ສພຂ ສາລະວັນ ທາບທາມຮ່າງກົດໝາຍ 4 ສະບັບ

ຂ່າວ: ທິດລານີ ໂຄດໂຍທາ

   ວັນທີ 7 ຕຸລາຜ່ານມາ, ສະພາປະຊາຊົນແຂວງສາລະວັນ (ສພຂ) ໄດ້ຈັດກອງປະຊຸມທາງໄກຜ່ານລະບົບ Video confer ence ເພື່ອທາບທາມຮ່າງກົດໝາຍ ຈໍານວນ 4 ສະບັບ ໂດຍການເປັນປະທານຂອງທ່ານ ນາງ ສຸນໄຖ ໄຊຍະແສງ ຮອງປະທານສະພາປະຊາຊົນແຂວງ, ມີຄະນະເລຂາທິການສະພາປະຊາຊົນແຂວງ, ສສຂ ຜູ້ປະຈຳການ ແລະສສຂ ປະຈຳເຂດເລືອກຕັ້ງ 8 ຕົວເມືອງ, ຫົວໜ້າ-ຮອງຫົວໜ້າພະແນກການອ້ອມຂ້າງແຂວງ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

  ຮ່າງກົດໝາຍ 4 ສະບັບ ຊຶ່ງແມ່ນມະຕິຂອງຄະນະປະຈໍາສະພາແຫ່ງຊາດເປັນຕົ້ນມະຕິວ່າດ້ວຍການປະເມີນການປະຕິບັດໜ້າທີ່ຂອງບຸກຄະລາກອນດຳລົງຕຳແໜ່ງທີ່ສະພາແຫ່ງຊາດເລືອກຕັ້ງ ແລະຮັບຮອງເອົາການແຕ່ງຕັ້ງ (ສະບັບປັບປຸງ) ມີ 6 ໝວດ ແລະ 18 ມາດຕາ, ຮ່າງມະຕິວ່າດ້ວຍການປະເມີນຕໍ່ຄວາມຮັບຜິດຊອບຂອງບຸກຄະລາກອນທີ່ລາຍງານ, ຊີ້ແຈງ ແລະຕອບຄຳຊັກຖາມໃນກອງປະຊຸມສະພາແຫ່ງຊາດ (ສະບັບປັບປຸງ) 5 ໝວດ, 16 ມາດຕາ, ຮ່າງມະຕິວ່າດ້ວຍການພົບປະໆຊາຊົນຂອງສະມາຊິກສະພາແຫ່ງຊາດມີ 5 ໝວດ, 20 ມາດຕາ ແລະວ່າດ້ວຍການດຳເນີນກອງປະຊຸມສະພາແຫ່ງຊາດ (ສະບັບປັບປຸງ) ປະກອບມີ 7 ໝວດ ແລະ 24 ມາດຕາ.

   ໃນກອງປະຊຸມຜູ້ເຂົ້າຮ່ວມໄດ້ພ້ອມກັນຄົ້ນຄວ້າ, ປະກອບຄຳເຫັນບາງເນື້ອໃນໃສ່ບາງມາດຕາທີ່ບໍ່ທັນຄົບຖ້ວນສົມບູນເພື່ອຮັບປະກັນໃຫ້ເນື້ອໃນດັ່ງກ່າວມີຄວາມຖືກ ຕ້ອງສອດຄ່ອງກັບສະພາບຄວາມເປັນຈິງ; ແນໃສ່ເປັນບ່ອນອີງໃນ ການຈັດຕັ້ງປະຕິບັດກ່ຽວກັບການ ປະເມີນຂອງສະມາຊິກສະພາແຫ່ງຊາດຕໍ່ຄວາມຮັບຜິດຊອບຂອງ ບຸກຄະລາກອນ, ການຈັດຕັ້ງ ແລະການເຄື່ອນໄຫວຂອງສະມາຊິກສະພາແຫ່ງຊາດ, ການປະຕິບັດຕາມສິດ ແລະໜ້າທີ່,ເພື່ອຮັບປະກັນໃຫ້ແກ່ການດຳເນີນກອງປະຊຸມສະພາແຫ່ງຊາດ ແລະ ພິຈາລະນາ, ຮັບຮອງເອົາກົດໝາຍ, ຕົກລົງບັນຫາພື້ນຖານຂອງປະເທດຊາດ ແລະ ຕິດຕາມກວດກາການເຄົາລົບປະຕິບັດ, ລັດຖະທຳມະນູນ ແລະກົດໝາຍຂອງບັນດາອົງການລັດມີປະສິດທິພາບ ແລະປະສິດທິຜົນສູງ.

แชร์