ລັດຖະມົນຕີກະຊວງສາທາ ເນັ້ນຢໍ້າຫລວງພະບາງເພີ່ມທະວີຄວບຄຸມໂຄວິດ

ຂ່າວ: ເພັດສາຄອນ ສິມມະວົງ

   ເມື່ອວັນທີ 2 ຕຸລາ 2021 ແຂວງຫຼວງພະບາງ ໄດ້ຈັດກອງປະຊຸມຫາລືເພື່ອຮັບມື້ກັບການລະບາດຂອງເຊື້ອພະຍາດໂຄວິດ-19 ໂດຍການເປັນປະທານຂອງທ່ານ ບຸນແຝງ ພູມມະໄລສິດ ລັດຖະມົນຕີກະຊວງ ສາທາລະນະສຸກ, ທ່ານ ບຸນເລື່ອມ ມະນີວົງ ຮອງເຈົ້າແຂວງຫຼວງພະບາງພ້ອມດ້ວຍຄະນະສະເພາະກິດແຂວງເຂົ້າຮ່ວມ.

   ທ່ານ ດຣ ຄໍາສອນ ພົງສະຫວັດດີ ຫົວໜ້າພະແນກສາທາລະນະລັດສຸກແຂວງລາຍງານວ່າ: ປະຈຸບັນທົ່ວແຂວງມີຜູ້ຕິດເຊື້ອສະສົມທັງໝົດ 610 ຄົນ, ປິ່ນປົວຫາຍດີສະສົມ 140 ຄົນ, ກໍາລັງປິ່ນປົວຢູ່ໂຮງໝໍແຂວງ, ໂຮງໝໍພາກສະໜາມ ແລະໂຮງໝໍຊຸມຊົນຂອງບັນດາເມືອງ ຈໍານວນ 470 ຄົນ.


  ໂອກາດດັ່ງທ່ານລັດຖະມົນຕີກະຊວງສາທາໄດ້ເນັ້ນຢໍ້າໃຫ້ຄະນະສະເພາະກິດຂັ້ນແຂວງ, ຂັ້ນເມືອງ ແລະທຸກພາກສ່ວນໃນສັງຄົມຈົ່ງເພີ່ມທະວີຄວາມສາມັກຄີສຸມທຸກກໍາແຮງເຂົ້າໃນການປ້ອງກັນຄວບຄວບຄຸມຕ້ານ ແລະສະກັດກັ້ນການລະບາດຂອງພະຍາດໂຄວິດ-19 ຢູ່ບັນດາແຂວງໃນທົ່ວປະເທດເວົ້າສະເພາະແຂວງຫຼວງພະບາງ ໂດຍດ່ວນ, ທຸກພາກສ່ວນຕ້ອງເປັນເຈົ້າການ, ເປັນກໍາແຮງຊ່ວຍກັນປະຕິບັດມາດຕະການປ້ອງກັນຄວບຄຸມການລະບາດຢ່າງເຂັ້ມງວດ ແລະຕ້ອງໄດ້ທົບທວນຄືນບັນດາມາດຕະການປ້ອງກັນສັງຄົມໃຫ້ເຂັ້ມງວດຂຶ້ນຕື່ມ, ເພາະວ່າໃນໄຍລະຜ່ານມາການລະບາດຢູ່ຊຸມຊົນກໍ່ເກີດຈາກສາເຫດເຊັ່ນວ່າ: ການເຂົ້າຮ່ວມຄົບງັນເຮືອນດີ, ການສ້າງສັນຊຸມແຊວກັບໝູ່, ການພົວພັນສັງຄົມລະຫວ່າງຄອບຄົວກັບຄອບຄົວ ແລະອີກແຫຼ່ງທີ່ມາກໍ່ຍ້ອນແຮງງານນໍາເຂົ້າ ແລະໄດ້ນໍາເຊື້ອເຂົ້າມາລະບາດໃນຊຸມຊົມເຮັດໃຫ້ການລະບາດນັບມື້ນັບຮຸນແຮງຂຶ້ນເລື້ອຍໆ.


   ຕໍ່ກັບສະພາບດັ່ງກ່າວທ່ານລັດຖະມົນຕີໄດ້ຮຽກຮ້ອງໃຫ້ມີການລົງໂຄສະນາສຸຂະສຶກສາໃຫ້ຄວາມຮູ້ແກ່ປະຊາຊົນບັນດາເຜົ່າກ່ຽວກັບຜົນໄພອັນຕະລາຍ, ຜົນຮ້າຍຂອງການລະບາດ ແລະ ວິທີການປ້ອງກັນຕົວເອງ, ຄອບຄົວ ແລະ ສັງຄົມ, ເພື່ອຕັດວົງຈອນລະບາດຂອງພະຍາດດັ່ງກ່າວບໍ່ໃຫ້ມີການຂະຫຍາຍໄປສູ່ວົງກ້ວາງ. ທ່ານຍັງໄດ້ເນັ້ນໃຫ້ລະດົມທຸກພາກສ່ວນບໍ່ວ່າຈະແມ່ນນັກສຶກສາແພດແລະແພດໝໍຊຸມຊົນລວມທັງແພດທະຫານເຂົ້າຊ່ວຍ,ຮ່ວມກັນເປັນອີກທາງໜຶ່ງເພື່ອສຸມໃສ່ປ້ອງກັນ,ຄວບຄຸມ ແລະສະກັດກັ້ນບໍ່ໃຫ້ແຜ່ລາມໄປອອກຫຼາຍຂຶ້ນ. ໂດຍສະເພາະແມ່ນເຂດຊຸມຊົນພ້ອມດຽວກັນນັ້ນຕ້ອງຄໍານຶງເຖິງຜົນກະທົບຕໍ່ການທໍາມາຫາກິນຂອງປະຊາຊົນໂດຍສະເພາະແມ່ນປະຊາຊົນທີ່ຫາເຊົ້າກິນຄໍາ, ຜູ້ທີ່ມີລາຍໄດ້ໜ້ອຍ ແລະບັນດາຜູ້ທີ່ຫວ່າງງານຈາກການປິດໂຮງຈັກໂຮງງານ, ບໍລິສັດ ແລະອື່ນໆ.


   ນອກນັ້ນທ່ານລັດຖະມົນຕີກະຊວງສາທາລະນະສຸກໄດ້ມອບເຄື່ອງອຸປະໂພກທີ່ໄດ້ລະດົມຈາກກົມກອງຢູ່ສູນກາງໃຫ້ຄະນະສະເພາະກິດ ແຂວງຫຼວງພະບາງ ເພື່ອນໍາໄປແຈກຍາຍໃຫ້ຜູ້ກັກຕົວຢູ່ບັນດາສູນພາຍໃນແຂວງດັ່ງກ່າວ.

แชร์