ເບຍລາວ ຊ່ວຍນໍ້າດື່ມຄະນະສະເພາະກິດຫຼວງພະບາງ

ຂ່າວ: ສີສຸວັນ

  ບໍລິສັດເບຍລາວ ສາຂາແຂວງຫຼວງພະບາງ ເປັນສ່ວນໜຶ່ງໃນການປະກອບສ່ວນຊ່ວຍເຫຼືອວຽກງານຕ້ານການລະບາດຂອງພະຍາດໂຄວິດ-19 ທີ່ພວມລະບາດຢູ່ພາຍໃນແຂວງຫຼວງພະບາງໃນປະຈຸບັນ, ທາງບໍລິສັດເບຍລາວໄດ້ສົ່ງຕົວແທນນໍາເອົານໍ້າດື່ມຫົວເສືອຈໍານວນ 150 ແພັກ, ຄິດເປັນມູນຄ່າ 4,8 ລ້ານກີບ, ມອບໃຫ້ຄະນະສະເພາະກິດຂັ້ນແຂວງທີ່ພະແນກສາທາລະນະສຸກໃນວັນທີ 12 ຕຸລາ 2021ນີ້ ເປັນກຽດກ່າວຮັບໂດຍ ທ່ານ ບຸນເລື່ອມ ມະນີວົງ ຮອງເຈົ້າແຂວງໆ ຫຼວງພະບາງ, ຫົວໜ້າຄະນະສະເພາະກິດເພື່ອປ້ອງກັນ, ຄວບຄຸມ ແລະແກ້ໄຂການລະບາດພະຍາດໂຄວິດ-19 ຂັ້ນແຂວງພ້ອມດ້ວຍຄະນະທັງສອງຝ່າຍເຂົ້າຮ່ວມ, ໂອກາດດັ່ງກ່າວທ່ານຫົວໜ້າຄະນະສະເພາະກິດກໍ່ໄດ້ສະແດງຄວາມຂອບໃຈຢ່າງສູງມາຍັງບໍລິສັດເບຍລາວສາຂາຫຼວງພະບາງທີ່ໄດ້ປະກອບສ່ວນວັດຖຸປັດໃຈເປັນນໍ້າດື່ມເຂົ້າໃນວຽກງານການຕ້ານແລະສະກັດກັ້ນໂຄວິດ-19 ແລະພ້ອມທີ່ຈະນໍາເອົາປັດໃຈດັ່ງກ່າວນໍາໄປແຈກຍາຍໃຫ້ໜ່ວຍງານທີ່ພວມປະຕິບັດໜ້າທີ່ໃຫ້ເກີດປະໂຫຍດສູງສຸດ.

   ຈາກນັ້ນຕອນບ່າຍຂອງວັນດຽວກັນທ່ານ ບຸນເລື່ອມ ມະນີວົງ ຮອງເຈົ້າແຂວງໆຫຼວງພະບາງ, ຫົວໜ້າຄະນະສະເພາະກິດເພື່ອປ້ອງກັນ, ຄວບຄຸມ ແລະແກ້ໄຂການລະບາດພະຍາດໂຄວິດ-19 ຂັ້ນແຂວງພ້ອມດ້ວຍຄະນະໄດ້ນໍາເອົາເຄື່ອງປະກອບມີ: ເຂົ້າສານຈໍານວນ 1 ໂຕນ, ມີ່ 10 ແກັດ, ນໍ້າ 50 ແພັກ ໄປຖະຫວາຍ (ມອບ) ໃຫ້ວັດຜາໂອນະຄອນຫຼວງພະບາງຊຶ່ງໄດ້ຮັບຜົນກະທົບຈາກເຊື້ອພະຍາດໂຄວິດ ແລະບໍ່ສາມາດໃຫ້ອອກໄປບິນທະບາດໄດ້ອີກຢ່າງກໍ່ມີການລະບາດເຊື້ອພະຍາດໂຄວິດຢູ່ພາຍໃນວັດຕື່ມອີກ, ສະນັ້ນທາງຄະນະສະເພາະກິດຂັ້ນແຂວງ, ນະຄອນຈຶ່ງໃຫ້ກັກກັນບໍລິເວນກ່ອນຈົນກວ່າການປິ່ນປົວຈະຫາຍດີ.

   ພ້ອມນີ້ທ່ານຮອງເຈົ້າແຂວງຫຼວງພະບາງຍັງໄດ້ມີຄໍາເຫັນຕໍ່ເຈົ້າອາວາດວັດຜາໂອໃຫ້ເອົາໃຈໃສ່ເພິ່ມຄວາມເຂັ້ມງວດໃນການຈັດຕັ້ງປະຕິບັດຕາມມາດຕະການຢ່າງເຂັ້ມງວດໂດຍສະເພາະແມ່ນເວລາສັນເຂົ້າຂອງພະ, ຈົວແມ່ນຈະໄດ້ແຍກກັນບໍ່ໃຫ້ສັນເຂົ້າໂຮມກັນຄືຜ່ານມາເພື່ອຮັກສາໃຫ້ໄດ້ໃນການຄວບຄຸມການແຜ່ລະບາດເຊື້ອພະຍາດໂຄວິດຄັ້ງນີ້.

แชร์