9 ເດືອນອຸດົມໄຊລາຍຮັບຫຼຸດແຜນ

ຂ່າວ: ຄານມະນີ ຮຽນດໍຈັນ

 ໄລຍະ 9 ເດືອນຜ່ານມາຄະນະພັກ, ຄະນະນຳຂອງຂະແໜງການເງິນ, ພະແນກການເງິນ ແຂວງອຸດົມໄຊ ໄດ້ເອົາໃຈໃສ່ຈັດຕັ້ງປະຕິບັດແຜນຈັດເກັບລາຍຮັບງົບປະມານ ປະຈຳປີ 2021 ຢ່າງຕັ້ງໜ້າເພື່ອໃຫ້ບັນລຸຕາມລະດັບຄາດໝາຍແຕ່ການຈັດເກັບຕົວຈິງບໍ່ສາມາດປະຕິບັດໄດ້ຕາມແຜນຊຶ່ງໄດ້ພຽງແຕ່ 54,14% ຂອງແຜນການປີ 2021 ເທົ່ານັ້ນ.

ອີງຕາມການລາຍງານຂອງ ທ່ານ ສຸລິຍາ ສຸພິທັກ ຫົວໜ້າພະແນກການເງິນ ແຂວງອຸດົມໄຊ ໃນກອງປະຊຸມສ່ອງແສງລາຍງານວຽກງານອົງການປົກຄອງແຂວງອຸດົມໄຊໃນທ້າຍອາທິດຜ່ານມາເຫັນວ່າ: ໃນໄລຍະ 9 ເດືອນຜ່ານມານີ້ແຂວງອຸດົມໄຊສາມາດຈັດເກັບລາຍຮັບໄດ້ທັງໝົດ 76,99 ຕື້ກີບ ຫຼືເທົ່າກັບ 54,14% ຂອງ ແຜນການປີ (ຕົວເລກແຜນການຈັດເກັບລາຍຮັບປີ 2021 ແມ່ນ 142,2 ຕື້ກີບ) ທຽບໃສ່ປີກ່ອນ ເທົ່າກັບ 91,71% ໃນນັ້ນລາຍຮັບພູດສູນກາງປະຕິບັດໄດ້ທັງໝົດ 2,53 ຕື້ກີບ ເທົ່າກັບ 16,84% ຂອງແຜນປີ (ຕົວເລກແຜນປີແມ່ນ 15 ຕື້ກີບ), ລາຍຮັບຈາກພາສີ 2,09 ຕື້ກີບ ແລະ ລາຍຮັບຈາກການຄຸ້ມຄອງ ວິສາຫະກິດລັດລົງທຶນ ແລະປະກັນໄພ 4,4 ຮ້ອຍລ້ານກີບ. ລາຍຮັບພູດທ້ອງຖິ່ນປະຕິບັດໄດ້ທັງໝົດ 74,46 ຕື້ກີບ ເທົ່າ ກັບ 58,54% ຂອງແຜນປີ (ແຜນປີແມ່ນ 127,20 ຕື້ກີບ) ໃນນີ້ລາຍຮັບສ່ວຍສາອາກອນປະຕິບັດໄດ້ທັງໝົດ 64,65 ຕື້ກີບ, ຄຸ້ມຄອງຊັບສິນຂອງລັດ, ຄຸ້ມຄອງວິສາຫະກິດລັດລົງທຶນ ແລະປະກັນໄພ 9,81 ຕື້ກີບ.

  ສາເຫດທີ່ເຮັດໃຫ້ການຈັດເກັບລາຍຮັບງົບປະມານແຫ່ງລັດຕະຫຼອດໄລຍະ 9 ເດືອນຜ່ານມານີ້ບໍ່ໄດ້ຕາມແຜນກໍ່ເນື່ອງມາຈາກຫຼາຍປັດໄຈໂດຍສະເພາະແມ່ນການລະບາດຂອງເຊື້ອພະຍາດໂຄວິດ-19 ທີ່ສົ່ງຜົນກະທົບໂດຍກົງໃນການຈັດເກັບລາຍຮັບ ແລະການປະຕິບັດລາຍຈ່າຍບໍ່ໄປຕາມຈັ່ງຫວະ, ເຮັດໃຫ້ສະພາບເສດຖະກິດໂດຍລວມມີຄວາມຫຍຸ້ງຍາກ ແລະບໍ່ໄປຕາມທິດທາງແຜນການທີ່ກຳນົດໄວ້ ຊຶ່ງເຫັນໄດ້ຈະແຈ້ງຈາກການວິເຄາະເບື້ອງຕົ້ນກ່ຽວກັບຕົວເລກລາຍຮັບຂອງບັນດາເມືອງ ແລະຂະແໜງການແມ່ນບໍ່ໄດ້ຕາມແຜນ, ຄາດຄະເນໝົດປີຈະປະຕິບັດໄດ້ພຽງ79,23% ຂອງແຜນການປີເທົ່ານັ້ນ.

แชร์