ຊ່ຽວຊານແພດໝໍກວາງບິ່ງມາຊ່ວຍກວດໂຄວິດຢູ່ຄຳມ່ວນ

   ວັນທີ 11 ຕຸລາ 2021 ທ່ານ ບຸນມີ ພິມມະສອນ ປະທານສະພາປະຊາຊົນແຂວງ, ຫົວໜ້າຄະນະສະເພາະກິດເພື່ອປ້ອງກັນ, ຄວບຄຸມ ແລະແກ້ໄຂການລະບາດພະຍາດໂຄວິດ-19 ຂັ້ນແຂວງ, ພ້ອມຄະນະໄດ້ຮັບຕ້ອນຄະນະປະຕິບັດງານພິເສດກໍຄືຄະນະຊ່ຽວຊານແພດໝໍຈາກແຂວງກວາງບິ່ງ ສສ ຫວຽດນາມ ນຳໂດຍ ທ່ານ ຫງວຽນແທ໋ງ ຊວນ ຮອງຫົວໜ້າພະແນກພົວພັນການຕ່າງປະເທດແຂວງກວາງບິ່ງ ທີ່ມາເຄື່ອນໄຫວຊ່ວຍເຫຼືອໃນການກວດຫາເຊື້ອພະຍາດໂຄວິດ-19 ເພື່ອຄວບຄຸມບໍ່ໃຫ້ຂະຫຍາຍໄປສູ່ວົງກວ້າງ.


   ທ່ານ ບຸນມີ ພິມມະສອນ ກໍໄດ້ລາຍງານສະພາບລວມການລະບາດຂອງພະຍາດໂຄວິດ-19 ພາຍໃນແຂວງໂດຍນັບແຕ່ວັນທີ 1 ມັງກອນ ຫາ 11ຕຸລາ 2021 ທົ່ວແຂວງຄຳມ່ວນມີຜູ້ຕິດເຊື້ອສະສົມທັງໝົດ 2.618 ຄົນ, ຍິງ 1.139ຄົນ, ໃນນັ້ນປິ່ນປົວຫາຍດີ 1.985 ຄົນ, ກຳລັງປິ່ນປົວ 632 ຄົນ, ຍິງ126 ຄົນ, ທົ່ວແຂວງມີ 7 ສູນປິ່ນປົວ, ມີ 4 ສູນກັກກັນຂອງແຂວງ ແລະ 9 ສູນກັກກັນຢູ່ບັນດາເມືອງ, ມີຜູ້ເຂົ້າກັກກັນສະສົມທັງໝົດ 4.517 ຄົນ, ຍິງ 2.122 ຄົນ, ກັກກັນຄົບກຳນົດ 4.250 ຄົນ, ຍັງກັກກັນຢູ່ສູນ 267 ຄົນ, ຍິງ 75 ຄົນ, ເສຍຊີວິດສະສົມ 1 ກໍລະນີ, ຜ່ານມາມີບ້ານທີ່ຖືກກຳນົດເປັນບ້ານແດງທັງໝົດ 46 ບ້ານໃນ 6 ຕົວເມືອງ. ມາຮອດປະຈຸບັນແມ່ນຫຼຸດລົງເຫຼືອ 27 ບ້ານ ໃນ 4 ຕົວເມືອງ, ມີບ້ານເຫຼືອງ 5 ບ້ານໃນ 3 ຕົວເມືອງ.
   ສຳລັບວຽກງານການສັກວັກແຊງແຂວງຄຳມ່ວນໄດ້ຮັບວັກແຊງຈາກສູນກາງ 5 ຄັ້ງຄື: ວັກແຊງຊີໂນຟາມ 157.400 ໂດສ, ແອັດຕາເຊນີກາ 75.120 ໂດສ ແລະວັກແຊງຈອນສັນແອນຈອນສັນ 62.800 ໂດສ, ໄດ້ສັກໃຫ້ພະນັກງານ, ທະຫານ, ຕຳຫຼວດ, ແມ່ຍິງຖືພາ, ແມ່ຍິງກຳລັງລ້ຽງລູກດ້ວຍນົມ ແລະພໍ່ແມ່ປະຊາຊົນມາຮອດປະຈຸບັນເຂັມທີ 1 ມີຈຳນວນ 186.382 ຄົນ ແລະເຂັມທີ 2 ມີ ຈຳນວນ 125.551ຄົນ. ທຽບໃສ່ພົນລະເມືອງໃນທົ່ວແຂວງເຂັມທີ 1 ກວມ 42.4% ແລະເຂັມທີ 2 ກວມ28.6%.


ສຳລັບການຊ່ວຍເຫຼືອຈາກ ສສ ຫວຽດນາມ ໃນໄລຍະຜ່ານມາແຂວງຄຳມ່ວນໄດ້ຮັບການຊ່ວຍເຫຼືອຈາກແຂວງກວາງບິ່ງ,ແຂວງຮ່າຕິ່ງ ແລະສະຫະບໍລິສັດ COECCO ເປັນເງິນສົດຈຳນວນ 400 ລ້ານດົງ ແລະເປັນວັດຖຸອຸປະກອນຮັບໃຊ້ມູນຄ່າຫຼາຍກວ່າ 2,5 ຕື້ດົງ ປະກອບມີ: ເຄື່ອງຊ່ວຍຫາຍໃຈ, ເຄື່ອງຈັກຜະລິດອົກຊີ, ເຄື່ອງວັດ ອຸນຫະພູມ, ເຄື່ອງພົ່ນຢາຂ້າເຊື້ອ, ຊຸດ PPE, ຜ້າອັດປາກ-ດັງ, ເຈລລ້າງມື, ນໍ້າຢາຂ້າເຊື້ອ ແລະເຄື່ອງບໍລິໂພກ-ອຸປະໂພກ.


ສະເພາະການຊ່ວຍເຫຼືອຂອງແຂວງກວາງບິ່ງໃນຄັ້ງນີ້, ນອກຈາກສົ່ງທີມງານມາຊ່ວຍເຫຼືອທາງດ້ານວິຊາການໃນການກວດຫາເຊື້ອພະຍາດໂຄວິດ-19 ແລ້ວ, ຍັງໄດ້ນຳເອົາເຄື່ອງກວດ PCR, ຕູ້ ປອດເຊື້ອຂັ້ນ 2 ແລະ ອຸປະກອນການແພດທີ່ກ່ຽວຂ້ອງມາຊ່ວຍເຫຼືອແນໃສ່ຈຳກັດການແຜ່ເຊື້ອ ແລະ ກ້າວໄປສູ່ການຄວບຄຸມເຊື້ອພະ ຍາດໃຫ້ເຂົ້າສູ່ສະພາບປົກກະຕິ. ສະນັ້ນ,ການຊ່ວຍເຫຼືອຂອງເພື່ອນຫວຽດນາມໂດຍສະເພາະການຊ່ວຍເຫຼືອຂອງແຂວງກວາງບິ່ງໃນຄັ້ງນີ້ສະແດງເຖິງນໍ້າໃຈອັນບໍລິສຸດ, ເດັດດ່ຽວ, ຄວາມເປັນຫ່ວງເປັນໄຍ ແລະການຮ່ວມຕໍ່ສູ້ຢ່າງຄຽງບ່າຄຽງໄລ່ຂອງເພື່ອນຫວຽດນາມຢ່າງຈິງໃຈ ບໍ່ວ່າຈະຢູ່ໃນສະຖານະການຫຍຸ້ງຍາກກໍຄືໄລຍະຕໍ່ສູ້ກັບພະຍາດໂຄວິດ-19 ໃນປະຈຸບັນ.

แชร์