ອາກອນອຸດົມໄຊ ວາງຄາດໝາຍສູ້ຊົນເກັບລາຍຮັບໃຫ້ໄດ້ 105 ຕື້ກວ່າກີບ

  ໃນປີ2019 ນີ້ ສ່ວຍສາອາກອນ ແຂວງອຸດົມໄຊ ໄດ້ວາງຄາດໝາຍສູ້ຊົນໃນການຈັດເກັບລາຍຮັບອາກອນໃຫ້ໄດ້ຕາມທິດທາງແຜນການກໍຄືຕົວເລກລວມທີ່ສະພາປະຊາຊົນແຂວງອຸດົມໄຊ ໄດ້ຮັບຮອງເອົາໃນກອງປະຊຸມຄື 105 ຕື້ກວ່າກີບ ທຽບໃສ່ປີກ່ອນຫຼຸດລົງ 7,8%.

  ໃນກອງປະຊຸມສະຫຼຸບຕີລາຄາຜົນການເຄື່ອນໄຫວຈັດຕັ້ງປະຕິບັດວຽກງານສ່ວຍສາອາກອນປະຈຳປີ 2018 ແລະທິດທາງແຜນການ 2019 ຂອງແຂວງອຸດົມໄຊທີ່ຈັດຂຶ້ນເມື່ອບໍ່ດົນມານີ້ໄດ້ຍົກໃຫ້ເຫັນທິດທາງແຜນການທີ່ຈະສືບຕໍ່ໃນການເຄື່ອນໄຫວວຽກງານຈັດເກັບລາຍຮັບອາກອນຊຶ່ງທົ່ວແຂວງຕ້ອງປະຕິ ບັດໃຫ້ບັນລຸ 105.787,91 ລ້ານກີບ ທຽບໃສ່ປີ 2018 ຫຼຸດລົງ 7,8% ໃນນັ້ນອາກອນ ປະເພດຕ່າງໆຈຳນວນ 80 ຕື້ກວ່າກີບ,ຄ່າທໍານຽມຕ່າງໆຈຳນວນ 3 ຕື້ກວ່າກີບ, ລາຍຮັບວິຊາການ ແລະກອງທຶນຕ່າງໆ 16 ຕື້ກວ່າກີບ ແລະລາຍຮັບຈາກທີ່ດິນຈຳນວນ 4 ຕື້ກວ່າກີບ.

  ນອກນັ້ນຍັງໄດ້ກໍານົດ ແລະແບ່ງຕົວເລກໃຫ້ກັບບັນດາເມືອງໃນການຈັດເກັບລາຍຮັບໃຫ້ໄດ້ຕາມແຜນການລວມ 47 ຕື້ກວ່າກີບ ໃນນັ້ນເມືອງໄຊຕ້ອງປະ ຕິບັດໃຫ້ໄດ້ 9,9 ຕື້ກວ່າກີບ, ເມືອງຫຼາ 2,6 ຕື້ກວ່າກີບ, ນາໝໍ້ 6,2 ຕື້ກວ່າກີບ, ແບງ 4,9 ຕື້ກວ່າກີບ, ຮຸນ 14 ຕື້ກວ່າກີບ, ປາກແບງ 4,5 ຕື້ກວ່າກີບ ແລະເມືອງງາ 5,2 ຕື້ກວ່າກີບ.

  ເພື່ອຮັບປະກັນເຮັດໃຫ້ບັນດາຄາດໝາຍໃນການຈັດເກັບລາຍຮັບຂອງສ່ວຍສາອາກອນທົ່ວແຂວງບັນລຸໄດ້ຕາມເປົ້າໝາຍນັ້ນພະແນກສ່ວຍສາອາກອນແຂ ວງອຸດົມໄຊ ຍັງໄດ້ກຳນົດທິດທາງລວມຕື່ມອີກໂດຍສະເພາະແມ່ນຕ້ອງໄດ້ເອົາໃຈໃສ່ສຶກສາອົບຮົມທາງດ້ານການເມືອງແນວຄິດໃຫ້ແກ່ສະມາຊິກພັກ, ພະນັກ ງານລັດຖະກອນພາຍໃນຂະແໜງສ່ວຍສາອາກອນຢ່າງເປັນປົກກະຕິ, ເອົາໃຈໃສ່ຜັນຂະຫຍາຍ ແລະຈັດຕັ້ງປະຕິບັດ 4 ເປົ້າໝາຍຕົ້ນຕໍ ແລະ11 ຍຸດທະສາ ດຍ່ອຍໃນແຜນພັດທະນາຂະແໜງສ່ວຍສາອາກອນ ປີ 2018-2020, ປັບປຸງກົນໄກການຄຸ້ມຄອງເກັບລາຍຮັບສ່ວຍສາອາກອນໃຫ້ມີປະສິດທິພາບ ແລະທັນສະໄໝກວ່າເກົ່າ, ເຜີຍແຜ່ໂຄສະນາບັນດານິຕິກຳກ່ຽວກັບສ່ວຍສາອາກອນໃຫ້ທົ່ວສັງຄົມໄດ້ຮັບຊາບ ແລະອື່ນໆ.

ຂ່າວ: ຄານມະນີ

แชร์