ລັດ ສັ່ງປາບການລັກລອບໜີພາສີ

ຂ່າວ: ຣັດສະໝີ ດວງສັດຈະ

    ບັນຫາການລັກລອບໜີພາສີຢູ່ລາວມີລັກສະນະຊໍາເຮື້ອ; ເຖິງຈະນໍາໃຊ້ເຄື່ອງມືທັນສະໄໝບວກກັບການປາບປາມຢ່າງເດັດຂາດ, ຈິງຈັງຂອງເຈົ້າໜ້າທີ່ແຕ່ບໍ່ສາມາດຢັບຢັ້ງໄດ້; ສະນັ້ນ, ລັດຖະບານກໍ່ຄືກະຊວງການເງິນ, ໄດ້ສຸມໃສ່ອັດຮູຮົ່ວຂອງລາຍຮັບງົບປະມານທັງນີ້ເປັນການຈັດຕັ້ງວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນກໍ່ຄືສ້າງຄວາມເປັນເອກະພາບລະດັບສູງໃນການຄຸ້ມຄອງ ແລະ ຕ້ານການຮົ່ວໄຫຼຂອງລາຍຮັບງົບປະມານແຫ່ງລັດທີ່ຢູ່ໃນຄວາມຮັບຜິດຊອບຂອງບັນດາກະຊວງ, ອົງການລັດທຽບເທົ່າກະຊວງ, ນະຄອນຫຼວງວຽງຈັນ, ບັນດາແຂວງ, ຂະແໜງການຂັ້ນສູນກາງ, ທ້ອງຖິ່ນໃນທົ່ວປະເທດຖືວ່າ: ເປັນການອັດຮູຮົ່ວ ຫຼືປະກາດສົງຄາມກັບລັກລອບໜີພາສີເພື່ອຄວາມໝັ້ນຄົງດ້ານເສດຖະກິດ-ການເງິນ.

     ລັດຖະບານໄດ້ອອກຄໍາສັ່ງເລກທີ 18/ນຍ, ວັນທີ 16.09.2021 ວ່າດ້ວຍການເພີ່ມທະວີການຄຸ້ມຄອງ-ຕ້ານການຮົ່ວໄຫຼຂອງລາຍຮັບງົບປະມານແຫ່ງລັດ ໂດຍມອບໃຫ້ບັນດາກະຊວງ, ອົງການລັດທຽບເທົ່າກະຊວງ, ຄະນະກໍາມະການສົ່ງເສີມ ແລະຄຸ້ມຄອງການລົງທຶນຂັ້ນສູນກາງ-ຂັ້ນແຂວງ, ຫົວໜ່ວຍງົບປະມານບໍລິຫານວິຊາການ ແລະອົງການປົກຄອງທ້ອງຖິ່ນທຸກຂັ້ນເພີ່ມທະວີຄວາມຮັບຜິດຊອບຕາມໜ້າທີ່, ຂອບເຂດສິດຂອງຕົນໃນການຈັດຕັ້ງປະຕິບັດບັນດາກົດໝາຍ, ນິຕິກໍາໃຕ້ກົດໝາຍທີ່ກໍານົດອອກໃນວຽກງານຄຸ້ມຄອງ ແລະຕ້ານການຮົ່ວໄຫຼລາຍຮັບງົບປະມານແຫ່ງລັດໂດຍໃຫ້ບັນດາກະຊວງ, ອົງການລັດທຽບເທົ່າກະຊວງ, ອົງການປົກຄອງທ້ອງຖິ່ນທຸກຂັ້ນໃຫ້ຢຸດຕິ ຫຼືລົບລ້າງບັນດານິຕິກໍາໃຕ້ກົດໝາຍທີ່ກໍານົດອອກໂດຍບໍ່ສອດຄ່ອງກັບກົດໝາຍ, ລະບຽບການຕ່າງໆຂອງການຄຸ້ມຄອງລາຍຮັບງົບ ປະມານແຫ່ງລັດ; ຄະນະກໍາມະການສົ່ງເສີມ ແລະຄຸ້ມຄອງການລົງທຶນຂັ້ນສູນກາງ ແລະຂັ້ນແຂວງເປັນເຈົ້າການເພີ່ມທະວີຄວາມຮັບຜິດຊອບຄົ້ນຄວ້າວາງມາດຕະການຈັດຕັ້ງປະຕິບັດໃຫ້ຖືກຕ້ອງເຊັ່ນ: ກົດໝາຍວ່າດ້ວຍການສົ່ງເສີມການລົງທຶນ; ວ່າດ້ວຍພາສີ (ສະບັບປັບປຸງ); ວ່າດ້ວຍການຄຸ້ມຄອງສ່ວຍສາອາກອນ; ວ່າດ້ວຍອາກອນຊົມໃຊ້; ວ່າດ້ວຍອາກອນລາຍໄດ້; ວ່າດ້ວຍອາກອນມູນຄ່າເພີ່ມ; ວ່າດ້ວຍບັນຊີ; ວ່າດ້ວຍວິສາ ຫະກິດ ແລະກົດໝາຍອື່ນທີ່ກ່ຽວຂ້ອງ.

   ກະຊວງການເງິນ ແລະຂະແໜງການເງິນທ້ອງຖິ່ນຮັບຜິດຊອບທົບທວນນະໂຍບາຍ, ກົດໝາຍ ແລະນິຕິກໍາໃຕ້ກົດໝາຍຂອງຂະແໜງການເງິນທີ່ປະກາດໃຊ້ໃນປະຈຸບັນ ແລະຄົ້ນຄວ້າສ້າງກົດໝາຍ-ນິຕິກໍາໃໝ່ເພື່ອຮັບປະກັນການຄຸ້ມຄອງລາຍຮັບຕາມຖານລາຍຮັບທີ່ມີປະຈຸບັນ ແລະທຸກທ່າແຮງບົ່ມຊ້ອນໃຫ້ຖືກຕ້ອງ, ຄົບຖ້ວນແລະເພີ່ມຂຶ້ນ, ອັດທຸກຊ່ອງຫວ່າງວ່າງທີ່ຮົ່ວໄຫຼຈາກການສວຍໃຊ້ໜ້າທີ່ຂອງເຈົ້າໜ້າທີ່ທຸກຂັ້ນ, ທຸກລະດັບ, ບຸກຄົນ, ນິຕິບຸກຄົນ ແລະການຈັດຕັ້ງເພື່ອຮັບປະກັນບໍ່ໃຫ້ສາມາດຫຼົບຫຼີກ, ເຊື່ອງອໍາພັນທະຕໍ່ງົບປະມານແຫ່ງລັດຢ່າງຂາດຕົວ, ກໍລະນີການຈັດຕັ້ງໃດໜຶ່ງຫາກຕົກລົງ ຫຼືສ້າງລະບຽບການຈັດເກັບລາຍຮັບທີ່ບໍ່ສອດຄ່ອງຕາມກົດໝາຍກໍ່ມີສິດສະເໜີລົບລ້າງ ຫຼືຢຸດຕິທັນທີ; ປະຕິຮູບກົນໄກການຄຸ້ມຄອງລາຍຮັບງົບປະມານຢ່າງແຂງແຮງ, ລວງເລິກຮອບດ້ານ...; ເພື່ອປະຕິບັດມະຕິ-ຄໍາສັ່ງ ຂອງຂັ້ນເທິງ, ລັດຖະມົນຕີກະຊວງການເງິນໄດ້ຊີ້ນໍາຄັ້ງວັນທີ 8.10.2011 ໂດຍໃຫ້ຂຶ້ນບັນຊີຕໍ່ການມີໄວ້ໃນຄອບຄອງ, ນໍາໃຊ້ຍານພາຫະນະນໍາເຂົ້າບໍ່ຖືກຕ້ອງຂອງຂອງບຸກຄົນ, ນິຕິບຸກຄົນ ແລະການຈັດຕັ້ງ,ທັງຮັບປະກັນການຈັດຕັ້ງປະຕິບັດ,ກວດກາ,ແກ້ໄຂຍານພາຫະນະນໍາເຂົ້າບໍ່ຖືກຕ້ອງໃຫ້ມີຄວາມເປັນເອກະພາບໃນຂອບເຂດທົ່ວປະເທດ.

   ເພື່ອຮັບປະກັນຜົນສໍາເລັດດັ່ງກ່າວ; ກົມພາສີໄດ້ມອບໃຫ້ພະແນກສືບສວນ-ສອບສວນ ແລະປາບປາມການລັກລອບໜີພາສີ ແລະພາສີປະຈໍານະຄອນຫຼວງ, ແຂວງໃນທົ່ວປະເທດເປັນເຈົ້າການຈັດຕັ້ງປະຕິບັດຮັບແຈ້ງເອກະສານທີ່ກ່ຽວຂ້ອງ, ກວດກາຍານພາຫະນະຕົວຈິງ ແລະ ເກັບກໍາຂໍ້ມູນທີ່ໄດ້ມາຂອງຍານພາຫະນະນໍາເຂົ້າບໍ່ຖືກຕ້ອງ, ມີໄວ້ໃນການຄອບຄອງ, ນໍາໃຊ້ຂອງບຸກຄົນ, ນິຕິບຸກຄົນ ແລະການຈັດຕັ້ງທີ່ມີຄວາມສະໝັກໃຈ, ຈິງໃຈມາແຈ້ງຕໍ່ລັດຖະການພາສີເພື່ອແກ້ໄຂໃຫ້ຖືກຕ້ອງຕາມກົດໝາຍ ແລະນິຕິກໍາໃຕ້ກົດໝາຍ; ສໍາລັບການຂຶ້ນ ບັນຊີຍານພາຫະນະຢູ່ຂັ້ນສູນກາງ, ນະ ຄອນຫຼວງໃຫ້ ຜູ້ຄອບຄອງ, ນໍາໃຊ້, ເອົາຍານພາຫະນະຕົວຈິງພ້ອມເອກະສານທີ່ກ່ຽວຂ້ອງກັບຍານພາຫະນະມາແຈ້ງຢູ່ພະແນກສືບສວນ-ສອບສວນ ແລະປາບປາມການລັກລອບໜີພາສີ; ສໍາລັບການຂຶ້ນບັນຊີຍານພາຫະນະຢູ່ຂັ້ນທ້ອງຖິ່ນໃນທົ່ວປະເທດໃຫ້ຜູ້ຄອບຄອງ, ນໍາໃຊ້, ເອົາຍານພາຫະນະຕົວຈິງພ້ອມເອກະສານທີ່ກ່ຽວຂ້ອງກັບຍານພາຫະນະມາແຈ້ງຢູ່ຫ້ອງການພາສີປະຈໍາແຂວງ; ສໍາ ລັບຜູ້ຄອບຄອງ, ນໍາໃຊ້ຍານພາຫະນະທີ່ຢູ່ແຂວງໃດໃຫ້ໄປແຈ້ງຢູ່ຫ້ອງການພາສີປະຈໍາແຂວງນັ້ນ.

   ພ້ອມນັ້ນກໍ່ປະສານສົມທົບກັບຂະແໜງໂຍທາທິການ ແລະຂົນສົ່ງດໍາເນີນການກວດກາ, ຢັ້ງຢືນຂໍ້ມູນກ່ຽວກັບພາຫະນະເຊັ່ນ: ສະພາບເຕັກນິກ, ປະເພດ, ຍີ່ຫໍ້, ຄວາມແຮງ, ເລກຈັກ, ເລກຖັງ, ປີຜະລິດ ແລະຂໍ້ມູນອື່ນທີ່ຈໍາເປັນຂອງພາຫະນະເພື່ອເປັນເອກະສານປະກອບໃນການດໍາເນີນການແກ້ໄຂຍານພາຫະນະນໍາເຂົ້າບໍ່ຖືກຕ້ອງຕາມກົດໝາຍ ແລະນິຕິກໍາໃຕ້ກົດໝາຍ; ພາຍຫຼັງທີ່ລັດຖະການພາສີໄດ້ຮັບແຈ້ງ, ກວດກາສະພາບເຕັກນິກຍານພາຫະນະຕົວຈິງ, ພ້ອມເກັບກໍາ-ບັນທຶກຂໍ້ມູນລະອຽດຂອງຜູ້ຄອບຄອງ, ນໍາໃຊ້ຍານພາຫະນະນໍາເຂົ້າບໍ່ຖືກຕ້ອງໃຫ້ລາຍງານຄືນສະຖິຕິເກັບກໍາຂໍ້ມູນພາຫະນະດັ່ງກ່າວໃຫ້ກົມພາສີເພື່ອມີທິດຊີ້ນໍາໃນຂັ້ນຕອນການຈັດຕັ້ງປະຕິບັດແກ້ໄຂເສຍພາສີ-ອາກອນໃຫ້ຖືກຕ້ອງຕາມກົດໝາຍ ແລະນິຕິກໍາໃຕ້ກົດໝາຍ; ໃຫ້ພະແນກສືບສວນ-ສອບສວນ- ປາບປາມການລັກລອບໜີພາສີ ແລະພາສີປະຈໍາແຂວງທົ່ວປະເທດ/ນະຄອນຫຼວງປະສານສົມທົບກັບຂະແໜງການກ່ຽວ ຂ້ອງ ແລະອໍານາດການປົກຄອງທ້ອງຖິ່ນດໍາເນີນການຂຶ້ນບັນຊີໃຫ້ສໍາເລັດໂດຍ ໄວ; ສໍາລັບພະແນກສືບສວນ-ສອບສວນ ແລະປາບປາມການລັກລອບໜີພາສີໄດ້ແຈ້ງໃຫ້ສັງຄົມນໍາເອົາຍານພາຫະນະນໍາເຂົ້າບໍ່ຖືກຕ້ອງທີ່ມີໄວ້ໃນຄອບຄອງ, ນໍາໃຊ້ມາແຈ້ງບໍ່ໃຫ້ເກີນວັນທີ 5.11.2021 ຖ້າກາຍເວລາທີ່ກໍານົດໄວ້ ຫຼືເຈົ້າໜ້າທີ່ກວດກາ, ຢຶດຍານພາຫະນະ ແລະຈະຖືກປະຕິບັດກົດໝາຍຢ່າງເຂັ້ມງວດ.

แชร์