ເຈົ້ານະຄອນຫຼວງພະບາງອອກຄໍາສັ່ງປິດ 2 ບ້ານ ທີ່ມີຄວາມສ່ຽງແຜ່ເຊື້ອໂຄວິດ

   ທ່ານ ວຽງທອງ ຫັດສະຈັນ ເຈົ້ານະຄອນຫຼວງພະບາງ ໄດ້ອອກຄໍາສັ່ງເລກທີ 1069/ຈນ.ຫຼບ ລົງວັນທີ 05 ຕຸລາ 2021 ວ່າດ້ວຍການເຂັ້ມງວດເພື່ອປ້ອງກັນ, ສະກັດກັ້ນ, ຄວບຄຸມ ແລະແກ້ໄຂການລະບາດພະຍາດໂຄວິດ-19 ຢູ່ ບ້ານຜາສຸກ ແລະ ບ້ານຜານົມ ນະຄອນຫຼວງພະບາງ ຊຶ່ງໄດ້ແຈ້ງອົງການປົກຄອງບ້ານຜາສຸກ, ບ້ານຜານົມ ຜູ້ປະກອບການທຸລະກິດ ແລະປະຊາຊົນບັນດາເຜົ່າເລື່ອງປີດບ້ານຜາສຸກ ແລະບ້ານຜານົມເປັນເວລາ 14 ວັນ.
   ຈາກຜົນຂອງຫ້ອງວິເຄາະກວດພົບຜູ້ຕິດເຊື້ອພະຍາດໂຄວິດ-19 ຢູ່ໃນເຂດຊຸມຊົນ ຄັ້ງວັນທີ 5 ຕຸລາ 2021 ແລະທິດຊີ້ນຳຂອງຄະນະສະເພາະກິດເພື່ອປ້ອງກັນຄວບຄຸມ ແລະແກ້ໄຂການລະບາດຂອງພະຍາດໂຄວິດ-19 ຄັ້ງວັນທີ 5 ຕຸລາ 2021. ປະຈຸບັນໄດ້ມີຜູ້ຕິດເຊື້ອໂຄວິດ-19 ແລະຜູ້ສໍາພັດໃກ້ຊິດກັບຜູ້ຕິດເຊື້ອຢູ່ບ້ານຜາສຸກ ແລະບ້ານຜານົມ ເພື່ອຮັບປະກັນບໍ່ໃຫ້ມີການແຜ່ຂະຫຍາຍອອກເປັນວົງກວ້າງແນໃສ່ເຮັດໃຫ້ພໍ່ແມ່ປະຊາຊົນມີຄວາມປອດໄພ ແລະບໍ່ໃຫ້ມີຜົນຕະທົບຕໍ່ຊີວິດ, ສຸຂະພາບ ແລະເຮັດໃຫ້ເຂດດັ່ງກ່າວໄດ້ຮັບການຊີດຢາຂ້າເຊື້ອຢ່າງທັນເວລາເຈົ້ານະຄອນຫຼວງພະບາງຈິ່ງໄດ້ອອກຄໍາສັ່ງ.


1) ຫ້າມຄົນທີ່ອາໄສຢູ່ບ້ານຜາສຸກ ແລະບ້ານຜານົມ ເດີນທາງເຂົ້າ-ອອກ(lock down) ຈາກບ້ານຢ່າງເດັດຂາດພ້ອມທັງຕັ້ງຈຸດ-ກວດກາຄົນເຂົ້າ-ອອກ ປະຈໍາ 24 ຊົ່ວໂມງ, ຍົກເວັ້ນກໍລະນີຈໍາເປັນອັນຮີບດ່ວນຕ້ອງໄດ້ຮັບອານຸຍາດຈາກຄະນະສະເພາະກິດຂັ້ນບ້ານ.
2) ໃຫ້ປີດບັນດາຮ້ານຂາຍເຄື່ອງສົ່ງ-ຍ່ອຍ, ຮ້ານອາຫານ ແລະຫົວໜ່ວຍທຸລະກິດອື່ນໆຂອງທັງ 2 ບ້ານ, ຊຶ່ງກຳນົດເຂດພື້ນທີ່ບ້ານດັ່ງກ່າວເປັນ (ເຂດແດງ) ຈຸດທີ່ມີຄວາມສ່ຽງໃນການພົວພັນ, ສຳພັດໃກ້ສິດຂອງຜູ້ຕິດເຊື້ອພະຍາດໂຄວິດ-19.
3) ບ້ານຜາສຸກ ຍົກເວັ້ນເສັ້ນທາງສາຍຫຼັກຂ້າງເດິນຊາວມັງກອນ, ກອງບັນຊາການ ປກຊ ແຂວງ ແລະໂຮງໝໍ 107.
4) ບ້ານຜານົມ ຍົກເວັ້ນເສັ້ນທາງສາຍຫຼັກສາມາດໃຫ້ລົດແລ່ນຜ່ານໄດ້ແຕ່ຫ້າມແວ່ເປັນເດັດຂາດ.
5) ມອບໃຫ້ຄະນະສະເພາະກິດຂັ້ນນະຄອນຊີ້ນໍາຫ້ອງການສາທາລະນະສຸກນະຄອນລົງສົມທົບຫົວໜ້າກຸ່ມ ແລະອົງການປົກຄອງບ້ານຮີບຮ້ອນສຶບສວນສອບສວນເກັບກໍາຂໍ້ມູນຕົວຈິງຜູ້ສໍາພັດໃກ້ສິດກັບຜູ້ຕິດເຊື້ອໃຫ້ລະອຽດຈະແຈ້ງພ້ອມທັງເຂົ້າສູນກັກກັນ ແລະ ລາຍງານໃຫ້ຄະນະສະເພາະຂັ້ນແຂວງຮັບຊາບເພື່ອແກ້ໄຂໃຫ້ທັນເວລາ ແລະມອບໃຫ້ ປກສ ກຸ່ມເມືອງງາ ແລະຄະນະສະເພາະກິດຂັ້ນບ້ານເປັນເຈົ້າການຕັ້ງຈຸດກວດກາໃນການຈັດຕັ້ງປະຕະບັດຢ່າງເຂັ້ມງວດ.
   ແຂວງຫຼວງພະບາງການຕິດເຊື້ອຊຸມແມ່ນມີການເພີ່ມຂຶ້ນ ແລະ ຂະຫຍາຍເປັນວົງກວ້າງພໍສົມຄວນໂດຍສະເພາະແມ່ນເມືອງນານ, ເມືອງງອຍ, ນະຄອນຫຼວງພະບາງ ແລະ ເມືອງອື່ນໆ ອີກທີ່ຍັງມີການລະບາດໃນຊຸມຊົນດັ່ງນັ້ນທາງຄະນະສະເພາະກິດຂັ້ນແຂວງ, ເມືອງ, ຂັ້ນບ້ານ, ແພດໝໍພະນັກງານປະຈໍາແຕ່ລະສູນກັກກັນໄດ້ເອົາໃຈໃສ່ປະຕິບັດໜ້າທີ່ຢ່າງເຕັມທີ່ເພື່ອເຮັດໃຫ້ການປ້ອງກັນ, ການປິ່ນປົວຜູ້ຕິດໂຄວິດ-19 ໃຫ້ຫາຍດີ ແລະກາຍເປັນແຂວງປອດເຊື້ອພະຍາດໂຄວິດ-19.

แชร์