ຢືດພືດຫວງຫ້າມເກືອບ 3 ໂຕນ ກຽມຂົນສົ່ງອອກນອກປະເທດ

  ເຈົ້າໜ້າທີ່ກອງກວດກາປ່າໄມ້ແຂວງສະຫວັນນະເຂດ ໄດ້ກັກລົດໂດຍສານລະຫວ່າງປະເທດວຽງຈັນ-ຫວຽດນາມ ໝາຍເລກທະບຽນກໍາແພງນະຄອນ ບຄ 9559 ໃນຂະນະທີ່ລົດດັ່ງກ່າວແລ່ນຕາມສາຍທາງເລກ 9 ບໍລິເວນຂອບເຂດ ບ້ານດົງສະຫວັນ ເມືອງເຊໂປນ ແຂວງສະຫວັນນະເຂດມຸ່ງໜ້າໄປຍັງດ່ານຊາຍແດນບ້ານແດນສະຫວັນ (ດ່ານສະຫວັນ- ລາວບາວ) ເພື່ອຈະອອກໄປປະເທດຫວຽດນາມ.

  ຊຶ່ງໃນເວລາເຈົ້າໜ້າທີ່ປ່າໄມ້ແຂວງໄດ້ເຄື່ອນໄຫວອອກກວດກາຕາມສາຍທາງໃນຕອນເຊົ້າຂອງວັນທີ 5 ມີນາ 2019 ໄດ້ພົບເຫັນລົດຄັນດັ່ງກ່າວທີ່ມີພິລຸດກໍເລີຍສັ່ງການໃຫ້ມີການກວດຄົ້ນລົດເລັ່ງດ່ວນພາຍຫຼັງການກວດກາໄດ້ພົບເຫັນພືດປ່າປະເພດຫວງຫ້າມໃນນີ້ມີພືດດອກເຜິ້ງ 6 ສາຍພັນຈໍານວນ 17 ແກັ ດ, ມີນໍ້າໜັກ 1.143 ກິໂລ, ໄມ້ຈັນແດງ 19 ກະເປົ໋າ, ໜັກ 584 ກິໂລ ແລະເອັນໄກ່ພັນ 10 ແກັດ, ໜັກ 1.100 ກິໂລ ທີ່ຊຸກເຊື່ອງໃນລົດຄັນດັ່ງກ່າວ.

  ຈາກການສືບສວນ-ສອບສວນຮູ້ວ່າ: ພືດດັ່ງກ່າວນີ້ແມ່ນເປັນຂອງພໍ່ຄ້າຄົນຫວຽດນາມທີ່ອາໄສ ແລະເໝົາຈ້າງລົດໂດຍສານເພື່ອຫຼົບຫຼີກເຈົ້າໜ້າທີ່ຂົນສົ່ງໄປຍັງປະເທດຂອງຕົນໂດຍເຈົ້າໜ້າທີ່ກໍ່ໄດ້ທໍາການຢຶດລົດພ້ອມຂອງກາງຈໍານວນດັ່ງກ່າວເພື່ອດໍາເນີນຄະດີຕາມລະບຽບກົດໝາຍຂອງບ້ານເມືອງຊຶ່ງໃນເບື້້ອງປະເພດເອັນໄກ່ພັນແມ່ນເຈົ້າໜ້າທີ່ກວດກາປ່າໄມ້ແຂວງໄດ້ມອບໃຫ້ເຈົ້າໜ້າທີ່ພາສີເປັນຜູ້ດໍາເນີນການສ່ວນການດໍາເນີນຄະດີຕໍ່ກັບຜູ້ທີ່ລະເມີດລັກລອບຊື້-ຂາຍພືດຫວງຫ້າມດັ່ງກ່າວແມ່ນຍັງບໍ່ມີລາຍງານແນວໃດແຕ່ກໍ່ຕ້ອງໄດ້ດໍາເນີນເປັນຂັ້ນເປັນຕອນ.

ຂ່າວ: ນສພ ເສດຖະກິດ-ສັງຄົມ

แชร์