ເຊກອງ ມີລານຊື້ມັນຕົ້ນຫຼາຍຫົວໜ່ວຍຫາລືຄຸ້ມຄອງ

   ໃນປີ 2019-2020 ທົ່ວແຂວງເຊກອງໄດ້ອອກອະນຸຍາດລານເກັບຊື້ມັນຕົ້ນທັງໝົດ 8 ຫົວໜ່ວຍ, ໃນນີ້ຂັ້ນແຂວງອະນຸຍາດ 6 ຫົວໜ່ວຍ, ເມືອງອະນຸຍາດ 2 ຫົວໜ່ວຍ ແລະໄດ້ຢັ້ງຢືນການເປັນສາຂາມີ 9 ສາຂາຄື: ຢູ່ເມືອງລະມາມມີ 4 ສາຂາ, ເມືອງທ່າແຕງ 3 ສາຂາ, ເມືອງດາກຈຶງມີ 1 ສາຂາ ແລະຢູ່ເມືອງກະລຶມ 1 ສາຂາຢ່າງໃດກໍ່ຕາມເພື່ອຄວາມເປັນເອກະພາບໃນດ້ານລາຄາເປັນການຊຸກຍູ້ການຜະລິດ ແລະ ການເກັບຊື້ເຄື່ອນໄຫວຢ່າງຖືກຕ້ອງທາງແຂວງໄດ້ມືການຫາລືຄຸ້ມຄອງລານເກັບຊື້ມັນຕົ້ນຢູ່ພາຍໃນແຂວງ.
   ກອງປະຊຸມສະຫຼຸບຕີລາຄາການເຄື່ອນໄຫວວຽກງານ ແລະປຶກສາຫາລືກ່ຽວກັບການອະນຸຍາດສ້າງຕັ້ງ ແລະການຄຸ້ມຄອງລານເກັບຊື້ມັນຕົ້ນໄດ້ຈັດຂຶ້ນໃນວັນທີ 12 ຕຸລາ 2021 ທີ່ພະແນກອຸດສາຫະກໍາ ແລະການຄ້າແຂວງໂດຍການເປັນປະທານຂອງທ່ານ ຂັນຕີ ສີລະວົງສາ ຮອງເຈົ້າແຂວງເຊກອງ, ພ້ອມນີ້ກໍມີທ່ານຮອງເຈົ້າເມືອງດາກຈຶງ, ທ່ານຮອງເຈົ້າເມືອງທ່າແຕງ, ຫົວໜ້າພະແນກອຸດສາຫະກໍາ ແລະການຄ້າແຂວງ-ເມືອງ ແລະພາກສ່ວນກ່ຽວຂ້ອງເຂົ້າຮ່ວມ.
  ທ່ານ ຄໍາໃບ ແກ້ວສັກສິດ ຫົວໜ້າຂະແໜງທະບຽນ ແລະຄຸ້ມຄອງວິສາຫະກິດໄດ້ຂຶ້ນຜ່ານບົດສະຫຼຸບການຈັດຕັ້ງປະຕິບັດ, ອອກອະນຸຍາດສ້າງຕັ້ງລານເກັບຊື້ມັນຕົ້ນໂດຍໄດ້ຕີລາຄາຍົກໃຫ້ເຫັນດ້ານດີ, ດ້ານອ່ອນ, ຜົນໄດ້ຜົນເສຍໃນການອອກອະນຸຍາດ-ບໍ່ອອກອະນຸຍາດ ແລະວາງແຜນການສືບຕໍ່ແກ້ໄຂໃນຕໍ່ໜ້າ.
   ພ້ອມນີ້ກອງປະຊຸມຍັງໄດ້ຮັບຟັງການປະກອບຄໍາເຫັນຂອງຂະແໜງການກ່ຽວຂ້ອງອ້ອມຂ້າງແຂວງ ແລະເມືອງກ່ຽວກັບການອອກອະນຸຍາດສ້າງຕັ້ງ, ການແບ່ງຂັ້ນຄຸ້ມຄອງລະຫວ່າງແຂວງກັບເມືອງ ແລະວຽກງານອື່ນໆ ເພື່ອສ້າງຄວາມເປັນເອກະພາບ ແນໃສ່ຍູ້ແຮງຂະບວນການຜະລິດຂອງປະຊາຊົນໃຫ້ນັບມື້ຫຼາຍຂຶ້ນ, ທັງເປັນການຊຸກຍູ້ຫົວໜ່ວຍທຸລະກິດກໍຄືຜູ້ປະກອບການເກັບຊື້ມັນຕົ້ນເຄື່ອນໄຫວຖືກຕ້ອງຕາມລະບຽບກົດໝາຍ.
   ໂອກາດນີ້ ທ່ານ ຂັນຕີ ສີລະວົງສາ ກໍໄດ້ມີຄໍາເຫັນຊີ້ນໍາເປັນຕົ້ນ: ມອບໃຫ້ພະແນກກະສິກໍາ-ປ່າໄມ້ ສົມທົບກັບພະແນກຊັບພະຍາກອນທໍາມະຊາດ-ສິ່ງແວດລ້ອມ ວາງມາດຕະການເດັດຂາດ, ເຂັ້ມງວດຕໍ່ຜູ້ບຸກລຸກປ່າສະຫງວນ ແລະປ່າປ້ອງກັນເພື່ອປູກມັນຕົ້ນ; ພະແນກອຸດສາຫະກໍາ-ການຄ້າສົມທົບກັບພະແນກກະສິກໍາ-ປ່າໄມ້ ເອົາໃຈໃສ່ຄຸ້ມຄອງລານເກັບຊື້ມັນຕົ້ນໃຫ້ເຄື່ອນໄຫວຖືກຕ້ອງຕາມລະບຽບກົດໝາຍ; ມອບໃຫ້ພະແນກອຸດສາຫະກໍາ-ການຄ້າ, ພະແນກກະສິກໍາ-ປ່າໄມ້ ແລະ ພະ ແນກການເງິນແຂວງຈັດກອງປະຊຸມຮ່ວມກັບໂຮງງານຜະລິດແປ້ງມັນຕົ້ນເພື່ອປຶກສາຫາລືກໍານົດລາຄາການເກັບຊື້ມັນຕົ້ນ, ແລ້ວແຈ້ງລາຄາທີ່ກໍານົດດັ່ງກ່າວໃຫ້ເມືອງ, ບ້ານກໍຄືປະຊາຊົນຜູ້ຜະລິດຮັບຮູ້ຢ່າງທົ່ວເຖິງເພື່ອຮັບປະກັນດ້ານລາຄາ, ຮັກສາຜົນປະໂຫຍດໃຫ້ປະຊາຊົນ.
 ສືບຕໍ່ປະເມີນຫົວໜ່ວຍທີ່ໄດ້ຮັບອະນຸຍາດເກັບຊື້ມັນຕົ້ນໃນໄລຍະຜ່ານມາວ່າຫົວໜ່ວຍໃດເຄື່ອນໄຫວຖືກຕ້ອງ, ເຄື່ອນໄຫວໄດ້ດີ ແລະຫົວໜ່ວຍໃດທີ່ບໍ່ມີການເຄື່ອນໄຫວກໍໃຫ້ມີການກ່າວເຕືອນ ຫຼື ລຶບລ້າງໃບອະນຸຍາດດັ່ງກ່າວ, ທັງໝົດນີ້ກໍເພື່ອເປັນການຊຸກຍູ້ສົ່ງເສີມຂະບວນການຜະລິດເປັນສິນຄ້າຂອງປະຊາຊົນໃຫ້ນັບມື້ຂະຫຍາຍຕົວ, ຄຽງຄູ່ກັບການຄຸ້ມຄອງການເຄື່ອນໄຫວຂອງຫົວໜ່ວຍທຸລະກິດໃຫ້ຖືກຕ້ອງຕາມລະບຽບກົດໝາຍ ແລະນິຕິກໍາຕ່າງໆທີ່ພັກ-ລັດຖະບານວາງອອກ.


ຂ່າວ: ແກ້ວໄຊຍະວົງ

แชร์