ເດືອນແລ້ວ ລາວເກີນດູນການຄ້າກັບຕ່າງປະເທດ 117 ລ້ານໂດລາ

 ມູນຄ່າການນໍາເຂົ້າ ແລະສົ່ງອອກຂອງ ສປປ ລາວ ປະຈໍາເດືອນກັນຍາ 2021 ບັນລຸໄດ້ປະມານ 777 ລ້ານໂດລາສະຫະລັດ. ໃນນັ້ນ, ມູນຄ່າການສົ່ງອອກມີປະມານ 447 ລ້ານໂດລາສະຫະລັດ, ມູນຄ່າການນໍາເຂົ້າມີປະມານ 330 ລ້ານໂດລາສະຫະລັດ ແລະເກີນດູນການຄ້າປະມານ 117 ລ້ານໂດລາສະຫະລັດ.
    ສູນຂໍ້ມູນຂ່າວສານການຄ້າຂອງ ສປປ ລາວ ເປີດເຜີຍວ່າ: ສິນຄ້າສົ່ງອອກຫຼັກມີແຮ່ທອງມີມູນຄ່າປະມານ 22 ລ້ານໂດລາສະຫະລັດ, ທອງແດງ ແລະເຄື່ອງທີ່ເຮັດດ້ວຍທອງແດງມີມູນຄ່າ ປະມານ 5 ລ້ານໂດລາສະຫະລັດ, ໝາກກ້ວຍ ມີມູນຄ່າປະມານ 23 ລ້ານໂດລາສະຫະລັດ, ຄຳປະສົມ (ຄຳແທ່ງ) ມີມູນຄ່າປະມານ 99 ລ້ານໂດລາສະຫະລັດ, ເຄື່ອງນຸ່ງຫົ່ມມີມູນຄ່າປະມານ 18 ລ້ານໂດລາສະຫະລັດ, ນໍ້າຕານມີມູນຄ່າປະມານ 6 ລ້ານໂດລາສະຫະລັດ, ຢາງພາລາມີມູນຄ່າປະມານ 54 ລ້ານໂດລາສະຫະລັດ ແລະໝາກໄມ້ (ໝາກໂມ, ໝາກນອດ, ໝາກຂາມ...) ມີມູນຄ່າປະມານ 4 ລ້ານໂດລາສະຫະລັດ ແລະຢາສູບມີມູນຄ່າປະມານ 7 ລ້ານໂດລາສະຫະລັດ ແລະເຂົ້າມີມູນຄ່າປະມານ 4 ລ້ານໂດລາສະຫະລັດ.
   ສ່ວນສິນຄ້ານໍາເຂົ້າຫຼັກມີພາຫະນະທາງບົກ (ນອກຈາກລົດຈັກ, ລົດໄຖ) ມີມູນຄ່າປະມານ 26 ລ້ານໂດລາສະຫະລັດ, ເຄື່ອງໄຟຟ້າ ແລະອຸປະກອນໄຟຟ້າມູນຄ່າປະມານ 13 ລ້ານໂດລາສະຫະລັດ, ນໍ້າມັນກາຊວນມີມູນຄ່າປະມານ 13 ລ້ານໂດລາສະຫະລັດ, ອຸປະກອນກົນຈັກ (ນອກຈາກເຄື່ອງກົນຈັກພາຫະນະ) ມີມູນຄ່າປະ ມານ 29 ລ້ານໂດລາສະຫະລັດ, ເຫຼັກ ແລະເຄື່ອງທີ່ເຮັດດ້ວຍເຫຼັກ, ເຫຼັກກ້າມີມູນຄ່າປະມານ 10 ລ້ານໂດລາສະຫະລັດ, ຊິ້ນສ່ວນອາໄຫຼ່ລົດ (ລວມທັງຢາງ, ແວ່ນ, ໂສ້...) ມູນຄ່າປະມານ 8 ລ້ານໂດລາສະຫະລັດ, ນໍ້າມັນແອັດຊັງ-ແອັດຊັງພິເສດ ມູນຄ່າປະມານ 5 ລ້ານໂດລາສະຫະລັດ ເຄື່ອງໃຊ້ທີ່ເຮັດດ້ວຍພລາສະຕິກມີມູນຄ່າປະມານ 18 ລ້ານໂດລາສະຫະລັດ, ແກ້ວປະເສີດ ຫຼືເຄິ່ງປະເສີດມີມູນຄ່າປະມານ 37 ລ້ານໂດລາສະຫະລັດ ແລະ ຝຸ່ນ (ປຸ໋ຍ) ມີມູນຄ່າປະມານ 5 ລ້ານໂດລາສະຫະລັດ.
   ບັນດາປະເທດສົ່ງອອກຫຼັກມີຈີນ 217 ລ້ານໂດລາສະຫະລັດ, ຫວຽດນາມ 72 ລ້ານໂດລາສະຫະລັດ, ໄທ 45 ລ້ານໂດລາສະຫະລັດ, ອິນເດຍ 12 ລ້ານໂດລາສະຫະລັດ ແລະ ສ ອາເມລິກາ 6 ລ້ານ ໂດລາສະຫະລັດ ສ່ວນບັນດາປະເທດທີ່ນໍາເຂົ້າຫຼັກ ມີໄທ 122 ລ້ານໂດລາສະຫະລັດ, ຈີນ 76 ລ້ານໂດລາສະຫະລັດ, ຫວຽດນາມ 27 ລ້ານໂດລາສະຫະລັດ, ຢີ່ປຸ່ນ 12 ລ້ານໂດລາສະຫະລັດ ແລະສະວິດເຊີແລນ 37 ລ້ານໂດລາສະຫະລັດ.
ມູນຄ່າການນໍາເຂົ້າ ແລະສົ່ງອອກຂອງ ສປປ ລາວ ປະຈໍາເດືອນກັນຍາປີ 2021 ນີ້ແມ່ນຍັງບໍ່ກວມເອົາມູນຄ່າການສົ່ງອອກໄຟຟ້າ.

แชร์