ແບ່ງ 3 ໄລຍະປະຕິບັດວາລະແຫ່ງຊາດແກ້ບັນຫາຢາເສບຕິດ

 ລັດຖະບານກໍ່ຄືກະຊວງປ້ອງກັນຄວາມສະຫງົບໄດ້ແບ່ງການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດອອກເປັນ 3 ໄລຍະທັງນີ້ກໍ່ເພື່ອເຮັດໃຫ້ຂອດປະຕິບັດຕົວຈິງມີໝາກຜົນສຳເລັດຕາມຄາດໝາຍວາງໄວ້.

  ວັນທີ 11 ຕຸລານີ້, ກະຊວງ ປກສ ໄດ້ຈັດຕັ້ງເຜີຍແຜ່ແຜນການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ (2021-2023 ) ຢູ່ທີ່ແຂວງບໍ່ແກ້ວ, ເປັນປະທານໂດຍ ພົນຕີ ດ໋ອກເຕີ ທອງເຫຼັກ ມັງໜໍ່ເມກ ຮອງລັດຖະມົນຕີ ກະຊວງ ປກສ, ມີທ່ານ ຈອມສີ ລັດຕະນະປັນຮອງເຈົ້າແຂວງບໍ່ແກ້ວ, ພ້ອມດ້ວຍຫົວໜ້າ-ຮອງຫົວໜ້າກອງບັນຊາການ ປກສ ແຂວງ, ທະຫານແຂວງ, ອົງການໄອຍະການ, ສານປະຊາຊົນ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

ໃນພິທີ, ຄະນະຮັບຜິດຊອບໄດ້ຜ່ານແຜນການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ( 2021-2023 ) ໂດຍວິທີຈັດຕັ້ງປະຕິບັດໄດ້ແບ່ງອອກເປັນ 3 ໄລຍະຄື:

  • - ໄລຍະທີ 1. ເລີ່ມແຕ່ເດືອນກັນຍາທັນວາ 2021 ແມ່ນໄລຍະກະກຽມຄວາມພ້ອມ ແລະເຊື່ອມຊຶມເອກະສານເຊັ່ນ: ຄຳສັງຂອງກົມການເມືອງສູນກາງພັກ ເລກທີ 02/ກມສພ, ລົງວັນທີ 26 ກໍລະກົດ 2021 ວ່າດ້ວຍເພີ່ມທະວີການນຳພາຊີ້ນຳຂອງຄະນະພັກແຕ່ລະຂັ້ນຕໍ່ການສະກັດກັ້ນ ແລະ ແກ້ໄຂບັນຫາຢາເສບຕິດ; ມະຕິຂອງສະພາແຫ່ງຊາດ ເລກທີ 04/ ສພຊ, ລົງວັນທີ 10 ສິງຫາ 2021 ວ່າດ້ວຍການຮັບຮອງເອົາວາລະແຫ່ງຊາດວ່າດ້ວຍ ການແກ້ໄຂບັນຫາຢາເສບຕິດ( 2021-2023); ວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ; ກົດໝາຍວ່າດ້ວຍການປັບປຸງບາງມາດຕາຂອງກົດໝາຍວ່າດ້ວຍຢາເສບຕິດ ເລກທີ02/ສພຊ, ລົງວັນທີ 9 ສິງຫາ 2021; ແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີເຖິງບັນດາ ກະຊວງ, ອົງການທຽບເທົ່າ ແລະບັນດາ ແຂວງ-ນະຄອນຫຼວງ ກ່ຽວກັບການຈັດຕັ້ງຜັນຂະຫຍາຍວາລະແຫ່ງຊາດ ແລະເອກະສານ, ນິຕິກຳອື່ນໆທີ່ກ່ຽວ ຂ້ອງ. 
  • - ໄລຍະທີ 2. ແຕ່ເດືອນມັງກອນ 2022-ເມສາ 2023 ( ໄລຍະເກັບຂໍ້ມູນວິໄຈຂໍ້ມູນ,ຈັດຕັ້ງປະຕິບັດແຜນການ ແລະແກ້ໄຂບັນຫາຢາເສບຕິດຕາມ 6 ແຜນວຽກຈຸດສຸມທີ່ໄດ້ກຳນົດໃນວາລະແຫ່ງຊາດສ້າງຄວາມຮັບຮູ້ໃນທົ່ວສັງຄົມດ້ວຍການສຶກສາອົບຮົມ, ໂຄສະນາເຜີຍແຜ່ລະບຽບກົດໝາຍ ແລະຜົນຮ້າຍ ຂອງຢາເສບຕິດ; ສ້າງຂະບວນການສະເຫຼີມສະຫຼອງວັນແຫ່ງຊາດ, ວັນສາກົນຕ້ານຢາເສບຕິດ ແລະປຸກລະດົມຂົນຂວາຍເງິນເຂົ້າກອງທຶນຄວບຄຸມ, ສະ ກັດກັ້ນ ແລະຕ້ານຢາເສບຕິດ; ລົງໂຄສະນາເຜີຍແຜ່ສຶກສາອົບຮົມບັນດາບ້ານເປົ້າໝາຍທີ່ກໍານົດໄວ້ໃຫ້ໄດ້ 80% ຂຶ້ນໄປຂອງຈຳນວນບ້ານເປົ້າໝາຍທັງ ໝົດ.

- ໄລຍະທີ 3. ແຕ່ເດືອນກັນຍາ ຫາ ເດືອນທັນວາ 2023 ( ໄລຍະສະຫຼຸບ, ປະເມີນຜົນການຈັດຕັ້ງປະຕິບັດວາລະແຫ່ງຊາດ ) ມອບໃຫ້ຄະນະພັກ-ການນຳຂັ້ນກະຊວງ, ຂະແໜງການທີ່ກ່ຽວຂ້ອງ ແລະອຳນາດການປົກຄອງທ້ອງຖິ່ນແຕ່ລະຂັ້ນຈັດຕັ້ງການສະຫຼຸບ, ປະເມີນຜົນ, ຕີລາຄາຄືນການຈັດຕັ້ງປະຕິບັດ, ຖອນຖອນບົດຮຽນຂອງວາລະແຫ່ງຊາດ ແລະຈັດຕັ້ງການຍ້ອງຍໍຊົມເຊີຍຕໍ່ກົມກອງ ແລະບຸກຄົນຜູ້ທີ່ມີຜົນງານດີເດັ່ນໃຫ້ສຳເລັດພາຍໃນເດືອນທັນວາ 2023.

แชร์