ໂຮງງານໂກລິງ ລາວ ມອບເງິນສົດ ແລະເຄື່ອງປ້ອງກັນໂຄວິດໃຫ້ກະຊວງ ອຄ

   ກະຊວງອຸດສາຫະກຳ ແລະການຄ້າ(ອຄ) ໄດ້ຮັບເງິນ ແລະເຄື່ອງຊ່ວຍເຫຼືອເພື່ອຕ້ານສະກັດກັ້ນການແຜ່ລະບາດຂອງພະຍາດໂຄວິດ-19 ຈາກໂຮງງານໂກລິງລາວ ລວມມູນຄ່າ 320 ລ້ານກີບ.

 ພິທີມອບ-ຮັບມີຂຶ້ນວັນທີ 8 ຕຸລາ 2021 ທີ່ກະຊວງ ອຄ ໂດຍການເຂົ້າຮ່ວມຂອງທ່ານ ຄໍາແພງ ໄຊສົມແພງ ລັດຖະມົນຕີກະຊວງ ອຄ ພ້ອມຄະນະມີທ່ານ ໂຮຊິງຮົ້ງປະທານໂຮງງານໂກລິງລາວ ພ້ອມພະ ນັກງານເຂົ້າຮ່ວມ.

 ທ່ານ ທ່ານ ໂຮຊິງຮົ້ງ ໄດ້ກ່າວວ່າເຫັນໄດ້ຄວາມສໍາຄັນໃນການຕ້ານການແຜ່ລະບາດຂອງພະຍາດໂຄວິດ-19 ໃນປະເທດລາວເພື່ອເປັນການປະກອບສ່ວນ ແລະສະໜັບ ສະໜູນນະໂຍບາຍຂອງລັດຖະບານ, ຄະນະສະເພາະກິດຕ້ານການແຜ່ລະບາດຂອງພະຍາດໂຄວິດ-19 ສະນັ້ນທາງໂຮງງານກໍ່ໄດ້ມີງົບປະມານ ແລະ ເຄື່ອງຊ່ວຍເຫຼືອຈໍານວນໜຶ່ງມາປະກອບສ່ວນໂດຍມອບໃຫ້ກະຊວງ ອຄ ເພື່ອນໍາໃຊ້ເຂົ້າໃນວຽກງານຕ້ານ ແລະສະກັດກັ້ນການແຜ່ລະບາດຂອງພະຍາດໂຄວິດ-19.

   ທ່ານ ຄໍາແພງ ໄຊສົມແພງ ກ່າວສະແດງຄວາມຂອບໃຈມາຍັງປະທານບໍລິສັດທີ່ໄດ້ປະກອບສ່ວນເງິນ ແລະອຸປະກອນປ້ອງກັນພະຍາດໂຄວິດ-19. ພ້ອມທັງໄດ້ແຈ້ງສະພາບການຂອງການເຮັດວຽກເຄື່ອນໄຫວປ້ອງກັນພະຍາດໂຄວິດ-19 ຂອງກະຊວງ ອຄ ກໍ່ຄືຂະແໜງການອຸດສາຫະກຳ ແລະຫັດຖະກໍາເພື່ອເຮັດໃຫ້ບັນດາບໍລິສັດ, ໂຮງງານອຸດສາຫະກຳມີຄວາມເຂົ້າໃຈ ແລະມີມາດຕະການເພື່ອປ້ອງກັນການແຜ່ລະບາດຂອງພະຍາດໂຄວິດ-19 ໃນໂຮງຈັກໂຮງງານ, ເຄື່ອງດັ່ງກ່າວກະຊວງ ອຄ ຈະໄດ້ນຳໃຊ້ເຂົ້າໃນການປ້ອງກັນ, ຄວບຄຸມ ແລະສະກັດກັ້ນຕ້ານການລະບາດຂອງພະຍາດໂຄວິດ-19 ຢູ່ຂະແໜງການອຸດສາຫະກໍາ ແລະການຄ້າ ແລະຈໍານວນໝຶ່ງຈະນໍາໄປມອບຕໍ່ໃຫ້ໂຮງໝໍ ແລະສູນກັກກັນທີ່ຂາດແຄນ ແລະທີ່ມີຄວາມຕ້ອງການນຳໃຊ້ເຄື່ອງດັ່ງກ່າວ.

   ໂຮງງານໂກລິງລາວຢູ່ບ້ານຫ້ອຍນໍ້າເຢັນ ເມືອງນາຊາຍທອງ ນະຄອນຫຼວງວຽງຈັນ  ເປັນການລົງທຶນຂອງຕ່າງປະເທດ( ໂດຍທ່ານ ໂຮຊິງຮົ້ງ ນັກລົງທຶນຈີນໄຕ້ຫວັນ) ມີພະນັກງານ-ກຳມະກອນ 1.825 ຄົນ (ຍິງ 1.304 ຄົນ) ກິດຈະການຜະລິດ: ເກີບໜັງ, ເກີບຜ້າໄບ ແລະເກີບກີລາເພື່ອຈຳໜ່າຍຢູ່ພາຍໃນ ແລະສົ່ງອອກຕ່າງປະເທດເຊັ່ນ: ເອີລົບ, ສ.ເກົາຫຼ, ຍີປຸ່ນ, ຈີນ ແລະປະເທດອື່ນໆ.

   ລາຍລະອຽດເຄື່ອງທີ່ໂຮງງານນຳມາມອບປະກອບມີ: ເປັນວັດຖຸລວມມູນຄ່າ 120 ລ້ານກີບ ເຊັ່ນ: ຜ້າອັດປາກ-ດັງ 60 ແກັດ, ສະບູ 206 ແພັກ, ເຈວລ້າງມື 180 ຕຸກ, ເຄື່ອງວັດແທກອຸນຫະພູມ 17 ເຄື່ອງ, ຈັກພົ່ນທາດເຫຼົ້າ 4  ເຄື່ອງ, ຊຸດ PPE (ເສື້ອກາວ, ໝວກ) 800 ຊຸດເປັນເງິນສົດ 200 ລ້ານກີບ ລວມມູນຄ່າທັງໝົດ: 320 ລ້ານກີບ.

แชร์