ພັນລະນາ ຜະລິດທຽນຫອມ ລູກຄ້າຕອບຮັບດີ

  ນາງ ແສງສະຫວັນ ຈັນທະວົງສາ ຈາກນັກສຶກທີ່ຮຽນຈົບປະລິນຍາຕີ ສາຂາເສດຖະສາດ ແລະ ເປັນຄົນມີຈິດໃຈມັກຮັກໃນເລື່ອງຂອງການ (ພັນລະນາ) ແລະເປັນຄົນມັກຊອກຄົ້ນຄິດຢາກເຮັດທຸລະກິດເປັນຂອງຕົນເອງໂດຍບໍ່ຢາກເພີ່ງພາເປັນພາລະພໍ່ແມ່ຕັດສິນໃຈເຮັດທຸລະກິດຜະລິດຕະພັນທຽນຫອມພັນລະນາຂຶ້ນປະຈຸບັນສັງຄົມໃຫ້ຄວາມຕອບຮັບເປັນຢ່າງດີ.
  ນາງ ແສງສະຫວັນ ຈັນທະວົງສາ ເປັນທີ່ຮູ້ຈັກຊື້ຫຼິ້ນ (ເບເບ) ໃຫ້ສຳພາດນັກຂ່າວພວກເຮົາຜ່ານໂທລະສັບວ່າ: ຈຸດເລີ່ມຕົ້ນຂອງພັນລະນາແມ່ນພາຍຫຼັງທີ່ນ້ອງຮຽນຈົບມະຫາວິທະຍາໄລໃນ ປີ 2018 ນ້ອງພະຍາຍາມຊອກຫາຊ່ອງທາງຫາລາຍໄດ້ໃຫ້ຕົນເອງເພື່ອທີ່ຈະບໍ່ຕ້ອງເພິ່ງພາອາໄສພໍ່ແມ່, ນ້ອງຢາກສ້າງຜະລິດຕະພັນຂອງລາວທີ່ສາມາດເປັນເຄື່ອງຕ້ອນຂອງຝາກທີ່ບໍ່ຄືໃຜ ແລະບໍ່ເຄີຍມີມາກ່ອນອື່ນ, ນ້ອງກໍເລີ່ມຈາກການສຳຫຼວດຕົນເອງວ່າເຮົາສາມາດເຮັດຫຍັງ ແລະ ຊອກຫາຄົ້ນໃນອິນເຕີເນັດ ວ່າມີທຸລະກິດໃດທີ່ສາມາດເລີ່ມຕົ້ນໄດ້ງ່າຍ ແລະໃຊ້ຕົ້ນທຶນໜ້ອຍ, ຜ່ານການສຳຫຼວດຕົນເອງສັງເກດເຫັນວ່າຕົນເອງເປັນຄົນດັງດີ ແລະ ສາມາດຮັບຮູ້ກິ່ນຕ່າງໆໄດ້ໄວກວ່າຜູ້ອື່ນ, ປະກອບກັບບັນດາຕົວຢ່າງ ທີ່ເຫັນໃນອິນເຕີເນັດ, ເລີຍສະຫຼຸບໄດ້ວ່າຄວນຊອກຫາສິນຄ້າທີ່ກ່ຽວ ກັບກິ່ນເຊັ່ນ: ນ້ຳຫອມ, ສະບູ, ທຽນຫອມ ແລະອື່ນໆ, ຜ່ານການລອງຜິດລອງຖືກເປັນເວລາເກືອບໜຶ່ງປີກໍສະຫຼຸບໄດ້ວ່າຕົນເອງມັກ ແລະຢາກເຮັດທຽນຫອມ.
  ພັນລະນາຜະລິດທຽນຫອມທີ່ເຮັດມາຈາກໄຂຖົ່ວເຫຼືອງທຳມະຊາດ ແລະມີຫຼາກຫຼາຍກິ່ນໃຫ້ເລືອກຄື: ວະນິລາ,ກາເຟ,ກຸຫຼາບ, Sage,Musk, ໄມ້ຈັນ, ຫົວສິງ ໄຄ ແລະ ລາເວັນເດີ (ແຕ່ລະກິ່ນ ແມ່ນຂະໜາດ 150 ກຣາມ) ແຕ່ລະກິ່ນຈະມີຄຳອະທິບາຍເປັນພາສາອັງກິດໃນແບບຕະຫຼົກໆ ແລະ ມີລັກສະນະຄ້າຍຄືກັບວັດຈະ ນານຸກົມທັງໝົດນີ້ແມ່ນນ້ອງໄດ້ອອກແບບເອງເພື່ອໃຫ້ເຂົ້າກັບຄອນເຊັບຂອງຄຳວ່າ “ພັນລະນາ” ລູກຄ້າທ່ານໃດທີ່ຈູດທຽນ ພັນລະນາຈົນໝົດຈອກ, ສາມາດນຳເອົາຈອກເປົ່າກັບມາຕື່ມທຽນ, ໂດຍທີ່ເລືອກກິ່ນໃໝ່ໄດ້ ແລະຈະໄດ້ຮັບສ່ວນຫຼຸດ 15% ຈາກລາຄາຂາຍ.
  ສຳລັບເລື່ອງອຸປະສັກທີ່ໃຫຍ່ ຫຼວງທີ່ສຸດຂອງນ້ອງແມ່ນການເລີ່ມຕົ້ນ, ເນື່ອງຈາກວ່າໃນໄລຍະທ້າຍປີ 2019 ທີ່ນ້ອງໄດ້ຕັດສິນໃຈເລີ່ມເຮັດທຸລະກິດພັດເກີດມີການ ແຜ່ລະບາດຂອງພະຍາດໂຄວິດ- 19, ຊຶ່ງໃນໄລຍະນັ້ນການຂົນສົ່ງ ຕ່າງໆໄດ້ຢຸດຈຶ້ງ, ເຮັດໃຫ້ນ້ອງບໍ່ສາມາດນຳເຂົ້າວັດຖຸດິບເພື່ອເລີ່ມຕົ້ນການຜະລິດສິນຄ້າໄດ້, ການ ເລີ່ມເປີດໂຕພັນລະນາ ຈຶ່ງຖືກແກ່ຍາວໄປຈົນຮອດເດືອນກໍລະກົດ 2020 ແລະວັດຖຸດິບສ່ວນຫຼາຍນຳໃຊ້ເຊັ່ນ ໄຂຖົ່ວເຫຼືອງ ແລະຫົວນ້ຳຫອມສຳລັບທຽນໂດຍສະເພາະ ແມ່ນຕ້ອງໄດ້ນຳເຂົ້າມາຈາກຕ່າງປະເທດ, ເນື່ອງຈາກຍັງບໍ່ສາມາດຊອກຫາໄດ້ພາຍໃນປະເທດເຮົາ.
  ນາງ ແສງສະຫວັນ ໃຫ້ຮູ້ຕື່ມວ່າ: ຫວັງຢ່າງຍິ່ງວ່າໃນອະນາຄົດ, ພັນລະນາຈະສາມາດຮ່ວມມືກັບປະຊາຊົນທ້ອງຖິ່ນ ໃນການຜະລິດໄຂຖົ່ວເຫຼືອງ ແລະການສະກັດນ້ຳມັນຫອມລະເຫີຍຈາກວັດຖຸດິບທີ່ເປັນເອກະລັກຂອງແຕ່ລະແຂວງ ໃນປະເທດເຮົາອາດຈະຍັງເປັນຄວາມຝັນທີ່ຍັງອີກຍາວໄກ, ແຕ່ນ້ອງກໍຈະພາຍາຍາມສຸດຄວາມສາ ມາດເພື່ອໄປຮອດຈຸດນັ້ນໃຫ້ໄດ້.
  ຊຶ່ງຜ່ານບໍລິການມາຜົນຕອບຮັບຈາກລູກຄ້າໃນໄລຍະທຳອິດແມ່ນເກີນຄວາມຄາດໝາຍຂອງນ້ອງໄປຫຼາຍ. ມື້ທຳອິດທີ່ນ້ອງເປີດ ຮ້ານຂາຍພັນລະນາແມ່ນຢູ່ງານ ຕະຫຼາດນັດນ້ອຍໆ, ຊຶ່ງນ້ອງສາມາດກຽມທຽນໄປໄດ້ພຽງ 25 ອັນ, ແຕ່ພາຍໃນງານດັ່ງກ່າວນ້ອງສາມາດຂາຍທຽນໄດ້ຈົນໝົດ ແລະໄດ້ຮັບການຈອງລ່ວງໜ້າເປັນຈຳນວນຫຼາຍກວ່າ 100 ອັນ ມາຮອດປະຈຸບັນຜ່ານໄປແລ້ວ 1 ປີ ພັນລະນາ ກໍຍັງໄດ້ຮັບການຕອບຮັບທີ່ດີ ແລະສະໝ່ຳສະເໝີຈາກລູກຄ້າ, ຊຶ່ງເປັນກຳລັງໃຈທີ່ດີຫຼາຍໃຫ້ແກ່ນ້ອງ.
  ສຸດທ້າຍຢາກໃຫ້ທຸກຄົນໂດຍສະເພາະຄົນລາວເຮົາມາໃຊ້ ແລະ ສົ່ງເສີມຜະລິດຕະພັນລາວນຳກັນທຽນຫອມພັນລະນາຂະໜາດ 150 ກຣາມ ທຸກກິ່ນທີ່ກ່າວມາຂ້າງເທິງແມ່ນມີລາຄາ 69.000 ກີບ ແລະ ສາມາດຈູດໄດ້ປະມານ 20 ຊົ່ວໂມງທ່ານສາມາດສັ່ງຊື້ທຽນພັນລະນາ ໄດ້ທີ່: Facebook Page: Panlana – Candle & Co. ແລະ Instagram: @panlana.candle.co. ແລະ ອີກບໍ່ດົນນີ້ຈະສາມາດສັ່ງຜ່ານເວັບໄຊ້ www.panlana.com

----

ໂດຍ: ບຸນນິກ

แชร์