ມີແຜນພັດທະນາ 3 ນະຄອນໃໝ່ ໃຫ້ມີສະພາບເເວດລ້ອມທີ່ດີ ແລະໜ້າຢູ່

    ລັດຖະບານມີແຜນໃນການປັບປຸງພັດທະນາ 3 ນະຄອນໃໝ່ປະກອບດ້ວຍນະຄອນຫຼວງພະບາງ, ນະຄອນໄກສອນ ພົມວິຫານ ແລະນະຄອນປາກເຊ ໃຫ້ກາຍ ເປັນຕົວເມືອງທີ່ມີສະພາບແວດລ້ອມທີ່ດີ ແລະໜ້າຢູ່ໃນອະນາຄົດທີ່ໃກ້ຈະມາເຖິງນີ້ໂດຍຈະເລັ່ງໃສ່ 4 ໜ້າວຽກຈຸດສຸມຕົ້ນຕໍຂະນະທີ່ຜ່ານມາການສຶກສາໂຄງການດັ່ງ ກ່າວແມ່ນໄດ້ຫາລືທາງດ້ານວິຊາການມາແລ້ວຫຼາຍຄັ້ງ ແລະໄດ້ຕົກລົງເຫັນດີເປັນເອກະພາບບໍ່ວ່າຈະເປັນທາງດ້ານຄວາມຕ້ອງການ, ບູລິມະສິດຂອງນະຄອນ ແລະ ຄວາມສອດຄ່ອງກັບເປົ້າໝາຍຂອງໂຄງການ.
ເມື່ອບໍດົນຜ່ານມານີ້,ທີ່ນະຄອນຫຼວງວຽງຈັນ ໄດ້ຈັດກອງປະຊຸມສະຫຼຸບ ແລະມອບ-ຮັບບົດລາຍງານການກະກຽມການສຶກສາຄວາມເປັນໄປໄດ້ເບື້ອງຕົ້ນສໍາລັບໂຄງການລົງທຶນປັບປຸງສິ່ງແວດລ້ອມຕົວເມືອງໂດຍຜ່ານລະບົບກອງປະຊຸມທາງໄກ; ໂດຍເປັນກຽດເຂົ້າຮ່ວມເປັນປະທານຂອງທ່ານນາງ ວິໄລຄໍາ ໂພສາລາດ ຮອງລັດຖະມົນຕີ ກະຊວງໂຍທາທິການ ແລະຂົນສົ່ງ ແລະ ທ່ານ ວຽງທະວີສອນ ເທບພະຈັນ ຮອງເຈົ້າແຂວງໆສະຫວັນນະເຂດ; ມີບັນດາທ່ານຮອງເຈົ້າແຂວງໆຈໍາປາສັກ; ຮອງເຈົ້າແຂວງໆຫຼວງພະບາງ ແລະ ບັນດາທ່ານຫົວໜ້າກົມ, ຮອງຫົວໜ້າກົມ, ພາກສ່ວນຕ່າງໆຂອງກະຊວງໂຍທາທິການ ແລະຂົນສົ່ງ; ຜູ້ຕາງໜ້າກະຊວງອອ້ມຂ້າງ, ອົງການ ທັງສູນກາງ ແລະທ້ອງຖິ່ນ; ຜູ້ຕາງໜ້າຈາກທະນາຄານພັດທະນາອາຊີ (ADB) ປະຈຳສຳນັກງານໃຫຍ່ ແຫ່ງ ສປປ ລາວ ແລະ CDIA (Cities Development Initiative for Asia) ແລະຜູ້ຕາງໜ້າບໍລິສັດທີ່ປຶກສາເຂົ້າຮ່ວມ.
   ກອງປະຊຸມສະຫຼຸບ ແລະມອບ-ຮັບບົດລາຍງານການສຶກການກະກຽມການສຶກສາຄວາມເປັນໄປໄດ້ເບື້ອງຕົ້ນສໍາລັບໂຄງການລົງທຶນປັບປຸງສິ່ງແວດລ້ອມຕົວເມືອງ (Urban Environment Improvement Investment Program)(ມີຊື່ຫຍໍ້ວ່າ UEIIP), ການສຶກສານີ້ແຕ່ກ່ອນແມ່ນການກະກຽມການສຶກສາຄວາມເປັນໄປໄດ້ເບື້ອງຕົ້ນສໍາລັບໂຄງການຕົວເມືອງໜ້າຢູ່ (The PFS for ADB Livable Cities Project). ຊຶ່ງຜູ້ໃຫ້ທຶນໄດ້ສະເໜີປ່ຽນຊື່ໃນກອງປະຊຸມໄລຍະກາງ (INTERIM WORKSHOP) ມາເປັນໂຄງການລົງທຶນປັບປຸງຕົວເມືອງໜ້າຢູ່ (UEIIP).
ກອງປະຊຸມສະຫຼຸບ ແລະມອບ-ຮັບບົດລາຍງານການສຶກສາຂອງການສຶກສາຄວາມເປັນໄປໄດ້ເບື້ອງຕົ້ນໂຄງການລົງທຶນປັບປຸງສິ່ງແວດລ້ອມຕົວເມືອງ, ໂຄງການດັ່ງກ່າວນີ້ທາງຊ່ຽວຊານທີ່ປຶກສາ CDIA ໄດ້ຜັນຂະຫຍາຍຕາມນະໂຍບາຍຂອງທະນາຄານພັດທະນາອາຊີ (ADB), ໃນການສືບຕໍ່ປັບປຸງພັດທະນາຕົວເມືອງໃນ 3 ນະຄອນທີ່ສ້າງໃໝ່ຄື: ນະຄອນຫຼວງພະບາງ, ນະຄອນໄກ ສອນພົມວິຫານ ແລະນະຄອນປາກເຊ ໃຫ້ກາຍເປັນຕົວເມືອງທີ່ມີສະພາບແວດລ້ອມທີ່ດີ ແລະໜ້າຢູ່ໃນອະນາຄົດທີ່ ໃກ້ຈະມາເຖິງນີ້.
ສໍາລັບຈຸດປະສົງເປົ້າໝາຍຂອງກອງປະຊຸມນີ້ແມ່ນເພື່ອສະຫຼຸບຜົນຂອງການສຶກສາ ແລະມອບ-ຮັບບົດລາຍງານການສຶກສາຂອງໂຄງການດັ່ງກ່າວໂດຍສະເພາະແມ່ນການກຳນົດໜ້າວຽກ ແລະການປະເມີນລາຄາຂອງບັນດາກິດຈະກຳໂຄງການຍ່ອຍຕ່າງໆ ທີ່ຕິດພັນກັບບັນດາໜ້າວຽກຈຸດສຸມ 4 ໜ້າວຽກຕົ້ນຕໍຄື: 1. ການຄຸ້ມຄອງຂີ້ເຫຍື້ອ, 2. ການຄຸ້ມຄອງນໍ້າເປື້ອນ , 3. ການປັບປຸງຜັງເມືອງ ແລະພູມິທັດໃນຕົວເມືອງ ແລະ 4. ການ ສ້າງຂີດຄວາມສາມາດໃຫ້ສະຖາບັນ ແລະການປູກຈິດສໍານຶກໃຫ້ປະຊາຊົນ.
ການສຶກສາໂຄງການດັ່ງກ່າວແມ່ນໄດ້ມີການປຶກສາຫາລືທາງດ້ານວິຊາການມາຫຼາຍຄັ້ງ ແລະໄດ້ຕົກລົງເຫັນດີເປັນເອກະພາບບໍ່ວ່າຈະເປັນທາງດ້ານຄວາມຕ້ອງການ ແລະບູລິມະສິດຂອງນະຄອນ ແລະຄວາມສອດຄ່ອງກັບເປົ້າໝາຍຂອງໂຄງການ.

แชร์