ປະກາດຈັດຕັ້ງຄະນະດ່ານພາສີິສາກົນ 2 ແຫ່ງ

   ພິທີປະກາດການຈັດຕັ້ງຄະນະພາສີປະຈຳແຂວງສະຫວັນນະເຂດພ້ອມທັງປະກາດການຈັດຕັ້ງຄະນະດ່ານພາສີສາກົນຂົວມິດຕະພາບ II (ສະຫວັນນະເຂດ-ມຸກດາຫານ) ແລະດ່ານພາສີສາກົນແດນສະຫວັນລາວ-ບາວ (ລາວ-ຫວຽດນາມ) ໄດ້ຈັດຂຶ້ນໃນວັນທີ 5 ຕຸລາ 2021 ທີ່ຫ້ອງການດັ່ງກ່າວ, ໂດຍພາຍໃຕ້ການເປັນປະທານຂອງ ທ່ານ ວຽງທະວີສອນ ເທບພະຈັນ ຮອງເຈົ້າແຂວງສະຫວັນນະເຂດ, ທ່ານ ປອ ແສນສັກ ສຸລິສັກ ຫົວໜ້າພະແນກການເງິນແຂວງ, ມີບັນດາພະແນກການທີ່ກ່ຽວຂ້ອງເຂົ້າຮ່ວມ.

 ທ່ານ ສຸດໃຈ ໄຊຍະວົງ ຮອງຫົວໜ້າຄະນະຈັດຕັ້ງແຂວງໄດ້ຂຶ້ນຜ່ານຂໍ້ຕົກລົງຂອງລັດຖະມົນຕີກະຊວງການເງິນວ່າດ້ວຍການຍົກຍ້າຍ ແລະແຕ່ງຕັ້ງພະນັກງານພາສີ, ຊຶ່ງໃນນັ້ນໄດ້ຍົກຍ້າຍ ທ່ານ ສົມຫວັງ ສົມຈິນດາ ຫົວໜ້າດ່ານພາສີສາກົນຂົວມິດຕະພາບ III ແຂວງຄຳມ່ວນ, ມາຮັບໜ້າທີ່ໃໝ່ຢູ່ພາສີປະຈຳແຂວງສະຫວັນນະເຂດ, ຈາກນັ້ນກໍ່ໄດ້ຜ່ານຂໍ້ຕົກລົງວ່າດ້ວຍການແຕ່ງຕັ້ງຄະນະພາສີປະຈຳແຂວງຊຶ່ງປະກອບດ້ວຍ: ແຕ່ງຕັ້ງທ່ານ ພົມມະຈັກ ສີພັນດອນ ເມື່ອກ່ອນເປັນຫົວໜ້າກອງຄຸ້ມຄອງພາສີ VI, ມາເປັນຫົວໜ້າພາສີປະຈຳແຂວງ, ແຕ່ງຕັ້ງທ່ານ ສົມຈິດ ລາຊະວົງ ເມື່ອກ່ອນເປັນຮອງຫົວໜ້າກອງຄຸ້ມຄອງພາສີ VI, ມາເປັນຮອງຫົວໜ້າພາສີປະຈຳແຂວງ, ແຕ່ງຕັ້ງທ່ານ ແສງເພັດ ຍາດຕິວົງ ເມື່ອກ່ອນເປັນຮອງຫົວໜ້າກອງຄຸ້ມຄອງພາສີ VI, ມາເປັນຮອງຫົວໜ້າພາສີປະຈຳແຂວງ, ແຕ່ງຕັ້ງທ່ານ ສົມຫວັງ ສົມຈິນດາ ເມື່ອກ່ອນເປັນຫົວໜ້າດ່ານພາສີສາກົນຂົວມິດຕະພາບ III ແຂວງຄຳມ່ວນ, ມາເປັນຮອງຫົວໜ້າພາສີປະຈຳແຂວງ. 

    ຈາກນັ້ນກໍ່ໄດ້ຕົກລົງແຕ່ງຕັ້ງຄະນະດ່ານພາສີສາກົນຂົວມິດຕະພາບ II ຊຶ່ງໄດ້ຕົກລົງແຕ່ງຕັ້ງ ທ່ານ ຂວັນໄຊຊະນະ ຟອງສະໝຸດ ເມື່ອກ່ອນເປັນຮອງຫົວໜ້າດ່ານພາສີສາກົນຂົວມິດຕະພາບ II, ມາເປັນຫົວໜ້າດ່ານພາສີສາກົນຂົວມິດຕະພາບ II, ຍົກຍ້າຍ ແລະ ແຕ່ງຕັ້ງ ທ່ານ ກົງມາ ພຸດທະວົງ ຈາກຮອງຫົວໜ້າດ່ານພາສີສາກົນແດນສະຫວັນ, ມາເປັນຮອງຫົວໜ້າດ່ານພາສີສາກົນຂົວມິດຕະພາບ II, ທ່ານ ນາງ ອິນທະຫວາ ສາທຸພັນ ເປັນຮອງຫົວໜ້າດ່ານພາສີສາກົນຂົວມິດຕະພາບ II; ສ່ວນຄະນະດ່ານພາສີສາກົນແດນສະຫວັນໄດ້ຕົກລົງຍົກຍ້າຍ ແລະແຕ່ງຕັ້ງ ທ່ານ ຄຳຂັນ ຕານລະມະນີ ຫົວໜ້າຂະແໜງບໍລິຫານ ແລະກວດກາພາຍໃນກອງຄຸ້ມຄອງພາສີ VI, ເປັນຫົວໜ້າດ່ານພາສີສາກົນແດນສະຫວັນ,ແຕ່ງຕັ້ງທ່ານ ແກ້ວເລີດວິໃສ ໄຊຍະວົງສາ ເປັນຮອງຫົວໜ້າດ່ານພາສີສາກົນແດນສະຫວັນ, ແຕ່ງຕັ້ງທ່ານ ຄຳພອນ ຫານຊະນະ ເປັນຮອງຫົວໜ້າດ່ານພາສີສາກົນແດນສະຫວັນ, ຍົກຍ້າຍ ແລະ ແຕ່ງຕັ້ງ ທ່ານ ພອນທອງ ມະນີໄຊ ຮອງຫົວໜ້າດ່ານສາກົນຂົວມິດຕະ ພາບ II, ເປັນຮອງຫົວໜ້າດ່ານພາສີສາກົນແດນສະຫວັນ.

แชร์