ເຮືອບິນຣັດເຊຍຕົກເສຍຊີວິດ 16 ຄົນ

  ເກີດເຫດເຮືອບິນຂະໜາດນ້ອຍແອລ-410 ຕົກໃນເມືອງເມເຊລິນ ລັດຕາຕາສະຖານຂອງຣັດເຊຍ ໃນວັນທີ 10 ຕຸລາທີ່ຜ່ານມາເຮັດໃຫ້ມີຜູ້ເສຍຊີວິດ 16 ຄົນ ແລະໄດ້ຮັບບາດເຈັບ 7 ຄົນ.

  ຕາມຂ່າວຕ່າງປະເທດລາຍງານວ່າ: ເຮືອບິນລຸ້ນແອລ-410 ຊຶ່ງມີຜູ້ໂດຍສານລວມທັງໝົດ 23 ຄົນ ເກີດອຸບັດຕິເຫດຕົກໃນປະມານ 09:23 ໂມງ ຕາມເວລາຂອງ ທ້ອງຖິ່ນໃນວັນທີ 10 ຕຸລາທີ່ຜ່ານມາຂະນະບິນຜ່ານທ້ອງຟ້າສາທາລະນະລັດຕາຕາສະຖານ ໂດຍ ເຈົ້າໜ້າທີ່ສາມາດຊ່ວຍເຫຼືອອອກມາໄດ້ 7 ຄົນ ຂະນະທີ່ອີກ 16 ຄົນເສຍຊີວິດ, ຊຶ່ງຮູບພາບທີ່ນໍາມາເຜີຍແຜ່ສະແດງໃຫ້ເຫັນສະພາບຂອງເຮືອບິນທີ່ກາງເຄິ່ງຫັກຂະນະທີ່ມີລາຍງານວ່າ: ຜູ້ທີ່ລອດຊີວິດຖືກນໍາຕົວສົ່ງໂຮງໝໍແລ້ວ.

  ທັງນີ້ເຮືອບິນແອລ-410 ພັດທະນາໃນທ້າຍປີ 1960 ໂດຍເລດບໍລິສັດສັນຊາດເຊໂກສະໂລວາກີໃນເວລານັ້ນ ແລະເລີ່ມນໍາໃຊ້ເປັນເຮືອບິນທາງການຄ້າໃນປີ 1973.

----

ໜັງສືພິມ ເສດຖະກິດ-ສັງຄົມ

แชร์