ໂຮນລັງ ຄິດຄົ້ນເຕັກໂນໂລຊີສັກຢາແບບບໍ່ມີເຂັມ

  ຄະນະນັກວິໄຈຂອງໂຮນລັງກຳລັງພັດທະນາເຕັກໂນໂລຊີເລເຊີສຳລັບສັກຢາເໝືອນບໍ່ມີຄວາມເຈັບປວດ ໂດຍເປັນການສັກຢາທີ່ບໍ່ແມ່ນເຂັມສັກຢາຈະຊ່ວຍຫຼຸດຄວາມຢ້ານເຂັມ ແລະຄວາມຮູ້ສຶກຈາກການເຈັກປວດຈາກການສັກຢາ.
  ຕາມຂ່າວຕ່າງປະເທດລາຍງານວ່າ ເດວິດ ເຟີນັນເດ ຣິວາສ ອາຈານ ຂອງມະຫາວິທະຍາໄລເວັນເຕີຂອງໂຮນລັງ ແລະທິມນັກວິໄຈຈາກສະຖາບັນເຕັກໂນໂລຊີແມສຊາຊູເຊດທີ່ເປັນຜູ້ຄົ້ນພົບແນວຄິດດັ່ງກ່າວລະບຸວ່າເຕັກໂນໂລຊີນີ້ມີຊື່ວ່າ ບັບເບິລກັນໂດຍໃຊ້ແສງເລເຊີຂອງເຫຼວທີ່ເປັນຕົວຢາເຂົ້າໄປທີ່ຜີວໜັງຊັ້ນນອກຂັ້ນຕອນດັ່ງກ່າວ ເກີດຂຶ້ນຢ່າງວ່ອງໄວໄວກວ່າຖືກຍຸງກັກ ແລະບໍ່ເຮັດໃຫ້ເກີດຄວາມຮູ້ສຶກເຈັບປວດເພາະບໍ່ໄດ້ສຳພັດປາຍປະສາດຂອງຜີວໜັງທັງຍັງລະບຸວ່າ ພາຍໃນເວລາພຽງວິນາທີ ແສງເລເຊີ ຈະເຮັດໃຫ້ຫຼອດແກ້ວທີ່ບັນຈຸຂອງເຫຼວຮ້ອນ ແລະເກີດຟອງອາກາດຈາກນັ້ນ ກໍ່ຈະດັນຂອງເຫຼວອອກໄປນໍາຄວາມໄວຫຼາຍກວ່າ 100 ກິໂລແມັດຕໍ່ຊົ່ວໂມງ ຊຶ່ງເປັນວິທີການທີ່ເຮັດໃຫ້ຢາເຂົ້າສູ່ຜີວໜັງໄດ້ໂດຍບໍ່ກໍ່ໃຫ້ເກີດບາດແຜ.
  ຣິວາສຄາດວ່າ ເຕັກໂນເລຊີນີ້ບໍ່ພຽງຈະຊ່ວຍໃຫ້ຜູ້ຄົນຫັນມາເຂົ້າຮັບການສັກຢາຫຼາຍຂຶ້ນເທົ່ານັ້ນ ແຕ່ຍັງຊ່ວຍປ້ອງກັນຄວາມສ່ຽງຈາກສິ່ງເປີ້ເປື້ອນຈາກເຂັມທີ່ບໍ່ສະອາດ ແລະຫຼຸດບັນຫາຂີ້ເຫຍື້ອທາງການແພດອີກດ້ວຍຂະນະນີ້ບໍລິສັດສະຕາອັບໃໝ່ແຫ່ງໜຶ່ງຈະເຮັດວຽກຮ່ວມກັບອຸດສາຫະກຳເວຊພັນຕ່າງໆ ເພື່ອດຳເນີນການທົດລອງເພີ່ມຕື່ມລວມທັງແນວທາງການວາງຈຳໜ່າຍເຕັກໂນໂລຊີບັບເບິລກັນຕໍ່ໄປໃນອະນາຄົດ.

-----

ໜັງສືພິມ ເສດຖະກິດ-ສັງຄົມ

• 18/10/2021