ຍ້ອງຍໍ 5 ບໍລິສັດ ຈ່າຍອາກອນຮັບເໝົາກໍ່ສ້າງສາຍສົ່ງ-ສະຖານີ ແລະ ເຂື່ອນ

 ໃນວັນທີ 13 ມີນາ 2019 ທີ່ກະຊວງການເງິນ ນະຄອນຫຼວງວຽງຈັນ ໄດ້ຈັດພິທີມອບໃບຍ້ອງຍໍໃຫ້ບັນດາບໍລິສັດຜູ້ຮັບເໝົາກໍ່ສ້າງໂຄງການສາຍສົ່ງ-ສະຖາ ນີ ແລະເຂື່ອນໄຟຟ້າທີ່ມີຜົນງານມອບອາກອນກໍາໄລເຂົ້າງົບປະມານແຫ່ງລັດປະຈໍາປີ 2017 ແລະ 2018 ໂດຍພາຍໃຕ້ການເປັນປະທານຂອງທ່ານ ສົມດີ ດວງດີ ຮອງນາຍົກລັດຖະມົນຕີກະຊວງການເງິນ, ມີບັນດາຫົວໜ້າກົມສ່ວຍສາອາກອນ, ຮອງຫົວໜ້າກົມຈັດຕັ້ງກົມສ່ວຍສາອາກອນ ແລະ ມີບັນໜ້າ ຕາງໜ້າຈາກບໍລິສັດທີ່ກ່ຽວຂ້ອງເຂົ້າຮ່ວມ.

  ຫົວໜ້າກົມສ່ວຍສາອາກອນກ່າວວ່າ: ການເກັບອາກອນກໍາໄລອັດຕາ 1% ຂອງມູນຄ່າຮັບເໝົາກໍ່ສ້າງໂຄງການສາຍສົ່ງ-ສະຖານີ ແລະເຂື່ອນໄຟຟ້າຂອງ ຟຟລ ນີ້ໄດ້ເລີ່ມແຕ່ຕົ້ນປີ 2017 ໂດຍສົມທົບກັບ ຟຟ ລາວ ແລະຂະແໜງການທີ່ກ່ຽວຂ້ອງເພື່ອກໍາເກັບຂໍ້ມູນ ແລະເຊີນບັດດາບໍລິສັດຮັບເໝົາເຂົ້າມາປຶກ ສາຫາລືຄວາມເປັນໄປໄດ້ເພື່ອໃຫ້ການເກັບອາກອນສອດຄ່ອງກັບກົດໝາຍວ່າດ້ວຍສ່ວຍສາອາກອນໃນປີ 2017 ສາມາດຈັດເກັບໄດ້ 25,68 ລ້ານໂດລາ ຂອງ 4 ບໍລິສັດຈໍານວນ 9 ໂຄງການ ແລະປີ 2018 ໄດ້ສືບຕໍ່ສ່ວນທີ່ເຫຼືອ 38 ໂຄງການ, ຜົນແມ່ນມີ 7 ບໍລິສັດຂອງຈໍານວນ 8 ໂຄງການເຫັນດີຈ່າຍອາ ກອນກຳໄລອັດຕາ 1%  ເປັນເງິນອາກອນ 11,6  ລ້ານໂດລາ, ແຕ່ຈ່າຍໂຕຈິງມີ 2 ບໍລິສັດຄື: CHMC  ແລະບໍລິສັດ Pinggao ເປັນເງິນ 2,9 ລ້ານໂດລາ ສ່ວນທີ່ເຫຼືອຈະຈ່າຍໃນປີ 2019 ແລະຈໍານວນໜຶ່ງກໍ່ຍັງລໍຖ້າສັນຍາເງິນກູ້ມີຜົນປະຕິບັດກ່ອນ.

  ສໍາລັບການຍ້ອງຍໍຄັ້ງນີ້ມີ 5 ບໍລິສັດກວມເອົາ 12 ໂຄງການທີ່ປະຕິບັດດີເດັ່ນຄື: ບໍລິສັດ Sinohydro Bureau 10, Co. Ltd ກໍ່ສ້າງເຂື່ອນໄຟຟ້ານໍ້າອູ 2 ແລະ 5 (ມອບໃນປີ 2017), ບໍລິສັດ Sinohydro Corporation, Co. Ltd ກໍ່ສ້າງເຂື່ອນໄຟຟ້ານໍ້າງື່ມ 3, ນໍ້າຄານ 2 ແລະສາຍສົ່ງ 230 ກິໂລໂວນນໍ້າອູ 5 ແລະ 6 (ມອບປີ 2017), ບໍລິສັດ China National Heavy Machinery Corportion (CHMC), ໂຄງການສາຍສົ່ງ 230 ກິໂລໂວນ ນາບົງ-ນໍ້າງື່ມ 1 - ຫີນ້ຫີບ, ໂຄງການສາຍສົ່ງ 500 ກິໂລໂວນ ສາລະວັນ-ເຊກອງ 2 ແລະ ໂຄງການເຂື່ອນໄຟຟ້ານໍ້າງື່ມ 4 (ມອບ ໃນປີ 2017 ແລະ2018), ບໍລິສັດ China International Water& Electric Corp (CWE), ໂຄງການສາຍສົ່ງ 500 ກິໂລໂວນ ຊຽງຂວາງ-ນາຊາຍທອງ (ມອບປີ 2017), ບໍລິສັດ Piggao Group international Engineering, Co. Ltd ໂຄງການສາຍສົ່ງ 230 ກິໂລໂວນ ເຊຂະໝານ 2-ເຊກອງ 2 ແລະໂຄງການ 115 ກິໂລໂວນ ຫ້ວຍ ຊາຍ-ຕົ້ນເຜິ້ງ (ມອບປີ 2018).

ຂ່າວ: ວົງມະນີ    

แชร์