ສມກຈ ສ້າງຄວາມເຂັ້ມແຂງກອງທຶນສິນເຊື່ອບ້ານແຂວງວຽງຈັນ

ຂ່າວ: ຣັດສະໝີ ດວງສັດຈະ
  ສະມາຄົມການເງິນຈຸລະພາກ (ສມກຈ) ຮ່ວມກັບພະແນກແຜນການ ແລະການລົງທຶນ, ສະຫະພັນແມ່ຍິງ ແຂວງວຽງຈັນ ແລະສະຫະພັນແມ່ຍິງ ເມືອງແມດ ໄດ້ຈັດຕັ້ງການຈັດຝຶກອົບຮົມຄວາມຮູ້ກ່ຽວກັບການສະໜັບສະໜູນສ້າງຄວາມເຂັ້ມແຂງໃຫ້ແກ່ຄະນະກອງທຶນສິນເຊື່ອບ້ານທີ່ມີຄວາມຍືນຍົງ, ຄຸນນະພາບສູງ ແລະແທດເໝາະກັບຄວາມຕ້ອງການຕາມແຜນງານລາວ /030 ທີ່ຈັດຂຶ້ນເມື່ອທ້າຍເດືອນກັນຍາ 2021 ທີ່ສະໂມສອນເມືອງແມດ ຊຶ່ງດໍາເນີນເປັນເວລາ 4 ວັນ ໂດຍການເປັນປະທານຂອງທ່ານ ທອງຫວັນ ມຸງຄຸນວິໄລ ຮອງເຈົ້າເມືອງແມດ, ຜູ້ຊີ້ນໍາແຜນງານຂັ້ນເມືອງ; ມີບັນດາພະແນກການທີ່ກ່ຽວຂ້ອງຂັ້ນແຂວງ, ຂັ້ນເມືອງ, ພະນັກງານ ສມກຈ ແລະຄະນະຄຸ້ມຄອງກອງທຶນບ້ານຫ້ວຍປ່າໝາກ, ບ້ານນໍ້າເຟືອງ, ບ້ານ ປາກຍັນ, ບ້ານໂນນສະຫວາດ ແລະບ້ານສີສະອາດໃຕ້ ເຂົ້າຮ່ວມ.
  ທ່ານ ນາງ ສີສະຫວັນ ສາຍອຸດົມ ຜູ້ປະສານງານການເງິນຊົນນະບົດຂັ້ນແຂວງປະຈໍາແຂວງວຽງຈັນໄດ້ຢືນຢັນວ່າ: ການຝຶກອົບຮົມໃນຄັ້ງນີ້ເພື່ອເຮັດໃຫ້ຄະນະກອງທຶນສິນເຊື່ອບ້ານໄດ້ເຂົ້າໃຈກ່ຽວກັບກົນໄກການຄຸ້ມຄອງບໍລິຫານ ແລະການດໍາເນີນງານຂອງກອງທຶນສິນເຊື່ອບ້ານໃຫ້ມີຄວາມ ຍືນຍົງ ແລະເຂົ້າໃຈກ່ຽວກັບເຕັກນິກ, ວິທີ ການກວດສອບດ້ານການດໍາເນີນງານຂອງກອງທຶນສິນເຊື່ອບ້ານ; ຮຽນຮູ້ທັກສະ ແລະວິທີການບໍລິຫານສິນເຊື່ອເງິນກູ້ເຊັ່ນ: ການບໍລິຫານຄຸ້ມຄອງທີ່ດີສໍາລັບກອງທຶນສິນເຊື່ອບ້ານ; ການວິເຄາະສິນເຊື່ອເງິນກູ້, ການຕິດຕາມເງິນກູ້ ແລະບໍລິຫານແກ້ໄຂໜີ້ຊັກຊ້າທີ່ອາດຈະເກີດຂຶ້ນໃນກອງທຶນສິນເຊື່ອບ້ານ; ການຄວບຄຸມພາຍໃນ ແລະການກວດ ສອບພາຍໃນສໍາລັບກອງທຶນສິນເຊື່ອບ້ານ.
  ທ່ານ ນາງ ສີສະຫວັນ ສາຍອຸດົມ ຍັງຕີລາຄາຜົນໄດ້ຮັບຂອງການຝຶກອົບຮົມຕະຫຼອດໄລຍະ 4 ວັນ ໂດຍທີມງານຄູຝຶກໄດ້ເອົາໃຈໃສ່ບັນຍາຍໃນລັກສະນະວິຊາການທີ່ຕິດພັນກັບການຄຸ້ມຄອງບໍລິຫານ ແລະການດໍາເນີນງານຂອງກອງທຶນສິນເຊື່ອບ້ານຢ່າງລະອຽດ; ໃນໂອກາດດັ່ງກ່າວ, ບັນດານັກສໍາມະນາກອນໄດ້ຕັ້ງໜ້າປະກອບຄໍາຄິດຄໍາເຫັນ ແລະແລກປ່ຽນບົດຮຽນຊຶ່ງພາຍຫຼັງສໍາເລັດຝຶກອົບຮົມຄັ້ງນີ້, ຄະນະຄຸ້ມຄອງ ກອງທຶນສິນເຊື່ອບ້ານ ຈໍານວນ 5 ບ້ານ ຈະສາມາດດໍາເນີນການກວດສອບພາຍໃນກ່ຽວກັບບັນດາໜ້າວຽກຕ່າງໆຂອງເຂົາເຈົ້າເອງເພື່ອຮັບປະກັນຄວາມໂປ່ງໃສໃນການດໍາເນີນງານ ແລະ ສ້າງຄວາມເຊື່ອໝັ້ນໃຫ້ກັບສະມາຊິກ ແລະ ອົງການ ຈັດຕັ້ງຂອງບ້ານສາມາດເຮັດການບໍລິ ຫານສິນເຊື່ອໄດ້ຢ່າງມີປະສິດທິພາບ, ຫຼີກລ່ຽງບັນຫາໃນການໃຊ້ແທນຄືນຂອງສະມາຊິກ ແລະຮັບປະກັນການຂະຫຍາຍຕົວຢ່າງຕໍ່ເນື່ອງຂອງກອງທຶນສິນເຊື່ອບ້ານ; ມີການຕິດຕາມໃນການດໍາເນີນງານໃນການຈັດຕັ້ງປະຕິບັດຂອງຜູ້ໄດ້ຮັບຜົນປະໂຫຍດກໍ່ຄືການນໍາໃຊ້ເງິນກູ້ໃສ່ກິດຈະກໍາສ້າງລາຍຮັບເຂົ້າຄົວເຮືອນຂອງສະມາຊິກກອງທຶນສິນເຊື່ອ.
ເຖິງວ່າການຝຶກອົບຮົມຄັ້ງນີ້ຈະຖືກຈັດຂຶ້ນຕາມຫຼັກສູດແບບເລັ່ງລັດ, ແຕ່ສິ່ງສໍາຄັນກໍ່ຄືການນໍາເອົາຄວາມຮູ້ ແລະປະສົບການທີ່ໄດ້ຮັບໄປໝູນໃຊ້ເຂົ້າໃນວຽກງານຕົວຈິງຢູ່ໃນຂັ້ນບ້ານໃຫ້ມີປະສິດທິພາບ, ປະສິດທິຜົນສູງທີ່ສຸດ; ສໍາລັບການແນະນໍາແບບໃກ້ຊິດຕິດແທດທາງດ້ານວິຊາການຂອງພະນັກງານວິຊາການຈາກຂັ້ນແຂວງ ແລະເມືອງ ແມ່ນ ມີຄວາມສໍາຄັນຫຼາຍ; ນອກຈາກນັ້ນ, ຍັງສາມາດຖອດຖອນບົດຮຽນດ້ານດີ ໂດຍມີຄະນະພັກໄດ້ໃຫ້ທິດຊີ້ນໍາ ແລະ ອໍານວຍຄວາມສະດວກໃນການຈັດຕັ້ງ ປະຕິບັດກິດຈະກໍາໃນຄັ້ງນີ້; ມີຈໍານວນຜູ້ເຂົ້າຮ່ວມໄດ້ຕາມເປົ້າໝາຍຂອງແຜນທີ່ວາງໄວ້; ຜູ້ເຂົ້າຮ່ວມໄດ້ເອົາໃຈໃສ່ຖອດຖອນບົດຮຽນ ແລະສົນທະນາ, ຖາມ-ຕອບໂດຍອີງໃສ່ປະສົບການໃນການດໍາເນີນງານຕົວຈິງຢູ່ໃນຂັ້ນບ້ານ ແລະທາງ ສມກຈ ກໍ່ຄືພາກສ່ວນກ່ຽວຂ້ອງໄດ້ຕອບສະໜອງເຄື່ອງມື-ອຸປະກອນ ແລະ ງົບປະມານຕ່າງໆ ສໍາລັບການຝຶກອົບຮົມໄດ້ຢ່າງມີຜົນສໍາເລັດຕາມການວາງແຜນ ແລະປະຕິບັດໄດ້ດີທີ່ສຸດ.

แชร์