ບໍ່ແກ້ວ ຕ້ອງການທຶນພັດທະນາ 2 ພັນຕື້ກວ່າກີບ

   ເພື່ອຮັບປະກັນໃຫ້ເສດຖະກິດຂະຫຍາຍຕົວໃນລະດັບ 7,9% ໃນປີ  2019 ແຂວງບໍ່ແກ້ວມີຄວາມຕ້ອງການການລົງທຶນເຂົ້າໃນການພັດທະນາເສດຖະກິດ-ສັງ ຄົມລວມທັງໝົດ 2 ພັນຕື້ກວ່າກີບເທົ່າກັບ 75,55% ຂອງ GDP ໃນນັ້ນຕົ້ນຕໍແມ່ນການລົງທຶນຈາກພາກເອກະຊົນພາຍໃນແລະຕ່າງປະເທດກວມເອົາເກືອບ 50% ຂອງລວມຍອດການລົງທຶນ.

    ອີງຕາມຂໍ້ມູນຈາກພະແນກແຜນການແລະການລົງທຶນແຂວງບໍ່ແກ້ວໃຫ້ຮູ້ວ່າ:ແຜນພັດທະນາເສດຖະກິດສັງຄົມປະຈໍາປີ 2019 ເປົ້າໝາຍລວມແມ່ນການສືບຕໍ່ແກ້ໄຂຄວາມທຸກຍາກຂອງປະຊາຊົນເພື່ອປະກອບສ່ວນໃນການນຳເອົາປະເທດຊາດຫຼຸດພົ້ນອອກຈາກສະຖານະພາບຄວາມດ້ອຍພັດທະນາໃນປີ 2020 ໂດຍແຂວງບໍ່ແກ້ວຈະນຳໃຊ້ທ່າແຮງບົ່ມຊ້ອນແລະຂໍ້ໄດ້ປຽບຕ່າງໆເປັນຕົ້ນແມ່ນການເຊື່ອມໂຍງກັບພາຍໃນ,ພາກພື້ນແລະສາກົນໂດຍສູ້ຊົນເຮັດໃຫ້ລາຍໄດ້ສະເລ່ຍໃສ່ຫົວຄົນບັນລຸ 1.979 ໂດລາຕໍ່ຄົນຕໍ່ປີແລະເຮັດໃຫ້ເສດຖະກິດຂະຫຍາຍຕົວໃນລະດັບ 7,9% ໃນນັ້ນ, ກະສິ ກຳປ່າໄມ້ເພີ່ມຂຶ້ນສະເລ່ຍ 6,3%,ອຸດສາຫະກຳເພີ່ມຂຶ້ນ 7,7%  ແລະການບໍລິການເພີ່ມຂຶ້ນ 9,7%, ພ້ອມທັງສູ້ຊົນປະຕິບັດລາຍຮັບງົບ ປະມານທັງໝົດໃຫ້ໄດ້ 104,2 ຕື້ກີບແລະລາຍຈ່າຍໃຫ້ຢູ່ໃນລະດັບ 279,24 ຕື້ກີບ, ສູ້ຊົນຜະ ລິດເຂົ້າໃຫ້ໄດ້ 95.600 ໂຕນ ໃນເນື້ອທີ່ 24.750 ເຮັກຕາ,ສູ້ຊົນມູນຄ່າສິນຄ້າສົ່ງອອກໃຫ້ໄດ້ 97,98 ລ້ານໂດລາ ເພີ່ມຂຶ້ນ 8%, ສ່ວນມູນຄ່າສິນຄ້ານຳເຂົ້າໃຫ້ໄດ້ 68 ລ້ານໂດລາໃນອັດຕາເພີ່ມຂຶ້ນ 7%, ສູ້ຊົນຈໍລະຈອນມູນຄ່າສິນຄ້າໃຫ້ໄດ້ 851 ຕື້ກີບ ເພີ່ມຂຶ້ນ 10%, ສູ້ຊົນມູນຄ່າສິນຄ້າຜ່ານແດນໃຫ້ບັນລຸ 359,78 ລ້ານໂດລາໃນອັດຕາເພີ່ມຂຶ້ນ 4%, ມູນຄ່າຜະລິດອຸດສາຫະກຳ-ຫັດ ຖະກຳ 270 ຕື້ກີບ ໃນອັດຕາເພີ່ມຂຶ້ນສະເລ່ຍ 12%, ສູ້ຊົນໃຫ້ນັກທ່ອງທ່ຽວເຂົ້າມາແຂວງບໍ່ແກ້ວ ໃຫ້ໄດ້ 352.485 ຄົນ.

    ສະນັ້ນເພື່ອເປັນການແກ້ໄຂແລະຮັບປະກັນໄດ້ການຂະຫຍາຍຕົວຂອງເສດຖະກິດມະຫາພາກໃນ ປີ 2019 ທີ່ຈະມາເຖິງນີ້ ຊຶ່ງລັດຖະບານກໍຄືການນໍາແຂວງບໍ່ແກ້ວຈຶ່ງມີຄວາມຕ້ອງການທຶນເຂົ້າໃນການພັດທະນາເສດຖະກິດ-ສັງຄົມທັງໝົດປະມານ 2.441 ຕື້ກີບ ເທົ່າກັບ 75,55% ຂອງ GDP ໃນນັ້ນ:ທຶນຈາກງົບ ປະມານບ້ວງປົກກະຕິ 45 ຕື້ກີບ ຊຶ່ງຈະສຸມໃສ່ການກໍ່ສ້າງພື້ນຖານໂຄງລ່າງແລະການແກ້ໄຂຄວາມທຸກຍາກໃຫ້ປະຊາຊົນ;ສ່ວນທຶນຊ່ວຍເຫຼືອທາງການເພື່ອ ການພັດທະນາ (ODA) ປະມານ 86 ຕື້ກີບເປົ້າໝາຍສຸມໃສ່ການກໍ່ສ້າງພື້ນຖານໂຄງລ່າງ, ເສັ້ນທາງ,ນໍ້າປະປາ, ໂຮງຮຽນ,ໂຮງໝໍ ແລະອື່ນໆ;ທຶນສິນເຊື່ອຈາກທະນາຄານໃຫ້ໄດ້ປະມານ 1.110  ຕື້ກີບ,  ສໍາລັບທຶນຈາກ ພາກເອກະຊົນພາຍໃນ ແລະຕ່າງ ປະເທດໃຫ້ໄດ້ປະມານ 1.200 ຕື້ກີບ ຊຶ່ງສຸມໃສ່ການລົງທຶນເຂົ້າໃນຂະແໜງການກະສິກໍາ,ອຸດສາຫະກໍາແລະດ້ານບໍລິການທ່ອງທ່ຽວຄົບວົງຈອນ.

   ຂໍ້ມູນໃຫ້ຮູ້ຕື່ມວ່າ:ຕໍ່ກັບການພັດທະນາໃນປີ 2019 ນີ້,ຄະນະພັກອົງການປົກຄອງແຕ່ລະຂັ້ນລວມທັງປະຊາຊົນບັນດາເຜົ່າໃນແຂວງບໍ່ແກ້ວຈະຕ້ອງໄດ້ເພີ່ມທະ ວີຄວາມຮັບຜິດຊອບໃຫ້ສູງຂຶ້ນຈັດຕັ້ງປະຕິບັດທິດທາງ,ຄາດ ໝາຍ,ວຽກຈຸດສຸມທັງສົ່ງເສີມວິສາຫະກິດຂະໜາດນ້ອຍກາງ,ເສດຖະກິດຄອບຄົວ,ກຸ່ມການຜະລິດ, ສົ່ງເສີມການລົງທຶນຂອງພາກເອກະຊົນພາຍໃນແລະຕ່າງປະເທດທັງສ້າງຕັ້ງເສດຖະກິດສະເພາະໃຫ້ເປັນຮູບປະທຳ,ສ້າງໜໍ່ ແໜງເສດຖະກິດການຮ່ວມມືຮ່ວມສຳພັນເສດຖະກິດການຜະລິດແບບຕ່ອງໂສ້ແລະທຸກການພັດ ທະນາຕ້ອງຕິດພັນກັບຂົງເຂດວັດທະນະທຳຢ່າງແຂງແຮງ.

แชร์