ລົດໄຟລາວ-ຈີນ ເປີດໃຊ້ແນ່ນອນທ້າາຍປີນີ້ ແຕ່ເບື້ອງຕົ້ນຂົນສົ່ງສິນຄ້າກ່ອນ

ຂ່າວ: ບຸນຕຽງ ຈັນທະວົງ

 ທາງລົດໄຟລາວ-ຈີນ ຈະເປີດນໍາໃຊ້ຢ່າງເປັນທາງການແນ່ນອນໃນວັນທີ 2 ທັນວາປີນີ້ທາງລົດໄຟດັ່ງກ່າວ: ຖ້າໃນສະພາບປົກກະຕິຈະນໍາເອົາຜົນປະໂຫຍດຕົວຈິງຢ່າງຫຼວງຫຼາຍມາໃຫ້ປະເທດລາວເພາະຈະໃຊ້ເພື່ອຮັບເອົານັກທ່ອງທ່ຽວຕ່າງປະເທດເຂົ້າມາທ່ອງທ່ຽວລາວ, ລວມເຖິງການສົ່ງອອກສິນຄ້າປະເພດຕ່າງໆ ຈາກລາວອອກສູ່ຕ່າງປະເທດ ແລະຈາກຕ່າງປະເທດເຂົ້າມາລາວ ແລະອື່ນໆ.  

 ທ່ານ ພັນຄໍາ ວິພາວັນ, ນາຍົກລັດຖະມົນຕີ ແຫ່ງ ສປປ ລາວ ໃຫ້ຮູ້ໃນໂອກາດພົບປະກັບສື່ມວນຊົນທົ່ວປະເທດໂດຍຜ່ານລະບົບທາງໄກຢູ່ຫ້ອງວ່າການສໍານັກງານນາ ຍົກລັດຖະມົນຕີໃນວັນທີ 6 ຕຸລາ 2021 ວ່າ:ປະຈຸບັນລັດຖະບານພວມວາງແຜນເພື່ອເປີດເດີນລົດໄຟລາວ-ຈີນ ຢ່າງມີຈຸດສຸມ ແລະຮັບປະກັນຄວາມປອດໄພໃນທຸກດ້ານ, ໂດຍເບື້ອງຕົ້ນຈະເນັ້ນໃສ່ການຂົນສົ່ງສິນຄ້າ, ຈາກນັ້ນຈະເບິ່ງເງື່ອນໄຂຕົວຈິງເພື່ອຂົນສົ່ງນັກທ່ອງທ່ຽວຊຶ່ງມັນຮຽກຮ້ອງໃຫ້ຜູ້ປະກອບການດ້ານການທ່ອງທ່ຽວຕ້ອງໄດ້ເອົາໃຈໃສ່ຮ່ວມມືກັບລັດຖະບານ, ໃນນີ້ກະຊວງທີ່ກ່ຽວຂ້ອງຕ້ອງເປັນເຈົ້າການໃນດ້ານນີ້ໃນການຕິດຕາມ ແລະສົ່ງເສີມເພື່ອດຶງດູດນັກທ່ອງທ່ຽວຕ່າງປະເທດ ເຂົ້າມາທ່ອງທ່ຽວ, ທັງເປັນການນໍາເອົາເງິນຕາຕ່າງປະເທດເຂົ້າມາລາວແຕ່ຕ້ອງຮັບປະກັນດ້ານຄວາມປອດໄພ ແລະໃຫ້ປະຊາຊົນມີສ່ວນຮ່ວມນໍາ.

    ພ້ອມນີ້ທ່ານຍັງຢືນຢັນເພື່ອຮອງຮັບໃຫ້ແກ່ການເປີດນໍາໃຊ້ທາງລົດໄຟລາວ-ຈີນ ໃນທ້າຍປີນີ້ພາກສ່ວນທີ່ຮັບຜິດຊອບໄດ້ມີແຜນ ແລະກະກຽມວຽກງານຕ່າງໆທີ່ກ່ຽວ ຂ້ອງໄວ້ໝົດແລ້ວ.

  ສໍາລັບໂຄງການກໍ່ສ້າງທາງລົດໄຟລາວ-ຈີນ ໄດ້ຮັບການວາງສີລາລຶກການກໍ່ສ້າງຢ່າງເປັນທາງການໃນວັນທີ 2 ທັນວາ ປີ2015 ເພື່ອເປັນຂອງຂວັນສະເຫຼີມສະຫຼອງວັນສະຖາປະນາ ສປປ ລາວ ຄົບຮອບ 40 ປີ, ມີຄວາມຍາວຫຼາຍ 400 ກວ່າກິໂລແມັດ, ຜ່ານ 5 ແຂວງຂອງລາວຄື: ແຂວງຫຼວງນໍ້າທາ, ອຸດົມໄຊ, ຫຼວງພະບາງ, ແຂວງວຽງຈັນ ແລະ ນະຄອນຫຼວງວຽງຈັນ, ຊຶ່ງແມ່ນສ່ວນໜຶ່ງໃນການຈັດຕັ້ງ ແລະ ຜັນຂະຫຍາຍແຜນຍຸດທະສາດການເຊື່ອມໂຍງ-ເຊື່ອມຈອດພາກພື້ນກໍ່ຄືຍຸດທະ ສາດການຫັນປ່ຽນປະເທດທີ່ບໍ່ມີທາງອອກສູ່ທະເລກາຍເປັນປະເທດທີ່ມີທາງເຊື່ອມຈອດຂອງ ສປປ ລາວ ແລະຂໍ້ລິເລີ່ມ “ ໜຶ່ງແລວໜຶ່ງເສັ້ນທາງ ” ຂອງ ສປ ຈີນ ທີ່ສອດຄ່ອງກັບແຜນແມ່ບົດວ່າດ້ວຍການເຊື່ອມຈອດພາກພື້ນຂອງອາຊຽນໃນປີ 2025.

  ການເປີດນໍາໃຊ້ທາງລົດໄຟລາວ-ຈີນ ນອກຈາກເປັນການປະກອບສ່ວນສະເຫຼີມສະຫລອງວັນຊາດ ແຫ່ງ ສປປ ລາວ, ວັນທີ 2 ທັນວາ ຄົບຮອບ 46 ປີ ຍັງເປັນການສະເຫຼີມສະຫຼອງວັນສ້າງຕັ້ງສາຍພົວພັນທາງການທູດລາວ-ຈີນ, ວັນທີ 25 ເມສາ ຄົບຮອບ 60 ປີ ຕື່ມອີກ.

แชร์