ໄຊຍະບູລີ ລະດົມທຶນ ແລະເຄື່ອງປ້ອງກັນໂຄວິດ ຊ່ວຍເຫລືອແຂວງຫຼວງພະບາງ

   ເພື່ອເປັນການສົມທົບທຶນຮອນປະກອບສ່ວນຊ່ວຍເຫຼືອເຂົ້າໃນວຽກງານການຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ຢູ່ແຂວງຫຼວງພະບາງ ແລະ ເປັນການໃຫ້ກໍາລັງໃຈຕໍ່ພະນັກງານ ແລະເຈົ້າໜ້າທີ່ທຸກພາກສ່ວນທີ່ເຮັດໜ້າທີ່ໃນການປ້ອງກັນ, ຄວບຄຸມ ແລະແກ້ໄຂການລະບາດຂອງພະຍາດ ໂຄວິດ-19 ໃຫ້ໄດ້ຮັບໝາກຜົນ ແລະຕອບໂຕ້ກັບພະຍາດດັ່ງໄດ້ຢ່າງວ່ອງໄວ, ທັນເຫດການ,ຊຶ່ງແຂວງຫລວງພະບາງກໍເປັນແຂວງໃກ້ຄຽງ ແລະມີການພົວພັນຊ່ວຍເຫຼືອເຊິ່ງກັນ ແລະ ກັນກັບແຂວງໄຊຍະບູລີດ້ວຍດີຕະຫຼອດມາ.


   ໃນວັນທີ 7 ຕຸລາ 2021, ທີ່ຫ້ອງວ່າການແຂວງໄຊຍະບູລີໄດ້ລະດົມທຶນ ແລະເຄື່ອງປ້ອງກັນ ໂຄວິດ-19 ຈາກບັນດານັກທຸລະກິດ, ຜູ້ປະກອບການ ແລະບັນດາພະແນກການ-ກົມກອງອ້ອມຂ້າງແຂວງໄຊຍະບູລີ ເພື່ອຈະນໍາເອົາເຄື່ອງດັ່ງກ່າວໄປປະກອບສ່ວນຊ່ວຍແຂວງຫຼວງພະບາງໃນການຕອບໂຕ້ຕໍ່ການແຜ່ລະບາດຂອງພະຍາດໂຄວິດ-19.

   ການລະດົມທຶນຄັ້ງນີ້ໄດ້ມີບັນດາຫົວໜ່ວຍທຸລະກິດ, ຜູ້ປະກອບການ, ຫ້າງຮ້ານ ແລະບັນດາພະແນກການ, ກົມກອງອ້ອມຂ້າງແຂວງນໍາເອົາວັດຖຸປັດໄຈເປັນຕົ້ນແມ່ນ: ນໍ້າດື່ມ, ຜ້າປິດປາກ, ໜ້າກາກໃສ, ຈຽວລ້າງມື, ຊຸດປ້ອງກັນໂຄວິດ-19 ແລະເງິນສົດຈໍານວນໜຶ່ງມາມອບໃຫ້ແກ່ຄະນະສະເພາະກິດຕ້ານ ແລະສະກັດກັ້ນການແຜ່ລະບາດຂອງພະຍາດໂຄວິດ-19 ແຂວງໄຊຍະບູລີ, ໂດຍມີທ່ານ ເພັດພິໄຊ ສູນວິໄລ ຮອງເຈົ້າແຂວງ ຫົວໜ້າຄະນະສະເພາະກິດຂັ້ນແຂວງພ້ອມຄະນະ, ເປັນຜູ້ຮັບ, ພ້ອມທັງກ່າວຄຳຂອບໃຈ ແລະສະແດງຄວາມຍ້ອງຍໍຊົມເຊີຍຕໍ່ທຸກພາກສ່ວນທີ່ໄດ້ສົມທົບທຶນຮອນ, ເຄື່ອງໃຊ້ຕ່າງໆເພື່ອຊ່ວຍແຂວງຫຼວງພະບາງ, ເຄື່ອງດັ່ງກ່າວແມ່ນຈະໄດ້ນໍາໄປມອບຕໍ່ໃຫ້ຄະນະສະເພາະກິດປ້ອງກັນ, ຄວບຄຸມ ແລະແກ້ໄຂການລະບາດຂອງພະຍາດ ໂຄວິດ-19 ແຂວງຫຼວງພະບາງ ໃນວັນທີ 8 ຕຸລາ ປີນີ້, ນໍາໂດຍ ທ່ານ ເພັດພິໄຊ ສູນວິໄລ ຮອງເຈົ້າແຂວງ ຫົວໜ້າຄະນະສະເພາະກິດຂັ້ນແຂວງ ພ້ອມຄະນະ.

ຂ່າວ-ພາບ: ອຸ່ນເຮືອນ ໂພທິລັກ

แชร์