ກະສິກຳກັບຕໍ່າຫູກພາຄອບຄົວດີຂື້ນ

ຂ່າວ: ຣັດສະໝີ ດວງສັດຈະ

   ວຽກງານຫັດຖະກໍາ ຕໍ່າຜ້າ-ຈັກສານແມ່ນວຽກທີ່ຕິດພັນກັບວິຖີຊີວິດຂອງຊາວລາວມາແຕ່ບັນພະບຸຣຸດ; ມາເຖິງທຸກມື້ນີ້, ຍັງຄົງຄຽງຄູ່ກັບການດໍາລົງຊີວິດ ແລະໄດ້ເຈືອຈານໃນການທໍາມາຫາກິນ ຫຼືສ້າງສັນປັ້ນແຕ່ງລວດລາຍໃນຫັດຖຳກໍາຕໍ່າຫູກທໍໄໝສາມາດສ້າງລາຍຮັບໃຫ້ຄອບຄົວປະກອບສ່ວນເຂົ້າໃນການເພີ່ມຍອດຜະລິດຕະ ພັນລວມຂອງບ້ານ; ດັ່ງຄອບຄົວຂອງທ່ານ ນາງ ນຸ້ຍ ພົມມະລາ ອາຍຸ 50 ປີ, ປະຊາຊົນ ບ້ານປາກແຖບ, ເມືອງສັງທອງ, ນະຄອນຫຼວງວຽງຈັນ ກໍ່ເປັນຄອບຄົວໜຶ່ງທີ່ມີອາຊີບຕົ້ນຕໍໃນການລ້ຽງສັດ-ປູກຝັງ ແລະຕໍ່າຫູກມາຫຼາຍສິບປີສາມາດເຮັດໃຫ້ຄອບຄົວຢຶດໝັ້ນ ແລະກ້າວສູ່ການພັດທະນາດີລື່ນເກົ່າ.

   ທ່ານ ນາງ ນຸ້ຍ ພົມມະລາ ໄດ້ກ່າວຕໍ່ຜູ້ສື່ຂ່າວວ່າ: ແຕ່ກ່ອນໆ ຄອບຄົວຂອງຂ້າພະເຈົ້າກໍ່ຄືຫຼາຍຄອບຄົວກໍ່ພົບກັບຄວາມຫຍຸ້ງຍາກ, ຕົກຢູ່ໃນສະພາບຂາດເຂີນຫຼາຍ ປັດໄຈໂດຍສະເພາະການກູ້ຢືມເງິນນອກລະບົບໃນດອກເບ້ຍສູງເຮັດໃຫ້ການຂາຍຜົນຜະລິດລວມທັງການຕໍ່າຫູກ ໄດ້ກໍາໄລໜ້ອຍ; ສະນັ້ນ, ຍ້ອນມີແນວທາງທີ່ຖືກ ຕ້ອງຂອງພັກ ແລະລັດຖະບານໂດຍສະເພາະການນໍາຂອງນະຄອນຫຼວງວຽງຈັນ ແລະເມືອງສັງທອງໃນການແກ້ໄຂຄວາມທຸກຍາກໃນທົ່ວເມືອງເຮັດໃຫ້ຄອບຄົວພວກເຮົາໄດ້ດໍາເນີນການປັບປ່ຽນການຜະລິດ ແລະຫັດຖະກໍາໂດຍໄດ້ນໍາໃຊ້ທຶນຮອນຈໍານວນໜຶ່ງທີ່ມີຂອງຄອບຄົວບວກກັບແຫຼ່ງທຶນຂອງທະນາຄານນະໂຍບາຍ (ທ ນບ) ທີ່ເປັນທະນາຄານສະເພາະກິດຂອງລັດຖະບານດອກເບ້ຍຕໍ່າເຂົ້າໃນການຕໍ່າຫູກ ແລະຈັດຕັ້ງເປັນກຸ່ມການຜະລິດທີ່ຕົນເອງເປັນຫົວໜ້າກຸ່ມໂດຍເລີ່ມແຕ່ປີ 2008 ເປັນຕົ້ນມາຫາ 2015 ຄອບຄົວ ລະ 1 ລ້ານກີບ; 2 ລ້ານກີບ ແລະ 3 ລ້ານກີບ ຕາມລໍາດັບ; ຍ້ອນກຸ່ມ ພວກເຮົາມີຄວາມສາມັກຄີ, ເຮັດແທ້ທໍາຈິງ, ຂະຫຍາຍການຜະລິດ-ການຕະຫຼາດກໍ່ກ້ວາງອອກ, ນັບແຕ່ 2016-2021 ທາງທະນາຄານ ໄດ້ເພີ່ມວົງເງິນກູ້ໃຫ້ຄອບຄົວລະ  5 ລ້ານກີບ ເຂົ້າໃນການຕໍ່າຫູກ ທີ່ມີຮອບໝູນຫຼາຍຂຶ້ນ ຈຶ່ງເຮັດໃຫ້ ໄດ້ຮັບຜົນກໍາໄລຫຼາຍຂຶ້ນກວ່າ ເກົ່າ.

   ທ່ານ ນາງ ນຸ້ຍ ພົມມະລາ ກ່າວຕໍ່ວ່າ: ເຖິງວ່າ: ຈະໄດ້ຮັບເງິນກູ້ບໍ່ສູງປານໃດແຕ່ຫາກພ້ອມພຽງຮຽງໜ້າກັນເຮັດບວກກັບການຂະຫຍາຍໃຫ້ຄົນອື່ນຊ່ວຍກໍ່ສາມາດ ສ້າງມູນຄ່າເພີ່ມ; ຜ່ານການນໍາໃຊ້ແຫຼ່ງທຶນດັ່ງກ່າວ; ບັນດາສະມາຊິກພາຍໃນກຸ່ມກໍ່ໄດ້ຈັດຕັ້ງປະຕິບັດຕາມລະບຽບການກູ້ຢືມໄດ້ເປັນຢ່າງດີໂດຍສະເພາະຄອບຄົວຂອງຂ້າພະເຈົ້າໄດ້ສົ່ງທຶນເງິນກູ້ໃຫ້ທັນກັບເວລາ ແລະຄົບຖ້ວນ; ດ້ວຍການນໍາໃຊ້ເງິນກູ້ດັ່ງກ່າວເຂົ້າເປັນທຶນໝູນວຽນສາມາດເຮັດໃຫ້ຊີວິດການເປັນຢູ່ຂອງຄອບຄົວດີຂຶ້ນຢ່າງຈະແຈ້ງເປັນການປະກອບສ່ວນທຶນຮອນສົ່ງລູກ 2 ຄົນເຂົ້າຮຽນ ແລະຈົບແລ້ວ, ມີເງິນຊື້ສັດລ້ຽງຕື່ມອີກ.

   ທ່ານ ປັນຍາສະໄຫວ ຣັດຖະເສນາ ຮອງຫົວໜ້າພະແນກສິນເຊື່ອ ທນບ ສໍານັກງານໃຫຍ່, ອະດີດຫົວໜ້າ ທນບ ໜ່ວຍບໍລິການເມືອງສັງທອງ ໄດ້ຕີລາຄາສູງຕໍ່ກຸ່ມການຜະລິດ (ຕໍ່າຫູກ) ບ້ານປາກແຖບທີ່ໄດ້ນໍາໃຊ້ແຫຼ່ງທຶນເຂົ້າກັບເປົ້າໝາຍ ແລະມີຄວາມພະຍາຍາມສູງໃນການຜະລິດ, ສໍາຄັນແມ່ນຜະລິດງາມ, ດີ, ທັນໃຈລູກຄ້າ ຈຶ່ງເຮັດໃຫ້ຕະລິດຕະພັນໄດ້ຮັບຄວາມໄວ້ວາງໃຈຈາກຕະຫຼາດ ແລະ ມີຄວາມສາມາດສົ່ງທຶນຄືນໃຫ້ທະນາຄານ; ໃນຕໍ່ໜ້າ, ຫາກການຜະລິດຂອງກຸ່ມຕໍ່າຫູກຂະຫຍາຍຕົວ ແລະທາງກຸ່ມມີຄວາມຕ້ອງການທຶນ, ທນບ ພວກເຮົາກໍ່ຈະລາຍງານຂັ້ນເທິງເພື່ອພິຈາລະນາວົງເງິນສູງກວ່າເກົ່າ.

แชร์