ຫ້າມໃຊ້ລົດລັດຊະຊາຍ

ຂ່າວ: ຣັດສະໝີ ດວງສັດຈະ  

   ນັບແຕ່ວັນທີ 29 ກັນຍາ 2021 ມີກໍານົດໝາຍ 15 ວັນ ຈະເລີ່ມຢຸດການນໍາໃຊ້ລົດລັດຊະຊາຍໂດຍລົດຂອງລັດແມ່ນຊັບສິນຂອງລັດທີ່ໄດ້ຈາກການຈັດຊື້ດ້ວຍງົບປະມານແຫ່ງລັດ, ງົບປະມານຂອງລັດວິສາຫະກິດ, ທຶນກູ້ຢືມ, ການຊ່ວຍເຫຼືອລ້າດ້ວຍຮູບການຕ່າງໆຈາກການຈັດຕັ້ງ ຫຼືບຸກຄົນທັງພາຍໃນ ແລະຕ່າງປະເທດລວມທັງໄດ້ຈາກການຮີບຕາມຄໍາຕັດສິນຂອງສານຊຶ່ງຕ້ອງຂຶ້ນບັນຊີຊັບສິນຂອງລັດນໍາຂະແໜງການເງິນ, ອອກໃບທະບຽນ ແລະຕິດປ້າຍທະບຽນນໍາຂະແໜງການທີ່ກ່ຽວ ຂ້ອງຕາມລະບຽບການໂດຍລົດລັດຈະປະກອບໃຫ້ເປົ້າໝາຍສະເພາະເພື່ອຮັບໃຊ້ໃນວຽກງານບໍລິຫານລັດ,ວິຊາສະເພາະ ແລະວິຊາສະເພາະຈໍາເພາະ,ລົດປະຈໍາຕໍາແໜ່ງ ແລະລັດວິສາຫະກິດຕາມພາລະບົດບາດທີ່ຖືກມອບໝາຍ.

ໃນຜ່ານມາການນໍາໃຊ້ລົດລັດເຂົ້າໃນ ການເຄື່ອນໄຫວວຽກງານລ້ວນແຕ່ເກີດ ປະໂຫຍດສູງໃຫ້ປະເທດຊາດ; ຂະນະ ດຽວກັນ, ມີບາງສໍານັກງານ-ອົງການ, ຂະແໜງການ ແລະທ້ອງຖິ່ນໄດ້ນໍາໃຊ້ລົດ ລັດຊະຊາຍ, ຂາດການຄຸ້ມຄອງຮັກສາ; ພ້ອມນີ້ມີບາງບ່ອນນໍາໃຊ້ຂົນເຄື່ອງຜິດກົດໝາຍ, ເຂົ້າເທັກ-ຮ້ານເບຍ, ໃຫ້ຄອບ ຄົວນໍາໃຊ້ວຽກສ່ວນຕົວ...; ບາງບ່ອນຍັງ ຈັດຊື້-ຈັດຈ້າງລົດຫຼູ, ບາງຄົນໄດ້ມາດ້ວຍ ການໃຫ້ເປັນຂອງຂວັນຕິດພັນກັບໜ້າ ທີ່ເຮັດໃຫ້ສັງຄົມວິພາກວິຈານ; ຢູ່ຂະແໜງ ການເສດຖະກິດກໍ່ແຂ່ງຂັນສູງເລື່ອງລົດ ປະຈໍາຕໍາແໜ່ງ, ບາງບ່ອນຂັ້ນພະແນກມີ ລົດໃຫຍ່ຂີ່, ເປັນຮອງກົມກໍ່ໄດ້ລົດຄັນລະ 3-400 ລ້ານກີບ; ບາງເມືອງທຸກຍາກ, ການນໍາຂີ່ລົດລາຄາແພງ ໂດຍບໍ່ຈົກເງິນ ຊື້ແຕ່ນັກທຸລະກິດມອບໃຫ້; ບາງທີ່ນາຍໄດ້ ເລື່ອນຊັ້ນໃຫຍ່,

   ອົງກອນຕົ້ນສັງກັດກໍ່ຄວ້າຫາລົດໃໝ່ໃຫ້ສົມສັກສີ, ມີບາງທ່ານຍົກຍ້າຍເປັນການນໍາຢູ່ກະຊວງ ຫຼືແຂວງໃໝ່ກໍ່ເອົາໄປນໍາ ແລະຍັງໄດ້ຄັນໃໝ່ຕື່ມ, ປາກົດວ່າຍັງຄວບ ຄຸມ-ຄຸ້ມຄອງກັນບໍ່ທັນໄດ້ດີປານໃດ ແລະ ເຫຼືອແຕ່ລົດໂລຮ້າງຫັ້ນລະທີ່ບໍ່ເອົາໄປນໍາແຕ່ຂໍສັນລະເສີນການນໍາຫຼາຍທ່ານທີ່ເປັນຕົ້ນແບບໃນການສົ່ງລົດລາຄາສູງທີ່ລັດປະກອບຄືນໃຫ້ກະຊວງການເງິນເພື່ອປະມູນຂາຍນໍາເງິນມາພັດທະນາບ້ານເມືອງ.

ຕໍ່ບັນຫາດັ່ງກ່າວ, ລັດຖະບານຫຼາຍຊຸດໄດ້ຄຸມເຂັ້ມແຕ່ເກີດຜົນໜ້ອຍຍ້ອນພະນັກງານຈໍານວນໜຶ່ງຖືຜົນປະໂຫຍດສ່ວນຕົວສູງກວ່າຂອງຊາດ; ດັ່ງນັ້ນ, ລັດຖະບານຊຸດທີ IX ຈຶ່ງອອກດໍາລັດວ່າດ້ວຍລົດຂອງລັດ ເລກທີ 599/ລບ, ວັນທີ 29 ກັນຍາ 2021 ໂດຍມີເປົ້າໝາຍປະກອບ, ຄຸ້ມຄອງ ແລະນໍາໃຊ້ລົດຂອງລັດຮັບໃຊ້ວຽກງານບໍລິຫານລວມ; ວຽກວິຊາສະເພາະ ແລະລົດວິຊາສະເພາະຈໍາເພາະ; ລົດປະຈໍາຕໍາແໜ່ງລະດັບສູງໂດຍມີຂອບເຂດນໍາໃຊ້ສໍາລັບອົງການຈັດຕັ້ງຂອງພັກ-ລັດ, ແນວລາວສ້າງຊາດ, ສະຫະພັນນັກຮົບເກົ່າ, ອົງການຈັດຕັ້ງມະຫາຊົນ, ແຂວງນະຄອນຫຼວງ ແລະທ້ອງຖິ່ນ,ກົມກອງກໍາລັງປະກອບອາວຸດ,ຫົວໜ່ວຍໂຄງການ,ລັດວິສາຫະກິດຂັ້ນສູນກາງ ແລະທ້ອງຖິ່ນທີ່ພົວພັນເຖິງການປະຕິບັດໜ້າທີ່ວຽກງານຂອງລັດ;ລົດລັດທຸກຄັນໃຫ້ຕິດແຜ່ນກາໝາຍ “ລົດຮັບໃຊ້ວຽກງານທາງລັດຖະການ” ແລະມີບາໂຄດ (QR code) ຍົກເວັ້ນລົດປະຈໍາຕໍາແໜ່ງ; ສໍາລັບລົດຮັບໃຊ້ໂຄງການ ແລະລັດວິສາຫະກິດຕ້ອງຕິດແຜ່ນກາໝາຍການນໍາໃຊ້ທີ່ລະບຸຊື່ໂຄງການ ຫຼືລັດວິສາຫະ ກິດໃສ່ປະຕູເບື້ອງໜ້າ 2 ດ້ານ.

 ລົດປະຈໍາຕໍາແໜ່ງພະນັກງານການນໍາລະດັບສູງປະເພດທີ I ປະກອບດ້ວຍເລຂາທິການໃຫ່ຍ, ຄວບຕໍາແໜ່ງປະທານປະເທດ, ເລຂາທິການໃຫຍ່, ປະທານປະ ເທດ, ນາຍົກລັດຖະມົນຕີ, ຜູ້ປະຈໍາການຄະນະເລຂາທິການສູນກາງພັກ, ປະທານສະພາແຫ່ງຊາດ ແລະກໍາມະການກົມການເມືອງສູນກາງພັກ; ປະເພດທີ II ມີຄະນະ ເລຂາທິການສູນກາງພັກ, ຮອງປະທານປະເທດ, ຮອງນາຍົກລັດຖະມົນຕີແລະ ຮອງປະທານສະພາແຫ່ງຊາດ (ສພຊ); ປະເພດທີ III ມີກໍາມະການສູນກາງພັກ, ຫົວໜ້າຄະນະຂອງພັກ, ປະທານສູນກາງແນວລາວສ້າງຊາດ, ລັດຖະມົນຕີ (ລມຕ), ຫົວໜ້າອົງການລັດທຽບເທົ່າກະຊວງ, ລມຕ ຫົວໜ້າຫ້ອງວ່າການສໍານັກງານນາຍົກລັດຖະມົນຕີ(ຫສນຍ), ປະທານ ຫຼືເລຂາອົງການຈັດຕັ້ງມະຫາຊົນຂັ້ນສູນກາງ ຫຼືທຽບເທົ່າ, ປະທານ ສານປະຊາຊົນສູງສຸດ, ຫົວໜ້າອົງການໄອຍະການປະຊາຊົນສູງສຸດ (ອຍ), ປະທານອົງການກວດກາແຫ່ງລັດ, ປະທານອົງການກວດສອບແຫ່ງລັດ, ຜູ້ວ່າການທະນາຄານແຫ່ງ ສປປ ລາວ(ທຫລ), ປະທານກໍາມາທິການ ສພຊ, ເລຂາທິການ ສພຊ, ຫົວໜ້າຫ້ອງວ່າການສໍານັກງານປະທານປະເທດ, ເລຂາຄະນະພັກນະຄອນຫຼວງວຽງຈັນ (ນວ), ເລຂາຄະນະພັກແຂວງ, ເຈົ້າຄອງ ນວ, ເຈົ້າແຂວງ ແລະຕໍາແໜ່ງອື່ນໆທຽບເທົ່າຕໍາແໜ່ງບໍລິຫານດັ່ງກ່າວທີ່ກໍານົດໄວ້ໃນກົດໝາຍ ແລະລະບຽບການ.

   ປະເພດທີ IV ມີ ກໍາມະການສໍາຮອງສູນກາງພັກ, ຮອງຫົວໜ້າຄະນະຂອງພັກ, ຮອງປະທານສູນກາງແນວລາວສ້າງຊາດ, ຮອງ ລມຕແລະຮອງຫົວໜ້າອົງການລັດທຽບເທົ່າກະຊວງ, ຮອງ ລມຕ-ຮອງຫົວໜ້າ ຫສນຍ, ຮອງປະທານ ຫຼືຮອງເລຂາອົງການຈັດຕັ້ງມະຫາຊົນຂັ້ນສູນກາງ ຫຼືທຽບເທົ່າ, ຮອງປະທານສານປະຊາຊົນສູງສຸດ, ຮອງຫົວໜ້າອົງການ, ຮອງປະທານອົງການກວດກາແຫ່ງລັດ, ຮອງປະທານອົງການກວດສອບແຫ່ງລັດ, ຮອງຜູ້ວ່າການ ທຫລ, ຮອງປະທານກໍາມາທິການ ສພຊ, ຮອງເລຂາທິການ ສພຊ, ຮອງຫົວໜ້າຫ້ອງວ່າການສໍານັກງານປະທານປະເທດ, ປະທານສະພາປະຊາຊົນຂັ້ນແຂວງ, ຮອງເລຂາຄະນະພັກ ນວ, ຮອງເລຂາ ຄະນະພັກແຂວງ, ຮອງເຈົ້າຄອງ ນວ, ຮອງເຈົ້າແຂວງ ແລະຕໍາແໜ່ງຂຶ້ນທຽບເທົ່າຕໍາແໜ່ງບໍລິຫານດັ່ງກ່າວທີ່ກໍານົດໃນກົດໝາຍ ແລະລະບຽບການ.

ສໍາລັບການປະກອບລົດປະຈໍາຕໍາແໜ່ງ ແລະນໍ້າມັນໃຫ້ປະຕິບັດຕາມລະບອບຕໍາແໜ່ງດຽວຄື: ປະເພດ I ໃຫ້ປະ ກອບລົດເກັ໋ງ 1 ຄັນ, ລົດຈິບ 1 ຄັນ, ນໍ້າມັນ 200 ລິດ ຕໍ່ໜຶ່ງເດືອນ; ປະເພດ II ລົດເກັງ 1 ຄັນ, ລົດຈິບ 1 ຄັນ, ນໍ້າມັນ 180 ລິດ ຕໍ່ໜຶ່ງເດືອນ; ປະເພດ III ລົດ ເກັ໋ງ 1 ຄັນ, ນໍ້າມັນ 150 ລິດ ຕໍ່ໜຶ່ງເດືອນ ແລະປະເພດ IV  ລົດເກັ໋ງ 1 ຄັນ; ນໍ້າມັນ 120 ລິດ ຕໍ່ໜຶ່ງເດືອນ.

   ສໍາລັບພາຫະນະທີ່ນໍາໃນການເຄື່ອນໄຫວວຽກງານທາງການທີ່ຈໍາເປັນຂອງການນໍາຂັ້ນສູງປະເພດ III ແລະ IV ໃຫ້ ນໍາໃຊ້ລົດບໍລິຫານລວມຄວາມແຮງຂອງລົດປະຈໍາຕໍາແໜ່ງ ແຕ່ລະປະເພດໃຫ້ກໍານົດສະເພາະໃນແຕ່ລະໄລຍະຕາມຄວາມເໝາະສົມພ້ອມກັນນັ້ນ,ລັດຖະບານຈະຄົ້ນຄວ້າຫັນໄປສູ່ການນໍາໃຊ້ລົດທີ່ນໍາໃຊ້ພະລັງງານສະອາດ (ພະລັງງານໄຟຟ້າ, ແສງອາທິດ ແລະ ອື່ນໆ) ເພື່ອປ່ຽນແທນລົດທີ່ນໍາໃຊ້ພະລັງງານນໍ້າມັນເຊື້ອໄຟຕາມແຕ່ລະກໍລະນີ ແລະ ເງື່ອນໄຂຕົວຈິງຈາກນັ້ນ, ກໍ່ຈະມີການດັດປັບການເບີກຈ່າຍນໍ້າມັນເຊື້ອໄຟຕາມຄວາມເໝາະສົມ.

   ການປະກອບລົດປະຈໍາຕໍາແໜ່ງໃຫ້ການນໍາລະດັບສູງໄດ້ຮັບການສັບຊ້ອນ, ໝູນວຽນ ຫຼືຍົກຍ້າຍໄປຮັບຕໍາແໜ່ງໃໝ່ທີ່ເທົ່າກັບຕໍາແໜ່ງເກົ່າກໍ່ໃຫ້ສືບຕໍ່ນໍາໃຊ້ລົດທີ່ປະກອບໃຫ້ແລ້ວ; ຫາກຮັບຕໍາແໜ່ງ ໃໝ່ທີ່ສູງກວ່າ ຫຼືຕໍ່າກວ່າເກົ່າໃຫ້ຖອນລົດປະຈໍາຕໍາແໜ່ງທີ່ປະກອບໃຫ້ຜ່ານມາແລ້ວໃຫ້ປະກອບລົດປະຈໍາຕໍາແໜ່ງໃໝ່ປ່ຽນແທນ, ການຖອນຄືນຢ່າງຂາດຕົວລົດປະຈໍາຕໍາແໜ່ງໃນກໍລະນີເສຍຊີວິດ; ປົດຕໍາແໜ່ງ ຫຼືອອກຈາກລັດຖະການ; ບໍານານ, ກໍລະນີຜູ້ກ່ຽວຕ້ອງການລົດເພື່ອນໍາໃຊ້ສ່ວນຕົວໃຫ້ປະຕິບັດຕາມການຫັນກໍາມະສິດລົດຂອງລັດຈາກການຄຸ້ມຄອງນໍາໃຊ້ຂອງພາກລັດໃຫ້ບຸກຄົນ ຫຼືນິຕິບຸກຄົນໃນກໍລະນີໃດໜຶ່ງຄື: ລົດໃຫຍ່ມີອາຍຸການນໍາໃຊ້ເກີນກວ່າ 10 ປີ; ລົດຈັກເກີນກວ່າ 5 ປີ; ເປ່ເພຫຼາຍ ຫຼືສ້ອມແປງບໍ່ມີປະສິດທິຜົນ ແລະຕາມການຕົກລົງຂອງລັດຖະບານ.

  ສໍາລັບການນໍາໃຊ້, ຄຸ້ມຄອງຮັກສາລົດລັດຕ້ອງຖືກນໍາໃຊ້ເຂົ້າໃນວຽກງານທາງລັດຖະການເທົ່ານັ້ນ; ນໍາໃຊ້ໃຫ້ຖືກເປົ້າໝາຍ; ພາຍຫຼັງການນໍາໃຊ້ແລ້ວທຸກຄັ້ງຕ້ອງນໍາມາຈອດໄວ້ຢູ່ສໍານັກງານຂະແໜງການຕົນທີ່ກໍານົດໄວ້ຢ່າງເຂັ້ມງວດຍົກເວັ້ນລົດປະຈໍາຕໍາແໜ່ງ.

แชร์