ສສຊ ເຂດ 1 ພົບປະພະນັກງານທະນາຄານ

  ວັນທີ 13 ມີນາ ຜ່ານມານີ້ທີ່ສະຖາບັນການທະນາຄານ, ທະນາຄານແຫ່ງ ສປປ ລາວ (ທຫລ) ນະຄອນຫຼວງວຽງຈັນ; ຄະນະພັກ-ຄະນະນໍາ ທຫລ ໂດຍມີທ່ານ ສອນໄຊ ສິດພະໄຊ ຜູ້ວ່າການ ທຫລ ໄດ້ໃຫ້ກຽດຕ້ອນຮັບບັນດາສະມາຊິກສະພາແຫ່ງຊາດ (ສສຊ)ຊຸດທີ VIII ປະຈຳເຂດເລືອກຕັ້ງທີ 1 ນະຄອນຫຼວງວຽງຈັນ ຊຶ່ງນໍາໂດຍທ່ານ  ອານຸພາບ ຕຸນາລົມ ສສຊ ຊຸດທີ VIII ປະຈຳເຂດເລືອກຕັ້ງທີ 1 ນະຄອນຫຼວງວຽງຈັນ ປະທານສະພາປະຊາຊົນນະຄອນຫຼວງວຽງ ຈັນພ້ອມຄະນະເຂົ້າພົບປະ, ຕິດຕາມ, ກວດກາ ແລະຮັບຟັງການລາຍງານການຈັດຕັ້ງປະຕິບັດວຽກງານໃນຂະແໜງການທະນາຄານ;ພ້ອມທັງເຜີຍແຜ່ຜົນສໍາເລັດຂອງກອງປະຊຸມສະໄໝສາມັນ ເທື່ອ 6 ຂອງສະພາແຫ່ງ ຊາດຊຸດທີ VIII ໂດຍມີບັນດາພະນັກງານຂັ້ນນໍາ-ຂັ້ນວິຊາການຂອງ ທຫລ ແລະທະນາຄານລັດເຂົ້າຮ່ວມ.

  ທີ່ປະຊຸມຍັງຮັບຟັງການລາຍງານສະພາບການເຄື່ອນໄຫວວຽກງານຂອງ ທຫລ ໂດຍອີງໃສ່ມະຕິກອງປະຊຸມສະພາແຫ່ງຊາດສະບັບເລກທີ 075/ສພຊ ລົງວັນທີ 17 ພະຈິກ 2017 ຊຶ່ງໃນປີ 2018 ທຫລ ໄດ້ຮັກສາສະຖຽນລະພາບ ທາງດ້ານເງິນຕາໃນທ່າມກາງຄວາມຜັນຜວນຂອງອັດຕາແລກປ່ຽນ, ລາຄານ້ຳ ມັນຢູ່ຕະຫຼາດສາກົນບວກກັບຄວາມຫຍຸ້ງຍາກທາງດ້ານງົບປະມານ ແລະບັນຫາໜີ້ສິນຄຸມເຄືອ; ຈາກສະພາບການດັ່ງກ່າວ, ທຫລ ໄດ້ດໍາເນີນນະໂຍບາຍເງິນ ຕາແບບຜ່ອນຄາຍດ້ວຍການອັດສີດເງິນເຂົ້າສູ່ລະບົບເສດຖະກິດຜ່ານສິນເຊື່ອເພື່ອຊຸກຍູ້ການຜະລິດ, ແກ້ໄຂຄວາມທຸກຍາກ ແລະ ລ່ວງໜ້າເພື່ອດຸນດ່ຽງງົບປະມານຈໍານວນໜຶ່ງ; ສືບຕໍ່ນຳໃຊ້ເຄື່ອງມືນະໂຍ ບາຍເງິນຕາທີ່ສຳຄັນຈຳນວນໜຶ່ງ, ພ້ອມນັ້ນຍັງປະຕິບັດນະໂຍບາຍອັດຕາແລກປ່ຽນຕາມກົນໄກຕະຫຼາດທີ່ມີການຄຸ້ມຄອງຂອງລັດເປັນເຄື່ອງມືຕົ້ນຕໍ, ນໍາໃຊ້ມາດຕະການບໍລິຫານໃນການຄຸ້ມຄອງເງິນຕາຕ່າງປະເທດ ແລະເອົາໃຈໃສ່ຊຸກຍູ້ທະນາຄານທຸລະກິດປັບປຸງການບໍລິການ ແລະຫັນເປັນທັນສະໄໝເພື່ອສົ່ງເສີມການຊຳລະສະສາງຜ່ານລະບົບທະນາຄານຫຼາຍຂຶ້ນ.

  ມາຮອດປະຈຸບັນຕະຫຼາດຫຼັກຊັບລາວມີບໍລິສັດຈົດທະບຽນ 9 ບໍລິສັດ, ມູນຄ່າ ຕລຊລ ເທົ່າກັບ 6,90%GDP, ມີມູນຄ່າການຊື້-ຂາຍ 90,17 ຕື້ກວ່າ ກີບ ສຳເລັດການສ້າງກົນໄກເພື່ອນຳເອົາພັນທະບັດລັດຖະບານຊື້-ຂາຍຜ່ານຕະຫຼາດຫຼັກຊັບລາວ ແລະອອກຜະລິດຕະພັນໃໝ່ໃນຕະຫຼາດຫຼັກຊັບເພື່ອດຶງດູດແກ່ການລົງທຶນ.ນອກນັ້ນ, ຍັງຄຸ້ມຄອງລະບົບທະນາຄານ ແລະສະຖາບັນການເງິນໃຫ້ມີຄວາມໜັກແໜ້ນ-ເຂັ້ມແຂງຊຶ່ງສາມາດຮັກສາສະຖຽນລະພາບເງິນ ຕາ ແລະປະຕິບັດຄາດໝາຍດ້ານເງິນຕາທີ່ສະພາແຫ່ງຊາດຮັບຮອງໄດ້ດີສົມຄວນ; ແກ້ໄຂຄໍາເຫັນຂອງປະຊາຊົນທີ່ມີຄວາມສົນໃຈຊຶ່ງຕິດພັນກັບຂະແໜງທະນາຄານທີ່ສະເໜີຜ່ານສະພາແຫ່ງຊາດຢ່າງຖືກທິດ, ເປັນທີ່ພໍໃຈຂອງສັງຄົມໃນລະດັບດີ; ຂະນະດຽວກັນ, ຍັງສະເໜີໃຫ້ ສສຊ ຊ່ວຍແນະນໍາປະຊາຊົນໄດ້ເຂົ້າໃຈວຽກງານທີ່ຕິດພັນກັບຂະແໜງທະນາຄານໂດຍສະເພາະການເຂົ້າເຖິງແຫຼ່ງທຶນຂອງທະນາຄານ.

  ໃນໂອກາດດັ່ງກ່າວທ່ານ ອານຸພາບ ຕຸນາລົມ ພ້ອມຄະນະກໍ່ໄດ້ພັດປ່ຽນກັນແຈ້ງຜົນສຳເລັດຂອງກອງປະຊຸມສະໄໝສາມັນເທື່ອ 6 ຂອງສະພາແຫ່ງຊາດຊຸດທີ VIII ໂດຍຍົກໃຫ້ເຫັນການບໍລິ ຫານລັດຂອງຄະນະລັດຖະບານທີ່ໄດ້ ແຈ້ງສະພາບການລວມໃນການຈັດຕັ້ງປະຕິບັດ ຊຶ່ງມີຫຼາຍອັນທີ່ພົ້ນເດັ່ນ ແລະ ບາງດ້ານທີ່ຈະຕ້ອງຮັບການແກ້ໄຂໃນ ຕໍ່ໜ້າ; ພ້ອມນັ້ນ, ຍັງແຈ້ງໃຫ້ເຫັນຜົນ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຜນງົບປະມານ ແລະ ທິດທາງແຜນການໃນຕໍ່ໜ້າ ແລະບັນຫາ ທີ່ສຳຄັນອື່ນໆໃນນີ້ກໍ່ມີ  11 ຂໍ້ໃຫຍ່ແຕ່ໃນທີ່ປະຊຸມຍັງໄດ້ສະເໜີຕົວຈິງ 4 ບັນຫາໃນນີ້ມີບັນຫາທາງລົດໄຟ; ລາຄາສິນຄ້າ ການແກ້ໄຂຄວາມທຸກຍາກພັດທະນາຊົນນະບົດ ແລະບັນຫາຄວາມຍຸຕິທຳໃນສັງຄົມຊຶ່ງ ສສຊ 4 ທ່ານ ໄດ້ເນັ້ນບັນຫາທີ່ເກີດຂຶ້ນຕົວຈິງເຊັ່ນ: ບັນຫາ ເສດຖະກິດຝືດເຄືອງ; ການສໍ້ລາດບັງ ຫຼວງທີ່ມີທ່າອ່ຽງເພີ່ມຂຶ້ນ;  ຄວາມບໍ່ ໂປ່ງໃສໃນຂະບວນການຍຸຕິທຳ ແລະບັນ ຫາອື່ນໆທີ່ຕ້ອງຮັບການແກ້ໄຂຢ່າງຖືກ ຕ້ອງ ແລະຮີບດ່ວນ. ນອກນີ້ທີ່ປະຊຸມຍັງໄດ້ມີການຊັກຖາມຈາກບັນດາຜູ້ເຂົ້າຮ່ວມ ແລະໄດ້ຮັບການຕອບແກ້ເປັນທີ່ແຈ່ມແຈ້ງຈາກບັນດາທ່ານ ສສຊ ທີ່ມາ ພົບປະໃນຄັ້ງນີ້.

ຂ່າວ: ຣັດສະໝີ ດວງສັດຈະ  

แชร์