ມອບ-ຮັບໜ້າທີ່ຫົວໜ້າຄັງເງິນອຸດົມໄຊ

ຂ່າວ: ໄມພອນ

  ວັນທີ 8 ຕຸລາຜ່ານມາຫ້ອງປະຊຸມພະແນກການເງິນແຂວງໄດ້ຈັດພິທີມອບຮັບໜ້າທີ່ລະຫວ່າງຫົວໜ້າຄັງເງິນປະຈຳແຂວງອຸດົມໄຊຜູ້ເກົ່າ ແລະຜູ້ໃໝ່ເຂົ້າຮ່ວມຂອງ ທ່ານ ບຸນມີ ຈັນສະຫວັດ ຮອງຫົວໜ້າພະແນກການເງິນແຂວງອຸດົມໄຊ, ມີຫົວໜ້າ, ຂະແໜງການອ້ອມຂ້າງພະແນກ, ຫ້ອງການການເງິນເມືອງໄຊ, ພ້ອມດ້ວຍພະນັກງານວິຊາການຈາກທະນາຄານທຸລະກິດເຂົ້າຮ່ວມ.

   ພິທີໄດ້ຜ່ານຂໍ້ຕົກລົງຂອງກະຊວງການເງິນວ່າດ້ວຍການຍົກຍ້າຍຫົວໜ້າຄັງເງິນປະຈຳແຂວງອຸດົມໄຊໄປຮັບໜ້າທີ່ໃໝ່ຢູ່ຄັງເງິນແຫ່ງຊາດ, ກະຊວງການເງິນໂດຍໄດ້ຍົກຍ້າຍ ທ່ານ ນິເວດ ຟອງແສງແກ້ວ ຫົວໜ້າຄັງເງິນປະຈຳ ແຂວງອຸດົມໄຊ ຜູ້ເກົ່າໄປຮັບໜ້າທີ່ໃໝ່ຢູ່ຄັງເງິນແຫ່ງຊາດ, ກະຊວງການເງິນ ແລະ ຜ່ານຂໍ້ຕົກລົງວ່າດ້ວຍການແຕ່ງຕັ້ງຫົວໜ້າຄັງເງິນປະຈຳແຂວງອຸດົມໄຊຜູ້ໃໝ່ໂດຍໄດ້ແຕ່ງຕັ້ງ ທ່ານ ນາງ ພາວັນ ສຸພອນສີ ຮອງຫົວໜ້າຄັງເງິນປະຈຳແຂວງອຸດົມໄຊຂຶ້ນເປັນຫົວໜ້າຄັງເງິນປະຈຳ ແຂວງອຸດົມໄຊ ຜູ້ໃໝ່.

  ທ່ານ ບຸນມີ ຈັນສະຫວັດ ຮອງຫົວໜ້າພະແນກການເງິນ ແຂວງອຸດົມໄຊ ກ່າວໃນໂອກາດໂອ້ລົມຕໍ່ພິທີວ່າ: ການຈັດພິທີ ມອບ-ຮັບ ໜ້າທີ່ນີ້ແມ່ນເປັນວຽກປົກກະຕິ, ແມ່ນກົດເກນຂອງລະບົບການປັບປຸງກົງຈັກລັດ.ທັງນີ້ກໍ່ເພື່ອແນໃສ່ປັບປຸງອົງການຈັດຕັ້ງ ແລະບຸກຄະລາກອນຂອງລັດໃຫ້ມີຄວາມເຂັ້ມແຂງ ແລະພັດທະນາຂຶ້ນເລື້ອຍໆ.

ໂອກາດດັ່ງກ່າວທ່ານຍັງໄດ້ເນັ້ນໃຫ້ຜູ້ທີ່ຮັບໜ້າທີ່ໃໝ່ຈົ່ງສືບຕໍ່ຮັກສາມູນເຊື້ອນຳເອົາບົດຮຽນຈາກຜູ້ເກົ່າມາຈັດຕັ້ງຜັນຂະຫຍາຍພັດທະນາວຽກງານໃຫ້ໄດ້ຮັບຜົນສຳເລັດໃຫຍ່ຫຼວງກວ່າເກົ່າ, ເອົາໃຈໃສ່ຄົ້ນຄວ້າບັນດານິຕິກຳທີ່ກ່ຽວຂ້ອງເພື່ອນຳມາປັບປຸງແບບແຜນວິທີເຮັດວຽກໃຫ້ໄດ້ຮັບຜົນສຳເລັດ ແລະເຕົ້າໂຮມຄວາມສາມັກຄີພາຍໃນໃຫ້ມີຄວາມແໜ້ນແຟ້ນຍິ່ງໆ ຂຶ້ນ.

• 12/10/2021