ເມືອງຊົນນະບູລີ ຂຸ້ນຂ້ຽວເກັບກ່ຽວເຂົ້ານາປີ

ຕາມການລາຍງານຈາກໜ່ວຍງານປູກຝັງ ຫ້ອງການກະສິກໍາ ແລະປ່າໄມ້ເມືອງຊົນນະບູລີ ແຂວງສະຫວັນນະເຂດ ໃນວັນທີ 5 ຕຸລາ 2021 ນີ້ວ່າ: ປະຈຸບັນ, ກະສິກອນກໍຄືປະຊາຊົນເມືອງຊົນນະບູລີ ກຳລັງຂຸ້ນຂ້ຽວເກັບກ່ຽວເຂົ້ານາປີເພື່ອໃຫ້ສຳເລັດຕາມລະດູການໂດຍສະເລ່ຍແລ້ວໃນທົ່ວເມືອງເກັບກ່ຽວໄດ້ສຳເລັດປະມານ 15% ຂອງເນື້ອທີ່ທໍາການຜະລິດ.
ທົ່ວເມືອງຊົນນະບູລີ ມີເນື່ອທີ່ແຜນການຜະລິດທັງໝົດ 16.110 ເຮັກຕາ. ປະຕິບັດໄດ້ 15.884 ເຮັກຕາ, ເຊິ່ງການຜະລິດໄດ້ແບ່ງອອກເປັນ 3 ເຕັກນິກຄື: ນາຫວ່ານ 8.055 ເຮັກຕາ, ນາຢອດ 513 ເຮັກຕາ, ນາດໍາ 7.315 ເຮັກຕາ, ໃນນັ້ນມີພຶດສະບຽງອາຫານ 1.383 ເຮັກຕາ ແລະພຶດອຸດສາຫະກໍາຜະລິດເປັນສິນຄ້າ 567 ເຮັກຕາ ປະຕິບັດໄດ້ເນື້ອທີ່ລວມທັງໝົດ 1.950 ເຮັກຕາເທົ່າກັບ 100% ຂອງແຜນການຜະລິດ.
ສໍາລັບການເກັບກ່ຽວພຶດສໍາຮອງລະດູຝົນສາມາດປະຕິບັດໄດ້ແລ້ວ 1.060 ເຮັກຕາ, ຜົນຜະລິດ 11.195 ໂຕນ, ໃນນັ້ນມີ: ສາລີ, ໝາກໂມ, ໝາກແຕງ, ຖົ່ວຝັກຍາວ, ໝາກເຂືອ, ໝາກເຜັດ, ໝາກກ້ວຍ, ໝາກນັດ, ພືດຜັກຕ່າງໆ, ມັນດ້າງ, ມັນຕົ້ນ, ຖົ່ວດີດິນ, ສ່ວນພືດອຸດສາຫະກໍາທີ່ຜະລິດເປັນສິນຄ້າໃນເນື້ອທີ່ 567 ເຮັກຕາ ແມ່ນຢູ່ໃນໄລຍະການຕິດຕາມ.

แชร์