ເຈົ້າແຂວງຫຼວງພະບາງ ຊີ້ນຳເອົາໃຈໃສ່ຕ້ານໂຄວິດ

ຂ່າວ: ສີສຸວັນ
  ໃນວັນທີ 14 ຕຸລາ 2021 ນີ້ ທ່ານ ຄໍາຂັນ ຈັນທະວີສຸກ ເຈົ້າແຂວງໆຫຼວງພະບາງ ໄດ້ລົງຊີ້ນໍາສູນປະຕິບັດງານຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດພະຍາດໂຄວິດ-19 ຂັ້ນແຂວງທີ່ພະແນກສາທາລະນະສຸກໂດຍມີທ່ານຮອງເຈົ້າແຂວງ, ຜູ້ຊີ້ນໍາວຽກງານສະເພາະກິດຂັ້ນແຂວງ, ພ້ອມດ້ວຍຄະນະສະເພາະກິດເຂົ້າຮ່ວມ.
    ທ່ານ ດຣ ຄໍາສອນ ພົງສະຫວັດດີ ຫົວໜ້າພະແນກສາທະລະນະສຸກ, ຮອງຫົວໜ້າຄະນະສະເພາະກິດເພື່ອປ້ອງກັນ, ຄວບຄຸມ ແລະແກ້ໄຂການລະບາດພະຍາດໂຄວິດ-19 ຂັ້ນ ໄດ້ລາຍງານການປະຕິບັດວຽກງານຂອງຄະນະສະເພາະກິດທີ່ຜ່ານມາໂດຍຫຍໍ້ໃຫ້ທ່ານເຈົ້າແຂວງຮັບຊາບ ແລະຮັບຟັງການປະກອບຄໍາຄິດເຫັນຈາກຄະນະສະເພາະກິດແຕ່ລະໜ່ວຍງານຕື່ມອີກ ແລະເພື່ອແນໃສ່ຮັບມືຕ້ານການລະບາດຂອງເຊື້ອພະຍາດໂຄວິດ-19 ທີ່ພວມລະບາດອອກເປັນວົງກວ້າງໃນຊຸມຊົນຢູ່ພາຍ ໃນແຂວງຫຼວງພະບາງໂດຍທ່ານເຈົ້າແຂວງໄດ້ເນັ້ນໃຫ້ຄະນະສະເພາະກິດເອົາໃຈໃສ່ຫຼາຍບັນຫາສໍາຄັນເປັນຕົ້ນແມ່ນ: ປັບປຸງຄືນເງື່ອນໄຂໃດຄວນກັກຢູ່ເຮືອນ ແລະຄວນກັກຢູ່ສູນໃຫ້ວິຊາການປະເມີນສະພາບ, ຈັດຕັ້ງອາສາສະມັກຂັ້ນບ້ານຊ່ວຍຄະນະສະເພາະກິດຄົ້ນຫາຜູ້ສໍາພັດໃກ້ສິດ, ຫ້າມເດັດຂາດຄົນເຂົ້າອອກລະຫວ່າງເມືອງຫາເມືອງ, ບ້ານຕໍ່ບ້ານຫາກບໍ່ຈໍາເປັນແຕ່ຕ້ອງມີໃບສັກຢາຈຶ່ງໃຫ້ອອກຈາກບ້ານໄດ້, ເອົາໃຈໃສ່ຍົກສູງການປ້ອງກັນ, ຄວບຄຸມການລະບາດ, ເລັ່ງເກັບກໍາທາມລາຍໃຫ້ທັນການ, ສຶບຕໍ່ປ້ອງກັນ ແລະປຸກລະດົມສັງຄົມໃນການຊ່ວຍກັນຕ້ານການລະບາດ, ບັນດາຕະຫຼາດແຫ່ງຕ່າງໆຕ້ອງກວດກາຄືນວ່າຕະຫຼາດໃດຄວນປິດ ແລະຕະຫຼາດໃດຄວນເປີດ, ສ່ວນວັດຜາໂອ ແລະຄຸກຜາໂອແມ່ນໃຫ້ຮີບແຍກຜູ້ຕິດເຊື້ອ, ຜູ້ສໍາພັດ ແລະປິ່ນປົວກັບທີ່.
   ໂອກາດທີ່ທ່ານເຈົ້າແຂວງໄດ້ລົງຊີ້ນໍາຄັ້ງນີ້ກໍໄດ້ສະແດງຄວາມເປັນຫ່ວງເປັນໄຍຕໍ່ປະຊາຊົນທີ່ພວມຕິດເຊື້ອພະຍາດໂຄວິດ-19 ພວມລະບາດຢູ່ຊຸມຊົນໃນທົ່ວແຂວງມາຮອດມື້ນີ້ສູງເຖິງ 215 ຄົນ ໂດຍສະເພາະແມ່ນຢູ່ນະຄອນຫຼວງພະບາງມີຈໍານວນເພີ່ມຫຼາຍທີ່ສຸດ, ຕໍ່ກັບບັນການີ້ຈຶ່ງຂໍໃຫ້ເຈົ້າໜ້າທີ່ດ່ານໜ້າ, ແພດໝໍລວມເຖິງຄະນະສະເພາະກິດແຕ່ລະຂັ້ນທີ່ຮັບພິດຊອບໜ້າທີ່ຕາມການມອບໝາຍຈົ່ງມີສະຕິປ້ອງກັນໂຕເອງ ແລະພ້ອມກັນເບິ່ງແຍງປິ່ນປົວຜູ້ຕິດເຊື້ອພະຍາດດັ່ງກ່າວນີ້ໃຫ້ຫາຍດີ ເພື່ອຄືນເຂົ້າສູ່ສະພາບປົກກະຕິໂດຍໄວ.

แชร์