວປະເທດ, ສໍາລັບແຂວງໄຊຍະບູລີນອກຈາກຜົນກະທົບຂອງພະຍາດ ໂຄວິດ-19 ແລ້ວ, ຍັງຖືກຜົນກະທົບໃຫຍ່ຫຼວງຈາກພາຍຸໂກກູມະທີ່ສ້າງຄວາມເສຍຫາຍບໍ່ໜ້ອຍຕໍ່ພື້ນຖານໂຄງລ່າງ, ເນື້ອທີ່ທໍາການຜະລິດ ແລະຊັບສິນຂອງປະຊາຊົນຈາກບັນຫາຄືດັ່ງກ່າວສົ່ງຕໍ່ການຈັດເກັບລາຍຮັບເຂົ້າງົບປະມານຂອງແຂວງໃນ 9 ເດືອນຜ່ານມາສາມາດເກັບໄດ້ 64,98% ຂອງແຜນການປີຫຼຸດລົງ 5,31% ເມື່ອທຽບໃສ່ໄລຍະດຽວກັນ ຂອງປີກ່ອນ.

   ທ່ານ ສົມຈິດ ຈັນທະວົງ ຮອງເຈົ້າແຂວງຜູ້ຊີ້ນໍາວຽກງານເສດຖະກິດສັງຄົມ ແຂວງໄຊຍະບູລີ ລາຍງານໃຫ້ຮູ້ ຫວ່າງບໍ່ດົນມານີ້ວ່າ: ຕົວເລກຕົວຈິງສາມາດປະຕິບັດລາຍຮັບໄດ້ທັງໝົດ 685,87 ຕື້ກີບ ໃນນັ້ນລາຍຮັບພູດສູນກາງປະຕິບັດໄດ້ 547,52 ຕື້ກີບ ເທົ່າກັບ 65,11% ຂອງແຜນການປີ, ລາຍຮັບພາຍໃນແຂວງປະຕິບັດໄດ້ 138,35 ຕື້ກີບ ເທົ່າກັບ 61,63% ຂອງແຜນການປີສ່ວນລາຍ ຈ່າຍປະຕິບັດໄດ້ 325,20 ຕື້ກີບ ເທົ່າກັບ 59,54% ຂອງແຜນການປີ, ທຽບໃສ່ໄລຍະດຽວກັນຂອງປີກ່ອນຫຼຸດລົງ 11,47%, ດຸ່ນດ່ຽງຈາກສູນກາງປະຕິບັດໄດ້ທັງໝົດ 227,74 ຕື້ກີບ ເທົ່າ ກັບ 78,16% ຂອງແຜນການປີຫຼຸດລົງ 7,27% ເມື່ອທຽບໃສ່ໄລຍະດຽວກັນຂອງປີກ່ອນ.

 ທ່ານ ສົມຈິດ ຈັນທະວົງ ຍັງໃຫ້ຮູ້ຕື່ມອີກວ່າ: ສໍາລັບ 3 ເດືອນທ້າຍປີນີ້ຈະສືບຕໍ່ເລັ່ງເກັບລາຍຮັບຈາກຖານລາຍຮັບທີ່ມີຢູ່ແລ້ວໃຫ້ຄົບຖ້ວນເຊັ່ນ: ອາກອນມູນຄ່າເພີ່ມ, ອາກອນລາຍໄດ້, ຄ່າທໍານຽມທາງ, ຄ່າທໍານຽມການນໍາໃຊ້ດິນ, ລາຍໄດ້ຈາກທີ່ດິນ, ຄ່າຊັບພະຍາກອນທໍາມະຊາດ ແລະອື່ນໆໃນຂອບເຂດທົ່ວແຂວງ, ສົ່ງເສີມສ້າງຖານລາຍຮັບໃໝ່ໃນບ່ອນທີ່ມີເງື່ອນໄຂ, ສືບຕໍ່ປະຕິບັດແຜນຈັດເກັບລາຍຮັບຜ່ານລະບົບຄຸ້ມຄອງທີ່ທັນສະໄໝຢ່າງກວ້າງຂວາງພ້ອມທັງຄຸ້ມຄອງລາຍຈ່າຍຕາມທິດປະຢັດຫ້າມບໍ່ໃຫ້ມີການສ້າງໜີ້ສິນທີ່ບໍ່ສອດຄ່ອງກັບລະບຽບກົດໝາຍ. 

แชร์