ສຶກສາກຽມສ້າງໂຮງງານຜະລິດນ້ຳປະປາເຂດນິຄົມອຸດສາຫະກຳ ນວ

  ໂດຍປະຕິບັດຕາມຂໍ້ຕົກລົງຂອງທ່ານເຈົ້າຄອງນະຄອນຫຼວງວຽງຈັນ ສະບັບເລກທີ 0164/ຈນວ ລົງວັນທີ 26 ກຸມພາ 2019 ວ່າດ້ວຍການມອບສິດໃຫ້ ເຊັນບົດບັນທຶກຄວາມເຂົ້າໃຈເພື່ອເກັບກໍາຂໍ້ມູນ, ສໍາຫຼວດ ແລະສຶກສາຄວາມເປັນໄປໄດ້ໃນການລົງທຶນກໍ່ສ້າງໂຮງງານຜະລິດນໍ້າປະປາ 1 ແສນແມັດກ້ອນຕໍ່ມື້ໃນຮູບແບບ BOT ເພື່ອມາສະໜອງນໍ້າເຂົ້າໃນເຂດນິຄົມອຸດສາຫະກໍາ ນະຄອນຫຼວງວຽງຈັນ ແລະໃຫ້ປະຊາຊົນອ້ອມຂ້າງເຂດດັ່ງກ່າວໄດ້ຊົມໃຊ້.

  ໃນວັນທີ 12 ມີນາ 2019, ອົງການປົກຄອງນະຄອນຫຼວງວຽງຈັນ ຊຶ່ງຕາງໜ້າໂດຍພະແນກແຜນການ ແລະ ການລົງທຶນຮ່ວມກັບບໍລິສັດກໍ່ສ້າງ-ລົງທຶນ ແລະ ຖືຮຸ້ນແຂວງຢຸນນານ (ລາວ) ຈໍາກັດຜູ້ດຽວ ແລະບໍລິສັດລົງທຶນກິດຈະການຢຸນນານ (ຮົງກົງ) ຮຸ້ນສ່ວນຈໍາກັດໄດ້ເຊັນບົດບັນທຶກຄວາມເຂົ້າໃຈເພື່ອດໍາເນີນການຈັດຕັ້ງປະຕິບັດເກັບກໍາຂໍ້ມູນ, ສໍາຫຼວດ ແລະສຶກສາຄວາມເປັນໄປໄດ້ໃນການລົງທຶນກໍ່ສ້າງໂຮງງານຜະລິດນໍ້າປະປາ 1 ແສນແມັດກ້ອນຕໍ່ມື້ໃນຮູບ ແບບ BOT ຢູ່ເຂດນິຄົມອຸດສາຫະກໍາ ນະຄອນຫຼວງວຽງຈັນ (ນວ).

  ໃຫ້ກຽດລົງນາມໃນພິທີດັ່ງກ່າວມີ ທ່ານ ພູຂົງ ບັນນະວົງ ຫົວໜ້າພະແນກແຜນການ ແລະການລົງທຶນນະຄອນຫຼວງວຽງຈັນ, ທ່ານ ພຸດທະພອນ ໂຄດປັນ ຍາ ຮອງເຈົ້າເມືອງໄຊເສດຖະ, ທ່ານ ວັນເພັງ ອິນທະວົງ ຮອງເຈົ້າເມືອງໄຊທານີ, ທ່ານ ຄໍາເຜີຍ ວົງສາຄໍາຜຸຍ ຜູ້ອໍານວຍການລັດວິສາຫະກິດນໍາປະປານະ ຄອນຫຼວງວຽງຈັນ, ທ່ານ ຈ່າງ ໂຢຈົ້ວ ຜູ້ອໍານວຍການບໍລິສັດກໍ່ສ້າງ-ລົງທຶນ ແລະຖືຮຸ້ນແຂວງຢຸນນາ (ລາວ) ຈໍາກັດຜູ້ດຽວ, ທ່ານ ເສີນ ເສີງ ຫົວໜ້າພະ ແນກພັດທະນາການຕະຫຼາດຢູ່ຕ່າງປະເທດ, ບໍລິສັດກິດຈະການນໍ້າປະປາ ແຂວງຢຸນນານ (ຮົງກົງ) ຮຸ້ນສ່ວນຈໍາກັດ, ໂດຍມີທ່ານ ແກ້ວພິລາວັນ ອາໄພລາດ ຮອງເຈົ້າຄອງນະຄອນຫຼວງວຽງຈັນ, ບັນດາການນໍາພັກ-ລັດ ຈາກພະແນກການອ້ອມຂ້າງນະຄອນຫຼວງວຽງຈັນ ແລະພາກສ່ວນກ່ຽວຂ້ອງເຂົ້າຮ່ວມເປັນສັກຂີພິຍານ.

ຂ່າວ: ກິ່ງລັດຕະນະ    

• 14/03/2019