ກອງທຶນສິນເຊື່ອບ້ານປະກອບສ່ວນພັດທະນາແຂວງບໍ່ແກ້ວ

    ວຽກງານກອງທຶນສິນເຊື່ອບ້ານຢູ່ແຂວງບໍ່ແກ້ວໄດ້ຮັບການພັດທະນາດ້ວຍດີຕະຫຼອດມາໂດຍໃຕ້ການຊີ້ນຳ ແລະຄຸ້ມຄອງຂອງຄະນະຊີ້ນຳຂັ້ນເມືອງ, ຄູ່ຮ່ວມຈັດຕັ້ງປະຕິບັດການດຳເນີນງານກອງທຶນຂອງສະຫະພັນແມ່ຍິງແຂວງ, ເມືອງໂດຍໄດ້ຮັບການສະໜັບສະໜູນດ້ານທຶນຈາກແຜນງານພັດທະນາທ້ອງຖິ່ນລາວ /030 ຂອງປະເທດລຸກຊຳບວກ ແລະດ້ານວິຊາການຂອງສະມາຄົມການເງິນຈຸລະພາກແຫ່ງ ສປປ ລາວ (ສມກຈ) ແລະໂຄງການອາດາ ( ADA ) ປະຈໍາລາວ ປະກອບມີ 25 ກອງທຶນທີ່ຢູ່ເປົ້າໝາຍຂອງແຜນງານມີເມືອງຜາອຸດົມ, ປາກທາ, ຫ້ວຍຊາຍ ແລະເມືອງເມີງ, ມີສະມາຊິກກອງທຶນທັງໝົດ 1.022 ສະມາຊິກ.
    ທ່ານ ສັງຄີ ວົງສະໜິດ ຜູ້ປະສານງານການເງິນຊົນນະບົດຂັ້ນແຂວງປະຈໍາແຂວງບໍ່ແກ້ວໄດ້ແຈ້ງໃຫ້ຮູ້ວ່າ: ກອງທຶນສິນເຊື່ອບ້ານໄດ້ສ້າງກາລະໂອກາດໃຫ້ປະຊາຊົນຢູ່ບ້ານເປົ້າໝາຍຂອງແຜນງານໃນການເຂົ້າເຖິງແຫຼ່ງທຶນເພື່ອນໍາໃຊ້ເຂົ້າໃນກິດຈະກໍາສ້າງລາຍຮັບເພີ່ມໃຫ້ແກ່ຄອບຄົວເຂົາເຈົ້າແນໃສ່ຫຼຸດຜ່ອນຄວາມທຸກຍາກເທື່ອລະກ້າວ; ສໍາລັບການຈັດຕັ້ງປະຕິບັດການດໍາເນີນງານວຽກງານກອງທຶນດັ່ງກ່າວໃນໄລຍະນີ້ແມ່ນຢູ່ທ່າມກາງການແຜ່ລະບາດຂອງພະຍາດໂຄວິດ-19, ໜ່ວຍງານສ້າງຄວາມເຂັ້ມແຂງຂອງແຜນງານພັດທະນາທ້ອງຖິ່ນລາວ /030-ລຸກຊຳບວກປະຈຳແຂວງຍັງຈັດກອງປະຊຸມທົບທວນ ແລະ ແລກປ່ຽນບົດຮຽນການຈັດຕັ້ງປະຕິບັດວຽກງານກອງທຶນພັດທະນາບ້ານ ແລະ ກອງທຶນສິນເຊື່ອບ້ານຮ່ວມກັບຄູ່ຮ່ວມງານຂັ້ນແຂວງ, ຂັ້ນເມືອງເພື່ອຮັບປະກັນການດຳເນີນງານຂອງກອງທຶນໃຫ້ມີປະສິດ ທິພາບ, ມີຄວາມໂປ່ງໃສ ແລະ ຄວາມຍືນຍົງຂອງກອງທຶນ. ນອກນີ້, ທີມງານວິຊາການພາກສະໜາມຂອງ ສມກຈ ຮ່ວມກັບສະຫະພັນແມ່ຍິງເມືອງ ແລະຄະນະພັດທະນາບ້ານຕິດຕາມການນໍາໃຊ້ເງິນກອງທຶນຂອງສະມາຊິກເຂົ້າໃນກິດຈະກຳການປູກ-ການລ້ຽງຢູ່ຂັ້ນບ້ານ; ຈັດຕັ້ງກອງປະຊຸມທົບທວນ ແລະຖອດຖອນບົດຮຽນການຈັດຕັ້ງປະຕິບັດວຽກງານກອງທຶນພັດທະນາບ້ານ ແລະກອງທຶນສິນເຊື່ອບ້ານ.
   ທ່ານ ສັງຄີ ວົງສະໜິດ ຍັງໄດ້ຢືນຢັນຜົນການຈັດຕັ້ງປະຕິບັດວຽກງານກອງທຶນສິນເຊື່ອບ້ານຢູ່ບ້ານຫ້ວຍສ້ານ, ເມືອງເມີງ ເປັນໜຶ່ງໃນບ້ານເປົ້າໝາຍຂອງແຜນງານພັດທະນາທ້ອງຖິ່ນ ລາວ/ 030, ບ້ານດັ່ງກ່າວປະກອບມີຊົນເຜົ່າມູເຊີ, ມີປະຊາກອນທັງໝົດ 755 ຄົນ, ຍິງ 375 ຄົນ, 140 ຄອບຄົວ, ມີເງິນກອງທຶນທັງໝົດ ຈໍານວນ 185.153.517 ກີບ ແລະມີສະມາຊິກກອງທຶນ 28 ຄອບຄົວ ໂດຍກິດຈະກໍາປ່ອຍກູ້ສ່ວນຫຼາຍແມ່ນລ້ຽງແບ້, ລ້ຽງໝູ ແລະປູກພືດຈໍານວນໜຶ່ງ; ຜ່ານການຈັດ ຕັ້ງປະຕິລົດຕົວຈິງ ປາກົດມີຄອບຄົວ ພົ້ນເດັ່ນຄື: ຄອບຄົວທ້າວຈ່າຟູ ແລະທ້າວ ໄມອິນແກ້ວ ເປັນສະມາຊິກກອງທຶນ ທີ່ໄດ້ຢືມເງິນກອງທຶນຊື້ແມ່ພັນໝູຈໍານວນ 2 ໂຕມາລ້ຽງຊຶ່ງກອ່ນໜ້ານີ້ກໍ່ມີໝູລ້ຽງ 5ໂຕ ແລະລ້ຽງມາໄດ້ 7 ເດືອນກໍ່ເກີດລູກ 15 ໂຕຂາຍໄດ້ເງິນ 12.400.000 ກີບ ຫັກຄ່າອາຫານໝູ 1.200.000 ກີບ; ປະຈຸບັນ, ແມ່ພັນໝູເລີ່ມມີລູກຊຸດທີ 2; ສໍາລັບ, ການລ້ຽງໝູ ມີລັກສະນະຮູບແບບຄອກເປີດ ແລະຕັ້ງຢູ່ຫ່າງຈາກບ້ານ, ອາຫານທີ່ລ້ຽງແມ່ນ ແບບເຄິ່ງທໍາມະຊາດ ແລະເຕັກນິກແບບໃໝ່.
   ໃນຕໍ່ໜ້ານີ້, ຍັງຈະສືບຕໍ່ນໍາພາຈັດຕັ້ງປະຕິບັດການຄຸ້ມຄອງ ແລະນໍາໃຊ້ກອງທຶນສິນເຊື່ອບ້ານ 25 ກອງທຶນຢູ່ 4 ເມືອງ ໃນວົງເງິນກູ້ທີ່ໄດ້ປ່ອຍໃຫ້ປະຊາຊົນບັນດາເຜົ່າໃນໄລຍະຜ່ານມາຈໍານວນ 3.000.000.000 ກີບ ໃນນີ້ແມ່ນເງິນສົມທົບຂອງສະມາຊິກກອງທຶນ 300.000.000 ກີບ ແກ່ກິດຈະກໍາການສ້າງລາຍຮັບໃຫ້ແກ່ບັນດາຄອບຄົວໄດ້ນໍາໃຊ້ເຂົ້າໃນການປູກຝັງ, ລ້ຽງສັດນ້ອຍ, ປະມົງ, ຫັດຖະກໍາ, ການບໍລິການຄ້າຂາຍຍ່ອຍ ແລະອື່ນໆ ໃຫ້ມີປະສິດທິພາບ, ປະສິດຜົນຍິ່ງໆຂຶ້ນເປັນການປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງເມືອງ ແລະແຂວງບໍ່ແກ້ວໃຫ້ມີການປ່ຽນແປງໃໝ່ຢ່າງຕັ້ງໜ້າຕາມແນວທາງຂອງລັດຖະບານກໍ່ຄືຂອງທ້ອງຖິ່ນວາງອອກໃນແຕ່ລະໄລຍະໃຫ້ປາກົດຜົນເປັນຈິງ.

ຂ່າວ: ຣັດສະໝີ ດວງສັດຈະ

แชร์