ລະວັງ! ເສັ້ນເລືອດອຸດຕັນ ສະໝອງ-ຫົວໃຈ

ໂດຍ: ຣັດສະໝີ ດວງສັດຈະ

  ຜູ້ສື່ຂ່າວພວກເຮົາໄດ້ສຳພາດຜ່ານ ອອນລາຍທ່ານ ດຣ. ໃສສະຫວາດ ແກ້ວສົດໃສ ຮອງຫົວໜ້າພະແນກລະບົບປະສາດໂຮງໝໍມິດຕະພາບ, ຮອງປະທານສະມາຄົມແພດລະບົບປະສາດລາວ, ຊ່ຽວຊານລະບົບປະສາດ-ເສັ້ນເລືອດສະໝອງໂດຍທ່ານຢືນຢັນວ່າ: ຊະນິດຂອງພະຍາດເສັ້ນເລືອດສະໝອງແມ່ນມີເສັ້ນເລືອດຕີບ ຫຼືອຸດຕັນ ແລະເສັ້ນເລືອດແຕກໂດຍອາການກະທັນຫັນມີຫຼາຍອາການ, ແຕ່ທີ່ມັກພົບມີ 3 ອາການຫຼັກ ຄື: “ໃບໜ້າບ້ຽວ; ແຂນ-ຂາອ່ອນແຮງ ຫຼື ລ່ອຍ ແລະການເວົ້າຜິດ ປົກກະຕິ ຫຼື ບໍ່ເຂົ້າໃຈ” ຫາກມີອາການລັກສະນະແບບນີ້ກໍ່ຢ່າໄດ້ນິ້ງເສີຍເພາະຈະເປັນອັນຕະລາຍເຖິງແກ່ຊີວິດ ຫຼືສຸຂະພາບຕ້ອງໄປຮອດໂຮງໝໍດ່ວນຢ່າງຊ້າສຸດບໍ່ເກີນ 4 ຊົ່ວໂມງເຄິ່ງ, ສະເພາະຢູ່ນະຄອນຫຼວງວຽງຈັນສາມາດເຂົ້າປິ່ນປົວຢູ່ໂຮງໝໍມິດຕະພາບເພາະມີແພດຊ່ຽວຊານສະເພາະດ້ານທີ່ປິ່ນປົວກ່ຽວກັບລະບົບປະສາດ ແລະຊ່ຽວຊານປິ່ນປົວເສັ້ນເລືອດສະໝອງ.

   ທ່ານ ດຣ. ໃສສະຫວາດ ແກ້ວສົດໃສ ຍັງໃຫ້ຮູ້ວ່າ: ພະຍາດເສັ້ນເລືອດສະໝອງເປັນພະຍາດລະບົບປະສາດທີ່ມີຄວາມຮຸນແຮງທີ່ກະທົບໃສ່ຄົນເຈັບ, ຄອບຄົວ, ເສດ ຖະກິດ ແລະສັງຄົມ; ພະຍາດນີ້, ພົບຫຼາຍໃນຄົນ ສູງອາຍຸໄວ ແລະໃນໄວ, ກາງຄົນກໍ່ສາມາດພົບໄດ້ (ພົບໜ້ອຍກວ່າ); ພະຍາດດັ່ງກ່າວເກີດຂຶ້ນທົ່ວໂລກໃນແຕ່ລະປີປະມານ 15 ລ້ານຄົນ, ເປັນສາເຫດການຕາຍເປັນອັນດັບ 3 ຂອງໂລກທີ່ຮອງຈາກພະຍາດຫົວໃຈ ແລະພະຍາດມະເຮັງຊຶ່ງພະຍາດເສັ້ນເລືອດສະໝອງໄດ້ຂ້າມະນຸດ ໃນທຸກໆ 6 ນາທີຕໍ່ 1 ຄົນ; ສຳລັບຢູ່ລາວຕິດອັນດັບ 2 ຮອງຈາກການເສຍຊີວິດດ້ວຍອຸບັດຕິເຫດ, ສະເພາະໃນປີ 2020 ມີຄົນເຂົ້າປິ່ນປົວຢູ່ໂຮງໝໍມິດຕະພາບ 845 ຄົນ ໃນນີ້ເສັ້ນເລືອດອຸດຕັນ 598 ຄົນ, ເສັ້ນເລືອດແຕກ 247 ຄົນ.

   ສະຖິຕິການເກີດພະຍາດດັ່ງກ່າວນັບມື້ນັບຫຼາຍ; ສ່ວນໃຫຍ່ຜູ້ທີ່ມີຄວາມສ່ຽງແມ່ນຜູ້ທີ່ເປັນພະຍາດເບົາຫວານ, ຄວາມດັນເລືອດ ສູງ, ຫົວໃຈ, ໄຂມັນໃນເສັ້ນເລືອດ ສູງ ແລະພະຍາດເສັ້ນເລືອດຫຼືເລືອດ ຜິດປົກກະຕິ; ນອກນີ້, ຍັງເກີດຂຶ້ນ ໃນກຸ່ມຄົນຕຸ້ຍ, ຄົນບໍ່ມັກອອກກຳ ລັງກາຍ, ສູບຢາຫຼາຍ, ກິນເຫຼົ້າ- ເບຍ, ສິ່ງທີ່ມືນເມົາຫຼາຍ ແລະມີເຊື້ອສາຍ (ກຳມະພັນ) ທີ່ເປັນພະຍາດນີ້; ດັ່ງນັ້ນ, ຈຶ່ງຕ້ອງໄດ້ເອົາໃຈໃສ່ເປັນພິເສດ; ສຳລັບການປິ່ນປົວເສັ້ນເລືອດຕີບ, ຖ້າມາຮອດໂຮງໝໍໄວພາຍໃນ4 ຊົ່ວໂມງເຄິ່ງກໍ່ຈະມີຜົນດີຕໍ່ການປິ່ນປົວດ້ວຍການໃສ່ຢາລະລາຍກ້ອນເລືອດ, ຢາຕ້ານການກ້າມຂອງເລືອດໄວທີ່ສຸດ.

   ປະຈຸບັນໂລກເຮົາຍິ່ງມີຫຼາຍພະຍາດທີ່ໜ້າຢ້ານໂດຍສະເພາະຂະນະນີ້ແມ່ນພະຍາດໂຄວິດ-19, ສຳຄັນເຮົາຄວນຮັກເຮົາຫຼາຍກວ່າ ແລະເອົາການປ້ອງກັນສຸຂະພາບ ມາກ່ອນໂດຍການອອກກຳລັງກາຍສະໝໍ່າສະເໝີ,ໃຫ້ພັກຜ່ອນພຽງພໍ, ຫາເວລາເຮັດກິດຈະກໍາທີ່ຜ່ອນຄາຍເຮັດໃຫ້ຈິດໃຈປອດໂປ່ງ, ຫຼຸດຜ່ອນອາຫານເຄັມ, ບໍ່ຄວນກິນດື່ມອາຫານທີ່ມີທາດນໍ້າຕານ-ແອລກໍຮໍຫຼາຍ; ບໍ່ສູບຢາ, ໃຫ້ຢູ່ບ່ອນອາກາດປອດໂປ່ງ; ອາລົມດີຮູ້ ປ່ອຍວາງໝັ້ນກວດສຸຂະພາບ, ເຈັບເປັນຕ້ອງພົບແພດໝໍ ແລະບໍ່ຊື້ຢາມາກິນຕາມລຳພັງ; ເມື່ອພົບເຫັນພໍ່ແມ່ຫຼືຍາດພີ່ນ້ອງທີ່ມີ 3 ອາການນີ້ໃຫ້ພາຄົນເຈັບໄປຫາແພດສະເພາະດ້ານໂດຍດ່ວນບໍ່ໃຫ້ກາຍ 4 ຊົ່ວໂມງເຄິ່ງ.

    ກ່ຽວກັບພະຍາດເສັ້ນເລືອດຫົວໃຈ; ທ່ານ ດຣ ຄໍາແພງ ແກ້ວມະນີວົງ ຫົວໜ້າສູນຫົວໃຈເສັ້ນເລືອດລາວ-ລຸກຊໍາບວກ, ຊ່ຽວຊານຊີດສີແຍ່-ຍະເສັ້ນເລືອດຫົວໃຈ ໂຮງໝໍມະໂຫສົດ (ຫ້ອງຊີດສີແຍ່-ຍະເສັ້ນ ເລືອດຫົວໃຈ-ລາວ) ໄດ້ໃຫ້ສໍາພາດໃນທ້າຍອາທິດແລ້ວນີ້ວ່າ: 3-4 ປີຜ່ານມາ ສາມາດຊີດສີ ແຍ່-ຍະເສັ້ນເລືອດຫົວໃຈໄດ້ທັງໝົດ  588 ຄົນ; ໃສ່ stent (ໃສ່ຄົດລວດ) ໄດ້ທັງໝົດ 225 ຄົນ; ຄົນ ເຈັບຕ່າງປະເທດທີ່ມາຮັບໃຊ້ບໍລິການລວມທັງໝົດ 12 ຄົນ; ໃສ່ຖ່ານກະຕຸ້ນຫົວໃຈ (pacemaker) ໄດ້ທັງໝົດ 38 ຄົນ.

   ສໍາລັບອາການພະຍາດຫົວໃຈວາຍ (ເສັ້ນເລືອດ coronaire ອຸດຕັນ) ແມ່ນເຈັບໜ້າເອິກເບື້ອງຊ້າຍ, ເຈັບໜ້າເອິກແຮງຂຶ້ນບາດດຽວຄືມີແນວມາເຕັງໜ້າເອິກ, ເຈັບໜ້າເອິກລາມມາຫາແຂນຊ້າຍ, ຫາກ້ານຄໍ, ຫາຫູຫາຄາງກະໄຕຊ້າຍ, ເຈັບໜ້າເອິກເວລາພັກຜ່ອນ, ເຈັບໜ້າເອິກຫຼາຍກວ່າ>20 ນາທີ... ປັດໃຈສ່ຽງພະຍາດຫົວໃຈ ວາຍ (ເສັ້ນເລືອດ coronaire ອຸດຕັນ) ຊຶ່ງປັດໃຈສ່ຽງທີ່ຄວບຄຸມບໍ່ໄດ້ແມ່ນຕິດພັນກັບເພດ, ໄວ, ດ້ານກໍາມະພັນ;ປັດໃຈສ່ຽງທີ່ຄວບຄຸມໄດ້ແມ່ນຄວາມດັນເລືອດສູງ, ພະຍາດເບົາຫວານ,ໄຂມັນສູງໃນເລືອດ, ສູບຢາຫຼາຍ, ຕຸ້ຍ, ບໍ່ອອກກໍາລັງກາຍ, ພວກມີຄວາມກົດດັນສູງສາມາດແກ້ໄຂດ້ວຍຕົນເອງເປັນຕົ້ນຖ້າເປັນເບົາຫວານກໍ່ຄວບຄຸມອາຫານ, ອອກກໍາລັງກາຍຄະນະແພດຫ້ອງຊີດສີແຍ່-ຍະ ເສັ້ນເລືອດຫົວໃຈ-ລາວໂຮງໝໍມະໂຫສົດຍິນດີຮັບໃຊ້ຕະຫຼອດ 24 ຊົ່ວໂມງ.

 

แชร์