ຮ້ານຂາຍເຄື່ອງຍ່ອຍ ຢູ່ແຂວງເຊກອງ ໄດ້ຮັບຜົນກະທົບຈາກການແຜ່ລະບາດພະຍາດໂຄວິດ

   ຄືພວກເຮົາຫຼາຍຄົນຮູ້ນໍາກັນແລ້ວວ່າໃນໄລຍະການແຜ່ລະບາດຂອງພະຍາດໂຄວິດ-19 ໃນໄລຍະຜ່ານມາກໍຄືປະຈຸບັນໄດ້ສົ່ງຜົນເຮັດໃຫ້ຫຼາຍໆກິດຈະການໄດ້ປິດໂຕລົງ ຫຼືຢຸດໃຫ້ບໍລິການຊົ່ວຄາວເຊັ່ນ: ຕະຫຼາດສົດ, ຮ້ານອາຫານ ແລະຮ້ານຂາຍເຄື່ອງຍ່ອຍຕ່າງໆ ແລະສະຖາບັນຕ່າງໆເຊັ່ນ: ໂຮງຮຽນໄດ້ໂຈະການຮຽນ-ການສອນຊົ່ວຄາວຍ້ອນການແຜ່ລະບາດຂອງພະຍາດໂຄວິດ-19 ໃນນີ້ກິດຈະການຮ້ານຂາຍເຄື່ອງຍ່ອຍ “ ຮ້ານວັນນາ “ ທີ່ຕັ້ງຢູ່ບ້ານເພຍໃໝ່ ເມືອງລະມາມ ແຂວງເຊກອງ ກໍເປັນອີກໜຶ່ງຮ້ານທີ່ໄດ້ຮັບຜົນທົບບໍ່ໜ້ອຍ.


   ທ່ານ ນາງ ເອັນ ຢວດຖິ່ນຈຶງ ຜູ້ປະກອບການຮ້ານຂາຍເຄື່ອງຍ່ອຍ “ ຮ້ານວັນນາ “ ໄດ້ໃຫ້ສໍາພາດຕໍ່ສື່ມວນຊົນແຂວງເຊກອງໃນວັນທີ 5 ຕຸລາ 2021 ນີ້ວ່າ: ພາຍຫຼັງການແຜ່ລະບາດຂອງພະຍາດໂຄວິດ-19 ໄດ້ແຜ່ລາມອອກສູ່ວົງກວ້າງທັງພາຍໃນ ແລະຕ່າງປະເທດເວົ້າລວມ, ເວົ້າສະເພາະກໍຄືແຂວງເຊກອງພວກເຮົາເຖິງວ່າມີຈໍານວນຜູ້ຕິດເຊື້ອບໍ່ຫຼາຍແຕ່ກໍໄດ້ສົ່ງຜົນກະທົບຫຼາຍໆດ້ານ ໂດຍສະເພາະໄດ້ເຮັດໃຫ້ບັນຍາກາດການສ້າງເສດຖະກິດ, ການຊື້-ຂາຍມິດງຽບ, ບໍ່ຄຶກຄື້ນຄືເມື່ອ

ກ່ອນ; ເປັນຕົ້ນຮ້ານຂອງຂ້າພະເຈົ້າໃນປີຜ່ານມາແຕ່ບໍ່ທັນມີການແຜ່ລະບາດຂອງພະຍາດໂຄວິດ-19 ມີລາຍຮັບຈາການຂາຍເຄື່ອງຍ່ອຍແຕ່ລະວັນປະມານ 9-10 ລ້ານຕໍ່ວັນ, ແຕ່ປະຈຸບັນ ແມ່ນຂາຍບໍ່ດີ ຂາຍໄດ້ປະມານພຽງແຕ່ 4-5 ລ້ານກີບຕໍ່ວັນ, ເຫັນວ່າຫຼຸດລື່ນກັນຫຼາຍພໍສົມຄວນສາເຫດຕົ້ນໆ ອາດເປັນຍ້ອນປະຊາຊົນມີຄວາມຢ້ານກົວບໍ່ກ້າອອກຈາກເຮືອນ, ການທໍາມາຄ້າຂາຍພົບຄວາມຫຍຸ້ງຍາກເຮັດໃຫ້ເສດຖະກິດຝືດເຄືອງ.


   ທ່ານ ນາງ ເອັນ ຢວດຖິ່ນຈຶງ ກ່າວຕື່ມວ່າ: ແຕ່ແນວໃດກໍຕາມໃນໄລຍະທີ່ມີການແຜ່ລະບາດຂອງພະຍາດໂຄວິດ-19 ຮ້ານພວກເຮົາກໍໄດ້ເຂັ້ມງວດໃນການປະຕິບັດຕາມມາດຕະການທີ່ທາງຄະນະສະເພາະກິດວາງອອກຢ່າງເຂັ້ມງວດເປັນຕົ້ນທາງຮ້ານໄດ້ໃຊ້ເຊືອກຟາງຢັງອ້ອມຮ້ານ ແລະມີເຈວແອວກໍຮໍ ຫຼືສະເປໄວ້ໃຫ້ລູກຄ້າທີ່ມາຊື້ເຄື່ອງໃນຮ້ານຢ່າງເປັນປະຈໍາພ້ອມທັງຮັກສາໄລຍະຫ່າງລະຫວ່າງຜູ້ຊື້ ແລະຜູ້ຂາຍທັງນີ້ເພື່ອປ້ອງກັນບໍ່ໃຫ້ການແຜ່ລະບາດຂອງພະຍາດໂຄວິດ-19 ຂະຫຍາຍຕົວອອກສູ່ວົງກວ້າງ.


ຂ່າວ: ພຸດທະສອນ 58994555

แชร์