ເມື່ອບໍ່​ດົນ​ມານີ້ ໄດ້ເກີດເຫດຝົນຕົກໜັກ ແລະຟ້າເຫຼື້ອມ ຟ້າຜ່າໃສ່ຕົ້ນໂພທີ່ຢູ່ແຄມນ້ຳແບງ ບ້ານຍໍ້ ເມືອງແບງ ແຂວງອຸດົມໄຊ ເປັນເຫດເຮັດໃຫ້ງົວຂອງປະຊາຊົນທີ່ມັດຢູ່ກ້ອງຕົ້ນໂພຕາຍ ຈຳນວນ 9 ໂຕ.

ທ່ານ ຈຸມ ປັນຍາສັກ ເຈົ້າຂອງງົວລາຍງານໃຫ້ຮູ້ວ່າ: ງົວທີ່ຕາຍທັງໝົດແມ່ນເປັນງົວຂອງຕົນເອງທີ່ລ້ຽງມາຫຼາຍປີແລ້ວລວມມີທັງໝົດ 15 ໂຕ, ການລ້ຽງແມ່ນໄດ້ປູກຫຍ້າເປັນສວນ ພ້ອມທັງໄດ້ເຮັດຄອກເປັນຢ່າງດີ ແຕ່ມາໃນໄລ​ຍະລະດູແລ້ງ ເຫັນວ່າຫຍ້າທີ່ປູກບໍ່ພຽງພໍກັບຄວາມຕ້ອງການໃຫ້ງົວກິນຈຶ່ງໄດ້ນຳເອົາງົວມາລ້ຽງຢູ່ແຄມນ້ຳແບງ ພ້ອມທັງອາໄສຕົ້ນໂພໃຫຍ່ເພື່ອເປັນຮົ່ມໃຫ້ແກ່ງົວ.

ມາຮອດຕອນແລງຂອງວັນດັ່ງກ່າວ ຕົນເອງໄດ້ນຳງົວມາຜູກໄວ້ກ້ອງຕົ້ນໂພຕາມປົກກະຕິທີ່ເຄີຍເຮັດຜ່ານມາ ພໍຮອດເວລາເວລາປະມານ 23-24 ໂມງຂອງຄືນ ວັນທີ 30 ກັນຍາ ໄດ້ເກີດເຫດຝົນຕົກໜັກ ແລະຟ້າເຫຼື້ອມແຮງ. ຈາກນັ້ນໄດ້ເກີດຟ້າຜ່າໃສ່ຕົ້ນໂພບ່ອນທີ່ຕົນເອງຜູກງົວໄວ້ ເຮັດໃຫ້ກະແສຟ້າຜ່າລົງໃສ່ງົວຕາຍຈຳນວນ 9 ໂຕ ໃນນັ້ນມີງົວເພດແມ່ຈຳນວນ 6 ໂຕ ແລະເພດຜູ້ 3 ໂຕ ຍັງເຫຼືອແຕ່ 6 ໂຕ. ເຊົ້າມື້ຕໍ່ມາ ເວລາ ປະມານ 6 ໂມງ ຕົນເອງກໍໄດ້ກະກຽມເພື່ອຈະນຳງົວໄປປ່ອຍກິນຫຍ້າຕາມປົກກະຕິຄືທຸກມື້ພໍໄປເຖິງກໍເຫັນງົວຕາຍຈໍານວນຫລາຍຢູ່ກ້ອງຕົ້ນໂພຈຶ່ງເກີດປະ​ຫຼາດໃຈວ່າງົວຕາຍຍ້ອນຫຍັງ. ຈາກນັ້ນ, ກໍໄດ້ແຈ້ງໃຫ້ສັດຕະວະແພດຂອງເມືອງແບງ ມາກວດກາຊາກຂອງງົວເພື່ອຊອກຫາສາເຫດຂອງການຕາຍ. ພ້ອມທັງໄດ້ແຈ້ງທາງອົງການປົກຄອງເມືອງເຂົ້າມາເບິ່ງນຳ.

ຜ່ານການກວດກາ, ສັນນະສູດເບິ່ງເຫດການຕົວຈິງ ປະກົດວ່າເຫັນຮອຍຟ້າຜ່າຕົ້ນໂພຈາກປາຍລົງຫາພື້ນດິນເຮັດໃຫ້ກິ່ງ, ງ່າຕົ້ນໂພຈຳນວນໜຶ່ງແຕກຫັກ ແລະ ເຫັນເປັນຮອຍຄ້າຍຄືໄຟໄໝ້ເປັນຈຸດຕາມຕົນໂຕຂອງງົວ ຊຶ່ງຄາດວ່າຖືກກະແສໄຟຈາກຟ້າຜ່າ. ຕໍ່ກັບເຫດການທີ່ເກີດຂຶ້ນເຮັດໃຫ້ເຈົ້າຂອງງົວສູນເສຍງົວ ແລະທຶນຮອນໃນການລ້ຽງດູລວມມູນຄ່າເສຍຫາຍເກືອບ 50 ລ້ານກີບ. ປະຈຸບັນພາກສ່ວນກ່ຽວຂ້ອງຂອງເມືອງໂດຍສະເພາະແມ່ນຫ້ອງການກະສິກຳ ແລະປ່າມ້ເມືອງໄດ້ແນະນຳຊ່ອງທາງໃນການຊ່ວຍເຫຼືອແກ່ເຈົ້າຂອງງົວ.

 

ຂ່າວ-ພາບ: ໄມພອນ