ລາວອັນດັບ 37 ຂອງໂລກ ແລະທີ 2 ອາຊຽນ ບົດບາດແມ່ຍິງເວທີການເມືອງ

 ລັດຖະບານໄດ້ເອົາໃຈໃສ່ໃນການປະກາດໃຊ້ຫຼາຍນິຕິກໍາທີ່ເປັນເຄື່ອງມືຄຸ້ມຄອງລັດ,ຮັບປະກັນການສົ່ງເສີມ, ປົກປ້ອງສິດ ແລະຜົນປະໂຫຍດຂອງແມ່ຍິງ ແລະເດັກນ້ອຍເຮັດໃຫ້ແມ່ຍິງສາມາດປະກອບສ່ວນເຫື່ອແຮງ, ສະຕິປັນຍາ, ຄວາມຮູ້, ຄວາມສາມາດເຂົ້າໃນການພັດທະນາເສດຖະກິດ-ສັງຄົມ ໃນຫຼາຍຂົງເຂດວຽກງານນັບມື້ນັບເພີ່ມຂຶ້ນສີ່ງດັ່ງກ່າວໄດ້ຊຸກຍູ້ໃຫ້ໃນປີ 2021 ສປປ ລາວ ຖືກຈັດຢູ່ໃນອັນດັບທີ 37 ຂອງໂລກ ແລະອັນດັບທີ 2 ຂອງອາຊຽນໃນດ້ານບົດບາດຂອງແມ່ຍິງໃນເວທີການເມືອງ.

   ວັນທີ 14 ຕຸລາ 2021 ທີ່ສໍານັກງານປະທານປະເທດ, ທ່ານ ນາງ ປານີ ຢາທໍ່ຕູ້ ຮອງປະທານປະເທດແຫ່ງ ສປປ ລາວ ໄດ້ນຳພາຄະນະຜູ້ແທນເຂົ້າຮ່ວມ ແລະກ່າວບົດປາໄສໃນຮູບແບບທາງໄກໃນກອງປະຊຸມເວທີປຶກສາຫາລື “ແມ່ຍິງເອີຣົບ-ອາຊີ” ຄັ້ງທີ 3 ພາຍໃຕ້ຫົວຂໍ້: “ແມ່ຍິງກັບພາລະກິດໂລກໃນຄວາມເປັນຈິງອັນໃໝ່”, ໂດຍການເປັນປະທານຂອງ ທ່ານ ນາງ ວາເລນຕີນາມັດວຽນໂກປະທານສະພາສູງແຫ່ງສະຫະພັນຣັດເຊຍຊຶ່ງຈັດຂຶ້ນໃນວັນທີ 13-15 ຕຸລາ 2021 ທີ່ນະຄອນຫຼວງຊັງປີເຕີສະເບີກ ສ.ຣັດເຊຍ.

   ໂອກາດດັ່ງກ່າວ, ທ່ານຮອງປະທານປະເທດໄດ້ສະແດງຄວາມຊົມເຊີຍ ແລະຕີລາຄາສູງຕໍ່ການກະກຽມ ແລະດຳເນີນກອງປະຊຸມທີ່ມີຄວາມໝາຍສຳຄັນໃນຄັ້ງນີ້ໃນທ່າມກາງປະຊາຊາດໃນໂລກທີ່ພວມປະເຊີນໜ້າກັບການແຜ່ລະບາດຂອງພະຍາດໂຄວິດ-19 ຊຶ່ງສົ່ງຜົນກະທົບໂດຍກົງຕໍ່ການພັດທະນາເສດຖະກິດສັງຄົມຂອງບັນດາປະເທດໃນໂລກ.

   ພ້ອມນັ້ນ, ທ່ານກໍ່ຍັງໄດ້ຍົກໃຫ້ເຫັນກ່ຽວກັບ “ການປ່ຽນແປງທາງສັງຄົມ 2030 ແລະພາລະກິດຂອງແມ່ຍິງເພື່ອບັນລຸການພັດທະນາແບບຍືນຍົງກວມລວມ” ຊຶ່ງສະພາບການດັ່ງກ່າວ, ລັດຖະບານລາວໄດ້ໃຫ້ຄວາມສໍາຄັນຕໍ່ການພັດທະນາແບບຍືນຍົງ, ກວມລວມ ແລະຖືນະໂຍບາຍດັ່ງກ່າວເປັນເປົ້າໝາຍເພື່ອນໍາເອົາປະເທດຊາດຫຼຸດພົ້ນອອກຈາກສະພາວະດ້ອຍພັດທະນາ, ຜ່ານການຈັດຕັ້ງປະຕິບັດບັນດາແຜນຍຸດທະສາດດັ່ງກ່າວ, ລັດຖະບານໄດ້ເອົາໃຈໃສ່ໃນການປະກາດໃຊ້ຫຼາຍນິຕິກໍາທີ່ເປັນເຄື່ອງມືຄຸ້ມຄອງລັດ, ຮັບປະກັນການສົ່ງເສີມ, ປົກປ້ອງສິດ ແລະຜົນປະໂຫຍດຂອງແມ່ຍິງ ແລະເດັກນ້ອຍ.

   ຄຽງຄູ່ກັນນັ້ນ, ລັດຖະບານກໍ່ໄດ້ເອົາໃຈໃສ່ຈັດຕັ້ງປະຕິບັດບັນດາເປົ້າໝາຍການພັດທະນາແບບຍືນຍົງ (SDG) ທີ່ ອົງການສະຫະປະຊາຊາດວາງອອກ ແລະຜ່ານການປະເມີນຜົນຄັ້ງທີ 2 ໃນຕົ້ນປີ 2021 ຂອງອົງການສະຫະປະຊາຊາດກ່ຽວກັບການຈັດຕັ້ງປະຕິບັດ 3 ເງື່ອນໄຂເພື່ອຫຼຸດພົ້ນອອກຈາກສະຖານະພາບປະເທດດ້ອຍພັດທະນາ (LDC), ສປປ ລາວ ເປັນໜຶ່ງໃນເປົ້າໝາຍທີ່ສາມາດປະຕິບັດໄດ້ທັງ 3 ຂອງເງື່ອນໄຂຄື: ດັດສະນີລາຍໄດ້ສະເລ່ຍແຫ່ງຊາດ (GNI), ດັດສະນີຊັບສິນມະນຸດ (HAI) ແລະດັດສະນີຄວາມບອບບາງທາງດ້ານເສດຖະກິດ (EVI), ແຕ່ຍ້ອນຜົນກະທົບຂອງການແຜ່ລະບາດຂອງພະຍາດໂຄວິດ-19 ອາດຈະໃຊ້ເວລາອີກໄລຍະໜຶ່ງເພື່ອໃຫ້ ສປປ ລາວ ສາມາດບັນລຸເປົ້າໝາຍດັ່ງກ່າວຢ່າງມີຜົນສໍາເລັດ.

 3 ເງື່ອນໄຂດັ່ງກ່າວ: ລ້ວນແຕ່ໄດ້ເຊື່ອມສານເຂົ້າໃນນະໂຍບາຍຄວາມສະເໝີພາບຍິງ-ຊາຍຂອງລັດຖະບານ ແລະລັດຖະບານກໍ່ໄດ້ເອົາໃຈໃສ່ຊີ້ນໍາ-ນໍາພາຈັດຕັ້ງປະຕິບັດມີຜົນສໍາເລັດເປັນກ້າວໆ ມາເຮັດໃຫ້ແມ່ຍິງສາມາດປະກອບສ່ວນເຫື່ອແຮງ, ສະຕິປັນຍາ, ຄວາມຮູ້, ຄວາມສາມາດເຂົ້າໃນການພັດທະນາເສດຖະກິດ-ສັງຄົມ ໃນຫຼາຍຂົງເຂດວຽກງານນັບມື້ນັບເພີ່ມຂຶ້ນຊຶ່ງສະແດງອອກໃນໂຕເລກໃນອັດຕາສ່ວນແມ່ຍິງເຂົ້າຮ່ວມໃນອົງການນິຕິບັນຍັດ, ອົງການລັດຖະບານ ແລະອຳນາດການປົກຄອງຂັ້ນທ້ອງຖິ່ນ. ພິເສດ, ໃນປີ 2021 ສປປ ລາວ ໄດ້ຖືກຈັດຢູ່ໃນອັນດັບທີ 37 ຂອງໂລກ ແລະອັນດັບທີ 2 ຂອງອາຊຽນໃນດ້ານບົດບາດຂອງແມ່ຍິງໃນເວທີການເມືອງ.

 ໃນການເຊື່ອມໂຍງສາກົນແມ່ຍິງຍັງມີສິ່ງທ້າທາຍຊຶ່ງຈະຕ້ອງໄດ້ຮ່ວມກັນເພື່ອແກ້ໄຂບັນຫາດັ່ງກ່າວເຊັ່ນ: ການໃຊ້ຄວາມຮຸນແຮງໃນຄອບຄົວ, ສຸຂະພາບ, ການເຂົ້າເຖິງແຫຼ່ງຂໍ້ມູນຂ່າວສານ, ການເຂົ້າເຖິງແຫຼ່ງທຶນ, ການສົ່ງເສີມ MSME, ການຄ້າມະນຸດ ແລະອື່ນໆ ລວມທັງການແກ້ໄຂຜົນກະທົບຂອງລະເບີດຍັງບໍ່ທັນແຕກທີ່ສົງຄາມປະຖິ້ມໄວ້ໃນຫຼາຍທົດສະວັດ. ພ້ອມກັນນັ້ນ, ທ່ານ ຮອງປະທານປະເທດ ປານີ ຢາທໍ່ຕູ້ ຍັງໄດ້ສະແດງຄວາມຂອບໃຈຕໍ່ບັນດາປະເທດເພື່ອນມິດ ແລະ ອົງການຈັດຕັ້ງສາກົນທີ່ໃຫ້ການສະໜັບສະໜູນ ສປປ ລາວ ຕະຫຼອດໄລຍະຜ່ານມາ, ພິເສດແມ່ນການຊ່ວຍເຫຼືອທາງດ້ານວັດຖຸອຸປະກອນ ແລະ ວັກແຊງເພື່ອແກ້ໄຂການແຜ່ລະບາດຂອງພະຍາດໂຄວິດ-19 ໃຫ້ແກ່ປະຊາຊົນລາວ, ພ້ອມທັງຊຸກຍູ້ໃຫ້ປະຊາຄົມໂລກສືບຕໍ່ໃຫ້ການຮ່ວມມືຊ່ວຍເຫຼືອເຊິ່ງກັນ ແລະກັນເພື່ອເຮັດໃຫ້ໂລກມີສັນຕິພາບ, ສະ ຖຽນລະພາບ, ການຮ່ວມມືແບບຍືນຍົງຕາມທິດສີຂຽວເພື່ອຄວາມຈະເລີນຮຸ່ງເຮືອງ ແລະຢູ່ດີກິນດີຂອງປະຊາຊົນ.

   ກອງປະຊຸມເວທີປຶກສາຫາລືແມ່ຍິງ ເອີຣົບ-ອາຊີ ໃນຄັ້ງນີ້ຖືເປັນໂອກາດອັນດີໃຫ້ແກ່ບັນດາຜູ້ນຳຍິງໃນພາກພື້ນໄດ້ ແລກປ່ຽນຄຳຄິດຄຳເຫັນເພື່ອຊອກຫາຊ່ອງທາງໃນການຊຸກຍູ້, ເສີມຂະຫຍາຍການພົວພັນຮ່ວມມືເພື່ອການພັດທະນາ,ດ້ວຍຄວາມຮ່ວມແຮງຮ່ວມໃຈກັນເພື່ອໃຫ້ສາມາດບັນລຸເປົ້າໝາຍການພັດທະນາແບບຍືນຍົງຕາມວາລະ 2030 ໄປພ້ອມກັນ.

แชร์