ເຈົ້າຂອງຕະຫຼາດນາຊາຍທອງແບ່ງນໍ້າໃຈໃຫ້ເມືອງນາຊາຍທອງສູ້ໂຄວິດ

   ເຈົ້າຂອງຕະຫຼາດໃໝ່ນາຊາຍທອງໄດ້ນຳເງິນສົດຈຳນວນ 3 ລ້ານກີບ ມອບໃຫ້ແກ່ເມືອງນາຊາຍທອງ ນະຄອນຫຼວງວຽງຈັນ ເພື່ອນຳໃຊ້ເຂົ້າໃນວຽກງານສະກັດກັ້ນ ແລະປ້ອງກັນພະຍາດໂຄວິດ-19 ໃຫ້ເບົາບາງຫຼຸດລົງເທື່ອລະໜ້ອຍ.
ການມອບ-ຮັບເງິນຊຸກຍູ້ຄັ້ງນີ້ຈັດຂຶ້ນໃນວັນທີ 14 ຕຸລາ 2021 ທີ່ຫ້ອງວ່າການປົກຄອງເມືອງນາຊາຍທອງຊຶ່ງມອບໂດຍທ່ານ ທອງດຳ ສີຫາມາຍາ ເຈົ້າຂອງຕະຫຼາດໃໝ່ນາຊາຍທອງ ແລະຕາງໜ້າຮັບໂດຍທ່ານ ວງງຄຳ ສີຫາໂຄດ ເຈົ້າເມືອງໆນາຊາຍທອງ ແລະພາກສ່ວນທີ່ກ່ຽວຂ້ອງທັງສອງຝ່າຍເຂົ້າຮ່ວມ.
    ທ່ານ ທອງດຳ ສີຫາມາຍາ ກ່າວວ່າ: ຈຳນວນເງິນທີ່ນຳມາມອບໃນຄັ້ງນີ້ເປັນການສະແດງເຖິງນໍ້າໃຈແບ່ງປັນຂອງຂ້າພະເຈົ້າໃນການຮ່ວມແຮງຮ່ວມໃຈປະກອບສ່ວນສະໜັບສະໜູນການຈັດຕັ້ງປະຕິບັດວຽກງານການປ້ອງກັນ ແລະສະກັດກັ້ນການແຜ່ລະບາດເຊື້ອພະຍາດໂຄວິດ-19 ຂອງເມືອງນາຊາຍທອງ ນະຄອນຫຼວງວຽງຈັນ.
    ຈາກນັ້ນທ່ານ ວງງຄຳ ສີຫາໂຄດ ກໍໄດ້ສະແດງຄວາມຂອບໃຈມາຍັງເຈົ້າຂອງຕະຫຼາດໃໝ່ນາຊາຍທອງທີ່ໄດ້ນຳເງິນມາມອບໃຫ້ເມືອງໃນຄັ້ງນີ້ ແລະມີຄວາມສຳຄັນຫຼາຍຕໍ່ວຽກງານການປ້ອງກັນ ແລະສະກັດກັ້ນການແຜ່ລະບາດເຊື້ອພະຍາດໂຄວິດ-19 ໃນເມືອງຂອງພວກເຮົາ, ເນື່ອງຈາກປະຈຸບັນພະຍາດດັ່ງກ່າວແມ່ນໄດ້ແຜ່ລາມເປັນວົງກວ້າງໃນເຂດຊຸມຊົນສະນັ້ນ, ເງິນຈໍານວນນີ້ພວກເຮົາຈະນຳໃຊ້ໃຫ້ເກີດປະໂຫຍດສູງສຸດ.
 ນອກຈາກນັ້ນໃນຊ້ວງດຽວກັນທ່ານ ທອງດຳ ສີຫາມາຍາ ຍັງໄດ້ປະກອບສ່ວນນຳເງິນສົດ 5 ແສນກີບມອບໃຫ້ແກ່ອົງການປົກຄອງບ້ານນາຊາຍທອງໃນການສະກັດກັ້ນ ແລະປ້ອງກັນພະຍາດໂຄວິດ-19 ຕື່ມອີກ.

แชร์