ກາານໃຊ້ນ້ຳປະປາຢູ່ປາກເຊເພີ່ມຂື້ນແຕ່ການສະໜອງບໍ່ພຽງພໍ

 ລັດວິສາຫະກິດນໍ້າປະປາແຂວງຈໍາປາສັກ ຍອມຮັບວ່າການສະໜອງນໍ້າປະປາໃນນະຄອນປາກເຊຍັງບໍ່ທັນພຽງພໍກັບຄວາມຕ້ອງການຂອງຜູ້ຊົມໃຊ້ເນື່ອງຈາກວ່າກໍາລັງການຜະລິດຍັງບໍ່ສູງເທົ່າກັບຄວາມຕ້ອງການທີ່ນັບມື້ນັບເພີ່ມຂຶ້ນຂອງປະຊາຊົນ.

    ທ່ານ ເຂັມເພັດ ພັນນະເລດ ຮອງຜູ້ອໍານວຍການລັດວິສາຫະກິດນໍ້າປະປາແຂວງຈໍາປາສັກ, ໄດ້ເປີດເຜີຍຕໍ່ນັກຂ່າວໜັງສືພິມເສດຖະກິດ-ສັງຄົມປະຈໍາແຂວງໃຫ້ຮູ້ເມື່ອບໍ່ດົນມານີ້ວ່າ: ປະຈຸບັນການຜະລິດນໍ້າປະປາເພື່ອສະໜອງໃຫ້ກັບຜູ້ຊົມໃຊ້ໃນນະຄອນປາກເຊ ແຂວງຈໍາປາສັກ ແມ່ນຍັງບໍ່ທັນພຽງພໍກັບຄວາມຕ້ອງການ, ເນື່ອງຈາກວ່າກໍາລັງການຜະລິດຍັງຄົງທີ່ຄື 15 ພັນແມັດຕໍ່ວັນ, ທຽບໃສ່ຄວາມຕ້ອງການຕົວຈິງແມ່ນປະມານ 20-25 ພັນແມັດກ້ອນຕໍ່ວັນ, ດັ່ງນັ້ນຈິ່ງມີຄວາມຈໍາເປັນຈະຕ້ອງໄດ້ມີການປັບປຸງ ແລະເພີ່ມກໍາລັງການຜະລິດສູງຂຶ້ນ 5-10 ພັນແມັດກ້ອນຕໍ່ວັນຈິ່ງຈະພຽງພໍກັບຄວາມຕ້ອງການຂອງປະຊາຊົນ.

 ຢ່າງໃດກໍຕາມເນື່ອງຈາກວ່າໃນປີ 2018 ຜ່ານມາລັດວິສາຫະກິດນໍ້າປະປາແຂວງຈໍາປາສັກ ຜົນການດໍາເນີນທຸລະກິດໝົດປີມີຜົນກໍາໄລພຽງເລັກນ້ອຍບວກກັບຍັງມີໜີ້ຄ່ານໍ້າປະປາຂອງລູກຄ້າເຮັດໃຫ້ບໍ່ສາມາດມີທຶນເພື່ອຈະນໍາໃຊ້ເຂົ້າໃນການການປັງປຸງເຄື່ອງຈັກຊຶ່ງເປັນການລົງທຶນຂ້ອນຂ້າງສູງ, ສະນັ້ນຈິ່ງໄດ້ຊື້ນໍ້າປະປາຈາກບໍລິສັດເອກະຊົນພາຍໃນຈໍານວນໜຶ່ງແຕ່ກໍ່ຍັງບໍ່ທັນພຽງພໍກັບຄວາມຕ້ອງການຊົມໃຊ້ປະຈຸບັນແມ່ນຍັງລໍຖ້າການປັບປຸງຈາກໂຄງການຊ່ວຍເຫຼືອຂອງເອດິບີຊຶ່ງຄາດວ່າໃນປີນີ້ຈະໄດ້ຮູ້ຄໍາຕອບ.

  ທ່ານຮອງຜູ້ອໍານວຍການໃຫ້ຮູ້ຕື່ມວ່າ: ລັດວິສາຫະກິດນໍ້າປະປາແຂວງຈໍາປາສັກ ໄດ້ຂະຫຍາຍລະບົບນໍ້າປະປາເພື່ອໃຫ້ພໍ່ແມ່ປະຊາຊົນໄດ້ຊົມໃຊ້ນໍ້າທີ່ສະອາດ ໄດ້ແລ້ວ 3 ເມືອງ 1 ນະຄອນຄື: ເມືອງໂພນທອງ, ຈໍາປາສັກ, ເມືອງໂຂງ ແລະ ນະຄອນປາກເຊ, ດັ່ງນັ້ນເພື່ອຮັບປະກັນໃນການໃຫ້ບໍລິການທີ່ວ່ອງໄວແມ່ນພວກເຮົາໄດ້ເອົາໃຈໃສ່ທັງວຽກງານການຊ່າງ, ວຽກງານສ້ອມແປງ, ໂດຍການຕິດຕັ້ງໂທລະສັບສາຍດ່ວນຕະຫຼອດ 24 ຊົ່ວໂມງ, ທັງວັນພັກລາດສະການເສົາ -ທິດ ແມ່ນມີຄວາມກຽມພ້ອມຮັບໃຊ້ທຸກເວລາ ແລະທຸກສະຖານທີ່ເພື່ອເຮັດໃຫ້ຜູ້ຊົມໃຊ້ມີຄວາມເພີ່ງພໍໃຈ.

ຂ່າວ: ໂພທິຣາຊ   

แชร์