ເປີດເອໄອດີຊີໂລຈິສຕິກ ຢູ່ຄຳມ່ວນ

   ພິທີດັ່ງກ່າວແມ່ນໄດ້ຈັດຂຶ້ນຢ່າງເປັນທາງການໃນວັນທີ 2 ຕຸລາ 2021 ທີ່ເດີ່ນຂອງບໍລິສັດດັ່ງກ່າວຊຶ່ງຕັ້ງຢູ່ທາງເຂົ້າຂົວມິດຕະພາບ 3 (ຄຳມ່ວນ-ນະຄອນພະນົມ) ເມືອງທ່າແຂກ ແຂວງຄຳມ່ວນ ໂດຍການເປັນກຽດເຂົ້າຮ່ວມຂອງທ່ານ ວັນໄຊ ພອງສະຫວັນ ເຈົ້າແຂວງໆ ຄຳມ່ວນ, ທ່ານ ພຶດສະພາ ພູມມະສັກ ປະທານບໍລິສັດ ເອໄອດີຊີ ໂລຈິສຕິກຈຳ ກັດຜູ້ດຽວ, ມີທ່ານຮອງເຈົ້າແຂວງ, ທ່ານເຈົ້າເມືອງທ່າແຂກ, ຫົວໜ້າພະແນກການອ້ອມຂ້າງແຂວງ, ຫົວໜ້າດ່ານພາສີ , ບັນດານັກທຸລະກິດຈາກບໍລິສັດຕ່າງໆ ແຂກທີ່ຖືກເຊີນພ້ອມດ້ວຍພະນັກງານວິຊາການພາຍໃນບໍລິສັດດັ່ງກ່າວເຂົ້າຮ່ວມ.

   ທ່ານ ພຶດສະພາ ພູມມະສັກ ປະທານ ບໍລິສັດ ເອໄອດີຊີ ໂລຈິສຕິກ ຈຳກັດຜູ້ ດຽວໄດ້ໃຫ້ກຽດຂຶ້ນລາຍງານປະຫວັດຄວາມເປັນມາຂອງບໍລິສັດໂດຍສືບເນື່ອງມາຈາກ ( ບໍລິສັດເອເຊຍລົງທຶນພັດທະນາ ແລະກໍ່ສ້າງ ຈໍາກັດ ຜູ້ດຽວ) ໄດ້ເລີ່ມເຄື່ອນໄຫວຕັ້ງແຕ່ເດືອນມີນາ 2021, ໂດຍເລີ່ມ ຕົ້ນທີ່ແຂວງຈໍາປາສັກ ແລະແຂວງບໍລິຄໍາໄຊ ຊຶ່ງຢູ່ແຂວງບໍລິຄໍາໄຊແມ່ນໄດ້ບໍລິການຂົນສົ່ງແຮ່ເຫຼັກ, ບໍລິສັດເຫັນໄດ້ວ່າແຂວງຄໍາມ່ວນເປັນແຂວງທີ່ມີກໍາລັງແຮງ ແລະເປັນທາງເຊື່ອມຈອດກັບປະເທດອ້ອມຂ້າງເປັນຕົ້ນແມ່ນປະເທດໄທ ແລະຫວຽດນາມ,ຊຶ່ງເປັນຈຸດທີ່ສໍາຄັນໃນການຂໍ້ຕໍ່ຍອດໄປສູ່ສະຖານນີລົດໄຟລາວ-ຈີນ,ດັ່ງນັ້ນບໍລິສັດຈຶ່ງໄດ້ຕັດສິນໃຈມາຂະຫຍາຍທຸລະກິດຢູ່ແຂວງຄໍາມ່ວນເພີ່ມຕື່ມ.

 ໃນນີ້ໄດ້ນໍາເອົາລົດຈໍານວນ 120 ຄັນມາກຽມບໍລິການຄື: ລົດເທັນເລີ້ຫາງ ລາກ 70 ຄັນ, ລົດພວງແມ່ລູກຈໍານວນ 40 ຄັນ, ລົດດ້າມ 10 ຄັນ, ການບໍລິການ ຂົນສົ່ງປະຈຸບັນບໍລິສັດແມ່ນຮັບຂົນສົ່ງໃນທຸລະກິດຊື້-ຂາຍມັນຕົ້ນແຫ້ງ, ກຸ່ມລູກຄ້າຜະລິດແຮ່, ກຸ່ມລູກຄ້າກະສິກໍາເຊັ່ນ:ກ້ວຍ, ໝາກໄມ້ຕາມລະດູການ ແລະ ກຸ່ມ ລູກຄ້າຜູ້ຜະລິດ ແລະແປຮູບສິນຄ້າກະສິກໍາເຊັ່ນ: ນໍ້າຕານເປັນຕົ້ນ, ໂດຍຮູບແບບການຂົນສົ່ງຈະເປັນແບບຄວບຄຸມອຸນຫະພູມຄວາມເຢັນ ແລະບໍ່ຄວບຄຸມອຸນຫະພູມຄວາມເຢັນ, ຂຶ້ນກັບປະເພດສິນຄ້າ ໂດຍເນັ້ນການຂົນສົ່ງພາຍໃນປະເທດເປັນຫຼັກຕາມປະເພດສິນຄ້າຂອງແຕ່ລະແຂວງຜ່ານມາບໍລິສັດໄດ້ບໍລິການຂົນສົ່ງຢູ່ 4 ແຂວງຄື: ແຂວງບໍລິຄໍາໄຊ (ທ່າບົກ) ຂົນສົ່ງປະເພດແຮ່ເຫຼັກຕ່າງໆ, ແຂວງຈໍາປາສັກຂົນສົ່ງມັນຕົ້ນ, ແຂວງສາລະວັນຂົນສົ່ງກ້ວຍ ແລະແຂວງຄໍາມ່ວນຂົນສົ່ງປະເພດສິນຄ້າໃຊ້ ສອຍຕ່າງໆເຊັ່ນ: ເຄື່ອງນຸ່ງຮົ່ມ, ເຄື່ອງຫຼິ້ນຈາກຈີນ, ຜ້າແພ, ນໍ້າຢາປັບຜ້ານຸ່ມ.

 ນອກນັ້ນຍັງມີການຂົນສົ່ງປະເພດກະສິກໍາຄື: ໝາກຄ້ຽວ, ລໍາໄຍ, ໝາກໝີ້, ຖົ່ວ ລຽນ, ມັງຄຸດ, ຫອມແດງ ແລະອື່ນໆຈຸດເດັ່ນແມ່ນເປັນບໍລິສັດຂອງລາວ 100% ລົດທຸກຄັນແມ່ນສາມາດຕິດຕາມໄດ້ໂດຍນຳໃຊ້ລະບົບ GPS ແລະຈະກ້າວເຂົ້າ ສູ່ລະບົບ TMS ບໍລິສັດມີຄວາມໝັ້ນຄົງທາງດ້ານການເງິນຈຶ່ງພ້ອມລົງທຶນເພື່ອຕອບສະໜອງຄວາມຕ້ອງການທາງທຸລະກິດທີ່ເພີ່ມຂຶ້ນ ແລະ ແຜນການຕໍ່ໜ້າໃນ ປີ 2022 ບໍລິສັດກໍ່ມີແຜນຈັດຊື້ພາຫະນະເພີ່ມເຕີມອີກໃຫ້ຄົບ 300 ຄັນ ແລະ ວາງເປົ້າໝາຍໃນປີ 2023 ແມ່ນ 500 ຄັນ, ໃນປີ 2024 ແມ່ນ 600 ຄັນ.

   ໃນໂອກາດເຂົ້າຮ່ວມພິທີຄັ້ງນີ້ທ່ານ ວັນໄຊ ພອງສະຫວັນ ເຈົ້າແຂວງໆຄຳ ມ່ວນກໍ່ໄດ້ໃຫ້ກຽດມີຄຳເຫັນພ້ອມທັງສະແດງຄວາມຍ້ອງຍໍຊົມເຊີຍ ແລະຂອບໃຈມາຍັງບໍລິສັດທີ່ເລັ່ງເຫັນຄວາມສຳຄັນໃນວຽກງານຂົນສົ່ງຢູ່ແຂວງຄຳມ່ວນເຮັດໃຫ້ແຂວງມີໃບໜ້າໃໝ່ສ້າງ ແລະອຳນວຍຄວາມສະດວກສະບາຍໃນການຂົນສົ່ງພາຍໃນ ແລະຕ່າງປະເທດໃຫ້ພຽງພໍກັບຄວາມຕ້ອງການໃນການບໍລິການຂົນສົ່ງໃຫ້ຫຼາຍຂຶ້ນ, ທັງເປັນການປະກອບສ່ວນໃນການພັດທະນາເສດຖະກິດ-ສັງຄົມ ຂອງແຂວງຄຳມ່ວນເຮົາ, ຈາກນັ້ນທ່ານເຈົ້າແຂວງໆຄຳມ່ວນກໍ່ໄດ້ໃຫ້ກຽດຂຶ້ນລັ່ນຄ້ອງ 9 ບາດ ເພື່ອເປີດການບໍລິການຂົນສົ່ງຢ່າງເປັນທາງການພ້ອມທັງໃຫ້ກຽດຂຶ້ນຂັບລົດຂອງບໍລິສັດເພື່ອຄວາມເປັນສິລິມຸງຄຸນໃນໂອກາດນີ້ດ້ວຍ.

แชร์